Sam hasban mo waef we oli no save joengud tugeta, oli gat tingting ya se divos bambae i mekem i gud long ol pikinini blong olgeta—bambae i moa gud i bitim we ol pikinini oli laef wetem wan papa mo mama we tufala i stap raorao oltaem. ?Ol pruf oli soemaot wanem?

•  ?Divos i mekem wanem long ol pikinini?

•  ?Ol Pikinini blong mi bambae oli glad moa sipos mi divos?

•  ?Mi mas save wanem long saed blong serem wok ya blong lukaot ol pikinini?

•  ?I gat wan rod we i gud moa?

 Ol risej oli soemaot se samting we divos i mekem long ol pikinini i nogud we i nogud. Ol pikinini we papa mo mama blong olgeta i divos, bambae:

•   oli kros, oli wari, mo oli kasem sik ya dipresen

•   fasin blong olgeta i kam raf

•   i had blong oli lanem samting long skul o oli lego skul

•   i isi blong sik

 Mo tu, plante pikinini oli blemem olgeta wan from samting we i hapen, oli ting se olgeta nao oli mekem se papa mo mama i divos, o se oli sud mekem wan samting blong blokem tufala blong tufala i no divos.

 Hadtaem we ol pikinini ya oli fesem i save gohed kasem we oli kam bigman, nao maet oli harem se oli nating nomo o se i had blong oli trastem narafala. Mo maet olgeta tu oli divos taem oli gat prapa problem long mared blong olgeta.

 Stamba poen: Nating se olgeta we oli wantem divos oli gat tingting ya se hemia bambae i mekem i gud long ol pikinini, ol risej oli no agri long samting ya. Wan woman we i gat gudhan blong lukaot long ol pikinini, nem blong hem Penelope Leach i raetem se: “Divos i mekem pikinini i harem nogud.” a

 Rul blong Baebol: “Yufala i no mas tingbaot yufala nomo, be yufala i mas tingbaot ol narafala man tu.”—Filipae 2:4.

 Samfala bambae oli talem yes. Be i gud blong tingbaot se filing blong papa mo mama i defren long filing blong pikinini. Hasban o waef we i stap plan blong divos i wantem se laef blong hem i jenis. Be pikinini i no wantem se laef blong hem i jenis, hem i wantem se papa mo mama blong hem i stap tugeta.

 Ol man we oli raetem buk ya The Unexpected Legacy of Divorce oli stadi long plante taosen divos, biaen oli raetem se: “Wan mesej i klia: Ol pikinini oli no talem se oli glad moa. Be oli talem stret se: ‘Long dei ya we papa mo mama blong mi i divos, mi mi no moa glad.’” Buk ya i gohed i se long lukluk blong olgeta, wol ya i olsem wan ples we “yumi no moa save dipen long hem, mo i no moa sef blong yumi from we fasin fren blong tu man we yumi klosap long tufala, i no strong.”

 Stamba poen: Ol pikinini oli no moa glad afta we papa mo mama blong olgeta i divos.

 Rul blong Baebol: “Be sipos tingting blong yu i stap kam nogud oltaem, bambae yu stap long rod blong ded nomo.”—Ol Proveb 17:22.

 Sam long olgeta we oli divos oli traem blong serem wok ya blong lukaot long pikinini, olsem taem we oli mared yet. Be fasin ya blong serem wok i no wan isi samting. Ol risej oli soemaot se olgeta we oli divos, plante taem:

•   oli spenem smol taem nomo wetem ol pikinini blong olgeta

•   tijing we wanwan long tufala i givim long pikinini i defren

•   oli letem pikinini i folem tingting blong hem, from we oli harem se oli gat fol o oli taet tumas

 Wan pikinini we papa mo mama blong hem i divos, plante taem bambae hem i no wantem lesin long tufala. From we plante taem tufala i no mekem samting we i stret, olsem holemtaet promes blong tufala blong stap tugeta. Taswe sam pikinini oli save gat tingting ya se: ‘?From wanem bambae mi lesin long tufala?’

 Stamba poen: I no isi blong serem wok ya blong lukaot long pikinini afta we yu divos. Mo blong ol pikinini, hemia wan samting we i had moa.

 Rul blong Baebol: “Yufala i no mas mekem pikinini i kros, from we sipos yufala i stap mekem olsem, tingting blong hem bambae i foldaon.”—Kolosi 3:21, futnot.

 Plante taem, hasban o waef we i divos i mas yusum moa paoa blong statem wan niufala laef, be i moa gud sipos hem i yusum paoa ya blong sevem mared blong hem. Buk ya The Case for Marriage i talem se: “Sipos wan mared i nogud, hemia i no min se i no gat rod blong mekem i kam gud bakegen. Plante man we oli no glad long mared blong olgeta, samtaem biaen oli glad we oli glad.” Long olgeta samting, ol pikinini oli stap gud moa taem papa mo mama blong olgeta i stap tugeta.

 ?Hemia i min se man i neva mas tingbaot divos olsem wan rod blong stretem problem? Si. Baebol i letem man i divos, taem wan long tufala i mekem rabis fasin long saed blong seks wetem narafala. (Matiu 19:9) Be Baebol i talem tu se “man we i gat hed, hem i stap lukluk gud long rod we bambae i folem.” (Ol Proveb 14:15) Hasban mo waef we i gat problem long mared, tufala i mas tingting gud fastaem long olgeta desisen we tufala i wantem tekem—tufala i mas tingbaot tu se divos bambae i mekem wanem long ol pikinini blong tufala.

 Yes, maet yu nid blong mekem moa samting, i bitim we yu stap nomo olsem. Baebol i gat ol nambawan advaes we i save givhan long hasban mo waef blong wokem ol gudfala fasin we i save mekem mared blong tufala i stap gud mo i hapi. Hemia i no wan samting blong sapraes long hem, from we Man ya we i Stamba blong Baebol, hemia Jehova, hem nao i stanemap plan blong mared.—Matiu 19:4-6.

 Rul blong Baebol: ‘Mi mi Jehova, mi God blong yufala. Mi nao mi stap tijim yufala blong givhan long yufala’—Aesea 48:17.