Mi gruap long taon ya Los Angeles, California, Amerika. Mi mi laef long ol ples we ol stronghed grup oli stap mekem trabol olbaot, mo oli tekem drag. Papa mo mama blong mi, tufala i gat sikis pikinini, mo mi mi sekenbon.

Mama i tekem mifala i go long wan jos blong evanjelis. Be taem mi mi yangfala, mi gat tu fes. Long Sande, mi go long jos mo mi joen long grup blong singsing. Be long ol narafala dei blong wik, mi mekem lafet, mi tekem drag, mo mi slip olbaot.

Mi save kros kwik, mo mi yusum eni samting we mi holem blong kilim man. Samting we mi lanem long jos i no givhan long mi. Oltaem mi stap talem se: “God nomo i gat raet blong givimbak, !be hem i yusum mi nao blong mekem samting ya!” Taem mi stap long hae skul long ol yia bifo 1970, wan grup blong ol man blong politik i gat paoa long mi, nem blong grup ya Black Panthers. Olgeta oli faet blong kasem samting we oli talem se man i gat raet long hem. Ale mi joenem wan grup blong ol studen we oli tok strong from raet blong ol man. Plante taem mifala i satem ol doa blong skul, blong go maj long rod from samting we mifala i ting se i agensem raet blong man.

Be mi luk se hemia i no naf. Mi wantem faet mo kilim man. Ale mi joen wetem sam fren blong mi blong girap agensem ol man we mifala i no laekem olgeta. Wanwan taem, mifala i go wajem ol muvi we oli soemaot ol man Afrika, taem oli wok slef long Amerika bifo. Taem mifala i luk we ol waetman oli stap kilim olgeta mo mekem i nogud long olgeta, mifala i kros tumas. Nao mifala i girap mo faetem ol waet yangfala we oli stap long haos sinema. Biaen, mifala i go lukaot ol waetman we oli stap raonabaot long mifala, blong kilim olgeta.

Taem mi mi gat klosap 20 yia, fasin blong mi mo ol brata blong mi, i kam moa nogud. Samtaem polis i holem mifala. Smol brata blong mi i stap long wan grup blong ol stronghed we ol man oli save gud olgeta, mo mi tu mi spenem taem wetem olgeta. Laef blong mi i stap kam moa nogud.

Mi mi gat wan fren we papa mo mama blong hem oli Witnes blong Jehova. Wan dei, oli singaot mi blong mi go long miting, ale mi go. Long taem ya, mi luk se ol Witnes oli defren long ol narafala skul. Olgeta evriwan oli gat Baebol, mo oli yusum. !Ol yangfala tu oli givim tok long miting! Mi mi sapraes blong save se God i gat wan nem, hemia Jehova, mo blong harem ol man oli yusum nem ya. (Ol Sam 83:18, NW) Ol man we oli kam long miting oli  blong ol defdefren kantri, be oli no seraot from kala blong skin.

Mi no wantem stadi Baebol wetem ol Witnes, be mi laekem blong go long miting blong olgeta. Wan naet, taem mi stap long miting, sam fren blong mi oli go long wan konset. Long ples ya, oli kilim wan yangfala i ded from we hem i no wantem givim kot blong hem long olgeta. Long nekis dei, oli tok flas from rabis fasin ya we oli mekem. Taem oli pas long kot, oli laf from samting we oli mekem. Plante long olgeta, kot i jajem olgeta se oli mas go kalabus long ful laef blong olgeta. Mi mi glad tumas se mi no foIem olgeta long naet ya. Mi mekem desisen se bambae mi stadi Baebol mo mi jenisim laef blong mi.

Mi bin joen plante wetem ol man we oli no laekem narafala from kala blong skin, taswe mi mi sek long plante samting we ol Witnes oli mekem. Wan taem, wan Witnes we i waetman i go ovasi mo i lego ol pikinini blong hem wetem wan famle we i blak. Mo tu, wan famle we i waet i tekem wan yangfala we i blakman i go stap wetem olgeta, from we hem i no gat ples blong slip. Mi mi luksave se ol Witnes blong Jehova oli folem tok blong Jisas long Jon 13:35, se: “From we yufala i stap lavlavem yufala, bambae olgeta man oli luksave se yufala i man blong mi.” Mi save se naoia mi faenem wan skul we ol man blong hem oli olsem ol brata mo sista nomo.

Taem mi stadi Baebol, mi kasem save se mi mas jenisim tingting blong mi. Mi mas mekem tingting blong mi i kam niuwan olgeta, olsem nao bambae mi gat pis wetem ol man. Antap long hemia, mi mas luksave se fasin blong laef ya i beswan. (Rom 12:2) Sloslo, laef blong mi i kam gud moa. Long Jenuware 1974, mi mi baptaes blong kam wan Witnes blong Jehova.

Nating se mi baptaes finis, be mi mas traehad yet blong winim fasin ya blong kros kwik. Mi tingbaot wan taem we mi stap prij long ol haos wanwan. Wan man i stilim radio long trak blong mi, ale mi girap mi ronem hem. Taem mi kam klosap long hem, hem i sakem radio mo i ronwe. Taem mi tokbaot samting we i hapen long ol narafala we oli stap prij, wan elda i askem long mi se: “Stephen, sipos yu kasem man ya, ?bambae yu mekem wanem long hem?” Kwestin ya i mekem mi mi tingting, nao mi wantem wok had moa blong gat pis wetem ol man.

Long Oktoba 1974, mi stat blong mekem wok blong prij fultaem. Mi spenem 100 aoa evri manis blong tijim ol man long Baebol. Biaen, mi gat blesing ya blong wok olsem wan volontia long hedkwota blong ol Witnes blong Jehova long Brooklyn, New York. Long yia 1978, mi gobak long Los Angeles blong lukaot long mama blong mi we i sik. Tu yia biaen, mi mared long gudfala woman blong mi, Aarhonda. Hem i givhan gud long mi blong mi lukaot long mama blong mi, go kasem we hem i ded. Biaen, mitufala i joen long Wajtaoa Baebol Skul blong Gilead, mo mitufala i go mekem wok blong misinari long Panama. Mitufala i stap yet long ples ya.

Taem we mi mi baptaes kam kasem naoia, mi fesem plante trabol we mi save kam kros from. Be mi lanem finis blong gowe long man we i traem mekem mi mi kros. Sipos no, mi mekem wan narafala samting blong winim trabol ya. Plante man, mo woman blong mi tu, oli talem gudfala toktok from fasin blong mi blong winim ol trabol ya. !Mi tu mi sek long samting ya! Be mi no ting se mi nao mi mekem ol jenis ya i kamaot. Mi bilif se ol jenis ya oli soemaot gud se BaeboI i gat paoa blong jenisim laef blong man.—Hibrus 4:12.

Baebol i givhan long mi blong luksave se mi mi no laef blong nating nomo, mo i tijim mi blong mi gat pis wetem ol man. Mi no moa faet mo kilim man, be mi givhan long olgeta blong oli save kam fren blong God. !Mo tu, mi mekem Baebol stadi long wan man we bifo mitufala i enemi long hae skul! Afta we hem i baptaes, mitufala i serem wan rum blong smol taem, mo kam kasem tede mitufala i bes fren. Mi mo woman blong mi i givhan finis long bitim 80 man blong oli kam ol Witnes blong Jehova, taem mitufala i mekem Baebol stadi long olgeta.

Mi mi talem bigfala tangkiu Iong Jehova from we hem i mekem se mi no moa laef blong nating nomo. Mo mi glad tumas blong stap wetem wan grup blong ol man we oli olsem ol brata mo sista blong mi.