Yu traem tokbaot smol long saed blong yu.

Papa blong mi i stap wokem ol sus. Mama blong mi i stap wok long fam. Be mi mi wantem kam wan saentis. Mi intres tumas long ol naesfala flaoa, ol pijin, mo ol smosmol bebet we oli stap raonabaot long haos blong mifala. Mi kasem save se man we i wokem ol samting ya, hem i waes moa i bitim ol man.

?Hemia i min se yu yu bilif finis se i gat wan God we i mekem olgeta samting?

Nogat. Taem mi pikinini nomo, mi stat blong gat tingting we i hafhaf long saed blong God. Papa blong mi i kasem hatatak nao i ded. Long taem ya, mi stap askem se: ‘?From wanem God ya we i wokem plante naesfala samting, hem i letem ol man oli safa mo oli ded?’

?Save blong saens i givhan long yu blong faenem ansa blong kwestin ya?

Long stat, nogat. Be taem mi mekem wok ya blong stadi long ol laef samting, mi stat blong stadi long ol sel we oli stap ded. Mi wantem faenemaot from wanem i gat wan taem we ol sel blong bodi blong yumi oli stap ded. Hemia i defren olgeta long ol sel we wan samting i rong long olgeta nao oli no moa wok gud. Save ya i impoten tumas long helt blong yumi, be longtaem finis i kam, ol saentis oli no intres long hem.

?Save long saed blong ol sel ya i impoten olsem wanem?

I gat plante plante milian smosmol sel we oli joen wanples blong mekem bodi blong yumi. Olgeta sel ya evriwan oli gat prapa taem blong olgeta blong ded, mo ol niuwan oli tekem ples blong olgeta. Samfala oli laef kasem wan wik, mo sam narafala oli laef blong sam yia. I mas gat wan samting we i kontrolem gud fasin blong bodi blong yumi blong wok, blong mekem se taem ol sel oli ded, be i gat ol narafala sel we oli tekem ples blong olgeta.

 ?Wanem trabol i save kamaot sipos ol sel ya oli no ded?

Sam stadi i soemaot se taem ol sel ya oli no ded long prapa taem blong olgeta, man i save kasem sik ya we bun i soa long taem blong kolkol, no i kasem kansa. Be taem ol sel ya oli ded bifo long prapa taem blong olgeta, man i kasem sik ya we ol smosmol string long bodi blong hem i no moa wok gud (Parkinson), no bren blong hem i no moa wok gud (Alzheimer). Ol stadi we mi mekem long saed blong ol sel, oli joen tu wetem wok ya blong faenemaot rod blong winim ol sik ya.

?Stadi ya i mekem wanem long yu?

Blong talem stret, stadi ya i mekem mi konfius. Nambawan wok ya blong ol sel, i soemaot se i mas gat wan man we i wokem samting ya, mo man ya i wantem se bodi blong yumi i stap gud oltaem. Be kwestin blong mi i stap yet se: ‘?From wanem ol man oli stap safa mo oli ded?’ Mi no save faenem ansa blong kwestin ya.

Be yu bilif se i gat wan man i mekem se ol sel ya oli ded long prapa taem blong olgeta.

Yes. Wok we ol sel ya oli mekem, i bigwan tumas mo man i no naf blong kasem save long hem. Be fasin blong olgeta blong wok i naes tumas. Hemia i soemaot se man we i wokem ol sel ya, hem i waes we i waes. Mi bilif se hem i waes blong God. Mi mi yusum strong glas blong stadi long ol defdefren fasin blong wok we ol sel ya oli stap mekem, blong wok blong olgeta i gohed gud. Sipos oli kasem prapa taem blong olgeta blong ded, ale olgeta nomo oli mekem wan samting we i mekem se long sam seken nomo, oli ded. Ol sel ya nomo oli mekem se oli stap ded long prapa taem blong olgeta. Mi mi sapraes tumas blong luk samting ya. Man we i mekem samting ya hem i gat bigfala waes.

Yu bin askem sam kwestin long saed blong God, mo se from wanem man i safa. ?Yu faenem ansa blong yu olsem wanem?

Long 1991, tu Witnes blong Jehova tufala i kam long haos blong mi, mo mi askem long tufala se from wanem ol man oli stap ded. Tufala i soem ansa long Baebol we i talem se: “Wan man nomo i statem fasin blong sin long wol ya. Mo from we hem i mekem sin, hem i ded.” (Rom 5:12) Sipos fas man i bin obei long God, bambae hem i laef blong olwe. Kwiktaem nomo mi kasem save se samting ya i laenap wetem stadi we mi mekem long ol sel. Mi kasem save se God i no wantem we ol man oli ded. I klia se man i save laef blong olwe from we klosap olgeta sel long bodi blong yumi oli stap ded, mo oltaem i gat ol niuwan oli tekem ples blong olgeta.

?Wanem i pruvum long yu se Baebol i tok blong God?

Mi lanem samting we Baebol i talem long saed blong God long Ol Sam 139:16, we i talem se: ‘Taem mi mi no bon yet, be yu yu luk mi finis, mo [“olgeta haf blong bodi blong mi,” King James Version] yu yu raetemdaon olgeta finis long buk blong yu.’ Mi mi stap stadi long ol smosmol save we oli stap insaed long ol sel long bodi blong yumi, i olsem se oli raetem ol save ya long wan buk. ?Be olsem wanem man we i raetem Sam ya, i save long saed blong buk ya? Taem mi stap kasem save moa long ol tok blong Baebol, mi bilif strong se hem i Tok blong God.

?Wanem i givhan long yu blong yu kasem save samting we Baebol i tijim?

Mi mi stadi Baebol wetem wan Witnes blong Jehova. Long taem ya nao mi kasem save from wanem God i letem ol man oli stap safa. Mo tu, mi lanem se God “bambae i mekem we ded bambae i go lus olgeta.” (Aesea 25:8) Bambae i isi nomo long God blong i mekem bodi blong yumi i wok long fasin we i stret gud olgeta, blong yumi save harem gud long laef blong olwe.

?Yu yu mekem wanem blong givhan long ol narafala wetem save ya blong Baebol?

Long 1995, mi mi kam wan Witnes blong Jehova. Stat long taem ya, mi talemaot ol samting we mi lanem long Baebol long ol narafala. Wan taem, wan fren blong mi long wok i harem nogud bitim mak from we brata blong hem i kilim hem wan i ded. Long jos blong hem, oli tijim se God i neva fogivim man we i kilim hem wan i ded. Be mi mi soem gudfala promes ya blong Baebol long hem, long saed blong laef bakegen. (Jon 5:28, 29) Hem i harem gud tumas blong lanem se God ya we i mekem olgeta samting, hem i kea long yumi. Long ol taem olsem, mi harem se fasin ya blong serem trutok blong Baebol wetem ol narafala, i mekem mi harem gud moa i bitim we mi tokbaot saens.