Yes, hem i mekem taem ol man oli jenisim fasin blong olgeta. Eksampol, taem God i sanem wan jajmen agensem ol man Isrel bifo, hem i talem se: “Maet bambae oli lesin mo olgeta wanwan bambae oli tanem baksaed long ol nogud rod blong olgeta, mo bambae mi jenisim tingting we mi gat blong mekem trabol i kasem olgeta from ol rabis wok blong olgeta.”​—Jeremaea 26:3.

 Plante Baebol oli transletem vas ya se God nao i “tanem tingting blong hem” from bigfala trabol ya we bae i hapen, mo hemia i givim tingting se hem i mekem wan mastik. Be olfala Hibru wod long vas ya, i save minim “jenisim tingting.” Wan skola i raetem se: “Taem wan man i jenisim fasin blong hem, samting ya i mekem God i jenisim jajmen blong hem.”

 Be i tru se from we God i save jenisim tingting blong hem, hemia i no min se hem i mas jenisim. Tingbaot sam situesen we Baebol i talem se God i no jenisim tingting blong hem:

•   God i no letem Balak i mekem Hem i jenisim tingting blong Hem mo singaot trabol i kam long Isrel.​—Namba 23:18-​20.

•   Taem King Sol long Isrel i no moa wantem gowe long rabis fasin blong hem, God i no moa wantem se hem i king, mo i no moa jenisim tingting blong hem long saed ya.​—1 Samuel 15:28, 29.

•   God i promes se bambae hem i mekem Pikinini blong hem i kam wan pris blong olwe. Bambae hem i mekem promes ya i kamtru, mo bambae hem i no jenisim tingting blong hem.​—Ol Sam 110:4.

 Yes, long Baebol God i talem se: “Mi mi Jehova, mi mi no jenis.” (Malakae 3:6) Sem mak, Baebol i talem se God “i no save jenis olsem sado we i stap muv mo i stap jenis oltaem.” (Jemes 1:​17) Be hemia i no agensem tok ya se God i stap jenisim tingting blong hem. Taem Baebol i talem se God i no save jenis, hemia i min se ol fasin blong hem, ol stret rul blong hem long saed blong lav mo jastis bambae i stap sem mak oltaem, i neva save jenis. (Dutronome 32:4; 1 Jon 4:8) Be yet, hem i save givim sam defren instraksen long ol man long ol defdefren taem. Eksampol, God i givim tu defren instraksen long King Deved long tu defren faet we oli folfolem olgeta, be tufala instraksen ya oli wok gud.​—2 Samuel 5:​18-​25.

 Nogat, nating se hem i rigret se bighaf blong ol man oli no wantem save long hem o oli sakemaot hem. Taem Baebol i diskraebem ol samting we oli hapen bifo we Bigfala Wota i ron long taem blong Noa, hem i talem se: “Jehova i rigret se hem i bin mekem ol man long wol ya mo hem i harem nogud.” (Jenesis 6:6) Long vas ya, tok ya “rigret” i kamaot long wan Hibru tok we i save minim “jenisim tingting.” God i jenisim tingting blong hem long saed blong ol man we oli laef bifo we Bigfala Wota i ron, from we oli kam rabis man. (Jenesis 6:​5, 11) Nating se hem i sore from we oli jusum blong folem rod we i nogud, be hem i no jenisim tingting blong hem long saed blong olgeta man long wol. Blong talem stret, hem i sevem Noa mo famle blong hem tru long taem ya, blong mekem se i gat man long wol.​—Jenesis 8:​21; 2 Pita 2:​5, 9.