“Mifala i harem se i no gat wan samting nating we i mekem mifala i harem nogud, tingting blong mifala i klin gud nomo. Mo mifala i wantem tumas we oltaem mifala i stap mekem i stret nomo.”—Hibrus 13:18.

Grik tok we oli yusum long olfala Baebol blong talem “mekem i stret,” i min se “fasin we i gud tumas.”

Ol Kristin oli tinghevi long ol tok ya we God i pulum Pol blong raetem se: “Mifala i wantem tumas we oltaem mifala i stap mekem i stret nomo.” ?Olsem wanem blong mekem i stret?

Evri moning, yumi luk yumi long glas bifo we yumi goaot. ?From wanem? From we yumi wantem se yumi luk naes. Be i gat wan samting we i moa impoten i bitim klos mo hea blong yumi. Ol fasin nao oli mekem se yumi naes no yumi no naes.

Baebol i talem se tingting blong yumi i pulum yumi oltaem blong mekem samting we i no stret. Jenesis 8:21 i talem se, stat taem yumi smol pikinini nomo, tingting blong yumi i stap long ol rabis fasin. Taswe, blong mekem i stret oltaem, yumi mas agensem ol tingting we oli pulum yumi blong mekem samting we i nogud. Aposol Pol i tokbaot klia, olsem wanem hem i stap faet agens long sin, i se: “Mi glad tumas long Loa ya blong God. Be mi luk we rabis fasin ya, we i stap wok long laef blong mi, hem i narafala. Hem i agens long Loa ya. . . . Fasin ya i stap mekem mi, mi olsem slef blong fasin blong sin, we i stap wok oltaem long tingting blong mi.”—Rom 7:22, 23.

Yu traem tingbaot. Taem tingting blong yumi i pulum yumi blong giaman no stil, yumi no nid blong folem tingting ya, olsem we yumi slef blong hem. Yumi save jus. Sipos yumi blokem nogud tingting ya, bambae yumi mekem i stret, nating se ol man raonabaot long yumi oli stap giaman mo stil.

Blong mekem i stret oltaem, yumi mas folem sam rul. Sore tumas, plante man oli spenem moa taem blong tingbaot klos we bambae oli werem, i bitim we oli tingbaot ol gudfala rul we oli mas folem. From we oli no folem ol gudfala rul, oli ting se i oraet nomo blong giaman smol no blong stil smol, blong kamaot long wan trabol. Buk ya (The (Honest) Truth About Dishonesty) i talem se: “Ol narafala oli luk yumi olsem ol gudfala man, mo yumi no wantem spolem gudnem ya we yumi gat. Taswe yumi giaman no stil smol nomo.” ?Wanem tingting blong yu? ?I gat ol gudfala rul we yumi save yusum blong skelem fasin blong yumi? Yes i gat.

Plante milian man oli luk se Baebol i givhan gud long olgeta. Ol rul blong Baebol oli stret gud. (Ol Sam 19:7) Baebol i givim advaes we yumi save trastem, long ol samting olsem famle, wok, ol fasin, mo wosip. Longtaem finis i kam, ol man oli luk se ol advaes blong Baebol i beswan. Ol loa  blong hem oli stret long ol man blong evri kantri, laen, mo kala. Sipos yumi stadi Baebol, tingting dip long hem, mo folem ol advaes we hem i givim, yumi save kam wan man we i mekem i stret oltaem.

Be i no naf blong save Baebol nomo. Wol ya i fulap long ol rabis fasin, taswe i isi nomo blong folem ol nogud fasin ya. Yumi mas prea long God, blong i givhan long yumi. (Filipae 4:6, 7) Sipos yumi mekem olsem, bambae yumi no fraet blong stanap strong long stret fasin, mo blong stap longwe long fasin blong giaman mo stil.

Hitoshi we yumi tokbaot finis, i kasem blesing from we hem i no giaman mo stil long ples blong wok. Naoia Hitoshi i wok blong wan bos we i glad long hem from we i no giaman mo stil. Hitoshi i talem se: “Mi glad blong faenem wan wok we i givhan long mi blong mi holem tingting we i klin.”

Plante narafala tu oli luk se samting ya i tru. Yu traem tingbaot sam long olgeta we oli kasem blesing, from we oli folem rul blong Baebol blong mekem i stret oltaem.

• Tingting i Klin

  Wan woman we i stap long Aerlan, nem blong hem Sheril, i talem se: “Mi mi lego skul taem mi gat 13 yia, mo mi go wok wetem ol man blong stil. Bighaf blong mane blong mi, mi kasem taem mi stil. Biaen, mi mared, mo mitufala i stadi Baebol wetem ol Witnes blong Jehova. Mitufala i lanem se Jehova * i no laekem nating ol man blong stil, taswe mitufala i lego fasin ya. Long 1990, mitufala i givim laef blong mitufala i go long Jehova mo baptaes, blong kam Witnes blong Jehova.”—Ol Proveb 6:16-19.

  “Bifo, haos blong mi i fulap long ol samting we mi stilim. Be naoia i no moa gat. Hemia i mekem se tingting blong mi i klin. Taem mi tingtingbak long ol yia we i pas, mi talem bigfala tangkiu long Jehova from we hem i sore long mi. Evri naet, taem mi slip, mi save se Jehova i glad long mi. Hemia i mekem mi mi harem gud tumas.”

  Wan man Hong Kong, nem blong Sani, i talem se: “Wan kastoma i wantem pem mi blong mi mekem samting we i no stret. Taem bos blong mi i faenemaot se mi no tekem mane ya, hem i talem se: ‘!God blong yu i mekem se yu yu wan gudfala man! Mifala i glad tumas se yu wok long ples ya.’ From we mi no giaman mo stil, tingting blong mi i klin. Mo mi save givhan long famle blong mi mo ol narafala blong olgeta tu oli gat gudfala fasin ya.”

• Pis Long Tingting

  Tom, we i stap long Amerika, i talem se: “Wok blong mi i blong givhan long bos blong wan bigfala bang. Plante man we oli wok long bang ya, oli ting se i oraet nomo blong giaman mo stil, sipos fasin ya i mekem bisnes i kam antap. Be mi mi no save giaman mo stil. Mi no wari sipos oli sakemaot mi long wok ya. Taswe, mi mi gat pis long tingting blong mi. Ol bos blong mi oli save se bambae mi no giaman long olgeta, mo bambae mi no giaman blong givhan long olgeta tu.”

• Glad

  Wan woman Japan, nem blong hem Kaori, i talem se: “Long ples blong wok sam samting i lus, mo maneja i talem long mi se mi mas giaman. Taem bos i faenemaot ol man we oli stil, hem i talem tangkiu long mi from we mi no giaman. Long wol ya we i fulap long giaman mo stil, yu mas gat strong tingting blong no joen long ol fasin ya. Mo sipos yu no giaman mo stil, ol narafala bambae oli trastem mo respektem yu.”

Tingting i klin, pis long tingting, mo glad, hemia ol blesing we oli soemaot se i moagud yumi no giaman mo stil. ?Yu ting se i tru?