Mi mi bon long ples ya Gomba, long kantri blong Uganda. Bighaf blong ol man long ples ya oli pua tumas. I no gat lektrik long taon, taswe long naet mifala i yusum karsin laet.

Papa mo mama blong mi i wokem garen. Tufala i blong Rwanda, be tufala i muf i kam long Uganda. Tufala i planem kofe mo banana, mo tufala i wokem wan strong dring long ol banana, nem blong hem waragi. Tufala i gat faol, nani, pig, mo buluk. From kastom we mi gruap long hem, mi ting se waef i mas obei long hasban blong hem long evri samting, mo hem i no gat raet blong talemaot tingting blong hem.

Taem mi gat 23 yia, mi muf i go long Rwanda. Mi go danis long naetklab wetem ol yangfala. From we mi go plante taem long wan naetklab, maneja i givim fri tikit blong mi kam insaed enitaem. Mi laekem ol muvi blong faet mo raf fasin. Taswe mi kam wan man blong faet, drong, mo mekem ol nogud fasin blong seks.

Long yia 2000, mi go stap wetem gelfren blong mi, Skolastique Kabagwira, mo mitufala i gat tri pikinini. Mi folem fasin we mi gruap long hem, se hem i mas nildaon long fored blong mi taem hem i talem halo, o taem hem i wantem askem samting. Mo tu, mi gat tingting se olgeta samting blong famle oli blong mi nomo, mo mi save mekem olsem we mi wantem long olgeta. Mi stap goaot long naet, mo plante taem mi kambak drong long tri klok long moning. Mi kilim doa, mo sipos Skolastique i tekem taem blong openem doa, mi kilim hem.

Long taem ya, mi wok olsem wan bos long wan kampani blong sekiuriti, taswe mi kasem gudfala pei. Skolastique i traem pulum mi blong mi joen wetem hem long Pentekostal jos, from we hem i ting se samting ya bambae i jenisim fasin blong mi. Be mi no wantem. Mi stat blong fren wetem wan narafala woman, ale Skolastique i tekem trifala pikinini, mo oli go stap wetem mama mo papa blong hem.

Wan olfala fren blong mi i tok long mi from rabis fasin we mi stap mekem, i talem se mi mas gobak long Skolastique. Hem i talem se i no stret we mi seraot long ol naesfala pikinini blong mi. Taswe long 2005, mi lego dring, mi aot long narafala woman ya mo mi gobak long Skolastique. Mitufala i mared long 2006. Be mi gohed blong tok nogud long hem mo kilim hem.

Long 2008, wan Witnes blong Jehova, nem blong hem Joel, i kam long haos blong mi, mo mi lesin long hem. Hem wetem wan narafala brata, Bonaventure, i kam luk mi blong plante manis, mo mifala i tokbaot Baebol. Mi askem plante kwestin, speseli long buk blong Revelesen. Mi stap traem blong pruvum se ol Witnes oli rong. Wan kwestin we mi askem se: ?Olsem wanem “bigfala hip blong ol man” we Revelesen 7:9 i tokbaot bambae oli laef long wol, from we vas ya i talem se oli “stap stanap long fored blong bigfala jea blong [God], mo long fored blong Smol Sipsip” Jisas Kraes? Joel i soemaot longfala tingting mo i ansarem kwestin blong mi. Hem i soem Aesea 66:1, we God i talem se wol ya i olsem ‘ples blong hem i putum leg blong hem antap long hem.’ Taswe bigfala hip blong ol man i stap stanap long fored blong jea blong God, nating se i stap long wol. Mo tu, mi ridim Ol Sam 37:29, we i talem se ol stret man bambae oli laef long wol gogo i no save finis.

Afta we sam taem i pas, mi agri blong stadi Baebol. Ale Bonaventure i mekem Baebol stadi long mi mo Skolastique. Taem mi gohed blong stadi, mi wantem jenisim laef blong mi. Mi lanem blong soemaot respek long waef blong mi. Mi no moa mekem hem i nildaon long fored blong mi blong talem halo o taem hem i wantem samting. Mo mi no moa ting se evri samting blong famle i blong mi nomo. Mo tu, mi no moa wajem ol muvi blong faet. I had blong mi mekem ol jenis ya, mi mas bos long tingting blong mi mo mekem tingting i stap daon.

Sam yia bifo, mi tekem fasbon pikinini blong mi, Christian, i go stap wetem famle blong mi long Uganda. Be taem mi ridim Dutronome 6:4-7, mi kasem save se God i givim wok long mi mo waef blong mi blong lukaot long ol pikinini blong mitufala, mo blong tijim olgeta long ol samting we God i wantem. !Mitufala mo boe blong mitufala i glad tumas taem mitufala i go tekem hem i kambak long haos!

Mi kasem save se Jehova i gat sore, mo mi bilif se hem i fogivim mi from ol nogud fasin mo tingting we mi gat bifo. Mi glad tumas se Skolastique i joenem mi blong stadi Baebol. Mitufala i givim laef blong mitufala long Jehova mo mitufala i baptaes long sem dei, hemia 4 Disemba, 2010. Naoia mitufala i trastem mitufala, mo mitufala i glad blong folem ol rul blong Baebol long famle. Waef blong mi i glad se mi kamhom afta we mi finis wok. Hem i glad tu se mi kaen mo mi respektem hem, mi mekem desisen blong lego strong dring, mo mi no moa wan rabis man. Long 2015, mi kam wan elda mo mi givhan blong lukaot long kongregesen. Tri long ol faef pikinini blong mitufala oli baptaes finis.

Taem mi stat blong stadi Baebol wetem ol Witnes blong Jehova, mi no agri nomo long ol samting we mi lanem, be mi pruvum mi wan. Mi laekem tumas taem oli yusum Baebol blong ansarem ol kwestin blong mi. Sloslo, mi mo Skolastique i luksave se ol man we oli talem se oli wosipim trufala God, oli mas folem ol tok blong hem, i no ol samting we olgeta nomo oli wantem. Mi talem tangkiu tumas long Jehova, we hem i pulum mi mi kam long hem mo long bigfala famle blong ol brata mo sista. Taem mi tingting bak long laef blong mi, mi luksave se God i save halpem eni man we i wantem mekem God i glad, blong i jenisim laef blong hem.