Nogat, Baebol i no tijim save ya se ‘taem God i sevem man, man ya i sef blong olwe.’ Wan man we God i sevem hem from bilif blong hem long Jisas Kraes, i save lusum bilif mo laef blong hem. Baebol i talem se yumi mas wokhad, “faet strong” blong holemtaet bilif. (Jud 3, 5) Pol i talem long ol fas Kristin we oli bilif finis long Kraes, i se: “Yufala wanwan i mas soemaot se yufala i fraet mo yufala i seksek taem yufala i stap wok had blong God i sevem yufala.”​—Filipae 2:​12.

Ol vas blong Baebol we oli no agri wetem tijing ya se ‘taem God i sevem man, man ya i sef blong olwe’

•   Baebol i givim strong woning se man we i mekem wan bigfala sin bambae i no save go insaed long Kingdom blong God. (1 Korin 6:​9-​11; Galesia 5:​19-​21) Sipos God i sevem man mo man ya i sef blong olwe, hemia i min se woning ya i blong nating nomo. Defren olgeta, Baebol i soemaot se wan man we i bin sef, i save foldaon bakegen long ol nogud fasin blong hem. Eksampol, Hibrus 10:26 i talem se: “Sipos yumi kasem stret save long trutok finis, be yumi girap, yumi gohed nomo blong mekem sin, bambae i no moa gat wan sakrefaes blong ol sin ya.”​—Hibrus 6:​4-6; 2 Pita 2:​20-​22.

•   Jisas i soemaot klia from wanem i impoten blong holemtaet bilif, taem hem i yusum wan pijatok we i tokbaot hem wan olsem rop blong grep mo ol disaepol blong hem olsem ol han blong grep ya. Sam long olgeta oli bin soemaot se oli gat bilif long hem tru long ol frut blong olgeta, hemia i minim ol aksen blong olgeta, be biaen oli no moa soem se oli gat bilif mo oli kam olsem “han blong rop [frut] we oli sakemaot finis,” nao God i no moa sevem olgeta. (Jon 15:​1-6) Aposol Pol i yusum wan narafala pijatok olsem, we i talem se ol Kristin we oli no holemtaet bilif blong olgeta “bambae hem [God] i katemaot olgeta.”​—Rom 11:17-​22.

•   Ol Kristin oli mas “gohed blong lukaot gud.” (Matiu 24:42; 25:13) Olgeta we oli slip long saed blong spirit, maet from we oli stap mekem “ol wok we oli blong tudak” o we oli no mekem fulwan wok ya we Jisas i askem, God bambae i no save sevem olgeta.​—Rom 13:11-​13; Revelesen 3:​1-3.

•   Plante vas oli soemaot se olgeta we God i bin sevem olgeta, oli mas holemstrong long bilif blong olgeta go kasem en. (Matiu 24:13; Hibrus 10:36; 12:​2, 3; Revelesen 2:​10) Ol fas kristin oli glad taem oli harem se ol narafala Kristin tu oli holemstrong long bilif blong olgeta. (1 Tesalonaeka 1:​2, 3; 3 Jon 3, 4) ?Yu ting se i stret we Baebol i tokbaot se i impoten blong holemstrong long bilif, be long semtaem i se God bambae i sevem olgeta tu we oli no holemstrong long bilif?

•   Klosap bifo we Pol i ded, hem i save finis se God bambae i sevem hem. (2 Timoti 4:​6-8) Taem hem i laef i stap, hem i kasem save se God bambae i no save sevem hem sipos hem i stap tingbaot blong ronem ol samting long saed blong bodi. Hem i raetem se: “Mi kilim bodi blong mi mo mi fosem hem olsem wan slef, from we i nogud mi prij long ol narafala, be biaen mi mekem sam samting we God i no moa glad long mi from.”​—1 Korin 9:​27; Filipae 3:​12-​14.