Ẹẹn. Ivbiotu e Kristi ẹre ima khin rhunmwuda wẹẹ:

• Ma keghi hia ne ima gha lelẹe khuankhuankhuan imamwawmwi kevbe uyinmwẹ ọghe Jesu Kristi.—1 Pita 2:21.

• Ma yayi wẹẹ, Jesu ẹre ọ khian kie odẹ ọghe imiẹfan ne ima, kevbe wẹẹ, “eni ọvbehe i rrọọ, vbe agbọn na, ne Osanobua rhie ne emwa wẹẹ a gha lae miẹn imiẹnfan.”—Iwinna 4:12.

• Ọmwaikọmwa nọ ghi re ọkpa nẹ vbe Osẹe Jehova, te ọ gha dinmwiamẹ vbe eni ọghe Jesu.—Matiu 28:18, 19.

• Eni ọghe Jesu ẹre ima ya na erhunmwu.—Jọn 15:16.

• Ma yayi wẹẹ, Jesu ọre Uhunta ra ọmwa na zẹ ye ukpo ọghe ọdakha, yan okpia hia fẹẹrẹ.—1 Kọrinti 11:3.

Vbọrhirhighayehẹ, ọ mwẹ odẹ eso ne ima ya lughaẹn nẹ otu ugamwẹ ọvbehe na vbe tiẹre Ivbiotu e Kristi. Vbe igiemwi, ma yayi wẹẹ, imamwaemwi nọ rre Baibol ọre wẹẹ, Jesu ọre ovbie Osanobua, irẹn i re ọkpa vbe osa eha nọ rre ọkpa. (Mak 12:29) Ima ma yayi wẹẹ, evbọrrọọ keghi re emwi nẹi sẹtin wu, kevbe wẹẹ, ẹi rre evbagbẹn nọhuanrẹn wẹẹ, Osanobua keghi rhie emwa oya vbe ẹrinmwi erhẹn vbe etẹbitẹ, kevbe wẹẹ, ima ma vbe yayi wẹẹ, ọ khẹke ne emwa ni su vbe ugamwẹ gha mwẹ iwaeni nọ ye iran ya hiunsi sẹ emwa ọvbehe ne iran gba ga.—Asan-Ibo 9:5; Ezikiẹl 18:4; Matiu 23:8-10.