Ẹn o. Ivbiotu e Kristi ẹre Avbe Osẹe Jehova khin, ma i ka egbe ima ba ivbi e Protestant. Vbọzẹe?

Rhunmwuda, Ivbi e Protestant keghi re “otu ugamwẹ ughughan ni gbodan ghee ugamwẹ ọghe ivbi e Catholic.” Ẹmwata nọ wẹẹ, Avbe Osẹe Jehova ma kue ye imamwaemwi nibun ọghe ivbi e Catholic, sokpan ma i ka egbe ima ba ivbi e Protestant. Nia ma gha ya unu kaan emwi eso nọ si ẹre ne ima i na ka egbe ima ba ivbi e Protestant:

1. Iyayi nibun ọghe ivbi e Protestant keghi gbodan ghee imamwaemwi nọ rre uwu e Baibol. Vbe igiemwi, e Baibol maa ima re wẹẹ, “Osanobua ọkpa ẹre ọ rrọọ,” ẹi re Osa Ne Agbeha. (1 Timoti 2:5; Jọn 14:28) E Baibol vbe maa ima re wẹẹ, te Jehova khian guọghọ emwa dan rua, ẹi re te ọ khian rri iran oya vbe ẹrinmwi erhẹn.—Psalm 37:9; 2 Tẹsalonaika 1:9.

2. Ma i gbodan ghee otu ugamwẹ ọghe Catholic ra otu ugamwẹ ọvbehe, ma i vbe hia ne ima fi imamwaemwi ọghe iran werriẹ. Sokpan, te ima kporhu iyẹn nọ maan ọghe Arriọba Osanobua ma emwa, ma ghi vbe gha hia ne ima ru iyobọ ne iran ya miẹn iyẹn nọ maan nii yi, ne iran mieke na sẹtin gha mwẹ amuẹtinyan. (Matiu 24:14; 28:19, 20) Ẹre te ima hoo ne ima fi imamwaemwi ọghe ugamwẹ ọvbehe werriẹ, sokpan, ma keghi hoo ne ima maa emwa ni mwẹ ekhọe ata ẹmwata nọ rre uwu ẹmwẹ ọghe Osanobua nọ re Baibol.—Kọlose 1:9, 10; 2 Timoti 2:24, 25.