Ol Wok blong ol Aposol 11:1-30
11 Nao ol aposol mo ol brata we oli stap long Judia oli harem nius se ol man blong ol narafala nesen tu oli akseptem tok blong God.
2 Ale, taem Pita i kam long Jerusalem, ol man we oli sapotem fasin ya blong mekem sakomsaes,+ oli tok agensem hem,*
3 oli se: “Yu yu go insaed long haos blong ol man we oli no sakomsaes, mo yu kakae wetem olgeta.”
4 Nao Pita i stat blong eksplenem gud evri samting long olgeta, i se:
5 “Taem mi stap long Jopa, mi stap prea nao mi luk wan vison. Mi luk wan samting we i olsem wan bigfala kaliko we i gat fo kona blong hem, i stap kamdaon. I olsem se sam man oli holem ol fo kona blong kaliko ya mo oli stap slakem i kamdaon, mo i kam stret long mi.+
6 Taem mi lukluk gud insaed long hem, mi luk ol animol blong graon we oli gat fo leg, mo ol animol olsem snek mo lised,* mo ol pijin blong skae.
7 Mo mi harem wan voes i talem long mi se: ‘!Pita, yu girap! !Yu kilim ol animol ya mo yu kakae!’
8 Be mi talem se: ‘Nogat Masta. Mi mi neva kakae wan samting we i doti mo we i no klin long fes blong God.’
9 Nao voes ya long heven, i toktok namba 2 taem, i se: ‘Ol samting we God i mekem oli klin finis, yu stop blong talem se oli doti.’
10 Samting ya i hapen namba 3 taem bakegen, nao oli pulum evri samting ya i gobak antap long heven.
11 Mo stret long taem ya, tri man oli kamtru long haos ya we mifala i stap long hem, olgeta long Sisaria oli sanem trifala i kam from mi.+
12 Nao spirit i talem long mi blong mi go wetem olgeta, mo mi no mas gat tu tingting. Be ol sikis brata ya tu oli kam wetem mi, mo mifala i go insaed long haos blong man ya.
13 “Man ya i talem long mifala se hem i luk wan enjel long haos blong hem we i talem long hem se: ‘Yu sanem sam man i go long Jopa blong oli singaot Saemon ya we oli kolem hem se Pita, i kam.+
14 Hem bambae i talemaot ol samting we bambae i sevem yu mo olgeta evriwan we oli stap long haos blong yu.’
15 Be taem mi stat blong toktok, tabu spirit i kamdaon long olgeta, stret olsem we i bin kamdaon long yumi fastaem.+
16 Nao mi tingbaot tok ya we Masta i stap talem oltaem, i se: ‘Jon i baptaesem ol man long wota,+ be yufala bambae yufala i baptaes long tabu spirit.’+
17 Sipos God i givim presen ya we i fri nomo long olgeta, olsem we i bin givim long yumi ya we yumi bilif long Masta Jisas Kraes, mi mi no naf blong blokem hem.”*+
18 Taem olgeta oli harem samting ya, oli no moa toktok,* mo oli leftemap God, oli se: “Samting ya i min se God i letem ol man blong ol narafala nesen blong olgeta tu oli save tanem tingting blong olgeta, blong oli kasem laef.”+
19 Olgeta we oli go wanwan olbaot+ long taem blong bigfala trabol ya we i kamaot from Steven, oli go kasem Fonisia, mo Saepras, mo Antiok, oli stap prij be oli prij long ol man Jiu nomo.+
20 Be sam long olgeta we oli blong Saepras mo Saerin, oli kam long Antiok mo oli stat blong toktok long ol man we oli toktok lanwis Grik, oli stap talemaot gud nius blong Masta Jisas long olgeta.
21 Mo tu, han blong Jehova* i stap wetem olgeta, mo plante moa man oli bilif mo oli kam man blong Masta.+
22 Nao nius blong olgeta i kam kasem kongregesen long Jerusalem, ale oli sanem Banabas+ i go long Antiok.
23 Taem hem i kamtru long ples ya, hem i luk we God i kaen tumas long ol man ya, nao hem i glad tumas mo i talem ol gudfala toktok blong pulum olgeta evriwan blong oli gohed blong mekem wok blong Masta wetem strong tingting.+
24 Banabas i wan gudfala man mo tabu spirit i fulap long hem, mo bilif blong hem i strong. Nao from samting ya, wan bigfala hip blong man oli kam joen long Masta.+
25 Biaen hem i go long Tasas, mo i lukaotem Sol long evri ples.+
26 Taem hem i faenem hem, hem i tekem hem i go long Antiok. Nao long wan fulyia, tufala i stap joen wetem olgeta long kongregesen, mo tufala i tijim wan hip blong ol man we oli plante lelebet. Long Antiok, God i pulum ol man blong oli kolem ol disaepol se ol Kristin, mo hemia fas taem we nem ya i kamaot.+
27 Long ol dei ya, ol profet+ oli aot long Jerusalem oli kam long Antiok.
28 Wan long olgeta we nem blong hem Agabus,+ i stanap, mo tabu spirit i pulum hem blong i talemaot se i no longtaem, kakae bambae i sot bigwan long olgeta ples long wol.+ Samting ya i kamtru long taem we Klodias i rul.
29 Nao ol disaepol oli mekem desisen se olgeta wanwan bambae oli givim samting we oli naf blong givim,+ blong oli sanem i go long ol brata we oli stap long Judia, blong givhan long olgeta.+
30 Nao oli mekem olsem, mo oli givim long Banabas mo Sol blong tufala i karem i go long ol elda longwe.+
Ol futnot
^ NT: “oli agiu wetem hem.”
^ NT: “ol animol we oli krol.”
^ NT: “?Mi mi hu blong mi stanap blokem rod blong God?”
^ NT: “oli no moa agensem hem.”
