Leta i go long Jemes 2:1-26
2 Ol brata blong mi, yufala i stap bilif long bigfala Masta blong yumi Jisas Kraes, mo long semtaem yufala i stap mekem i gud moa long samfala be yufala i luklukdaon long ol narafala, ?i tru?+
2 Sipos tu man i kam joen long miting blong yufala, we wan long tufala i putum gol ring long fingga blong hem mo klos blong hem i flas gud, be narawan i wan puaman we klos blong hem i brobrok,
3 ?bambae yufala i glad long man ya we klos blong hem i flas gud mo yufala i talem long hem se: “Yu kam sidaon long gudfala ples ya,” be yufala i talem long puaman ya se: “Yu stanap fastaem” o “Yu kam sidaon long floa”?+
4 Sipos yufala i stap mekem olsem, ?yufala i no ting se yufala i stap mekem i gud moa long samfala be yufala i luklukdaon long ol narafala?+ ?Mo yufala i ting se yufala i stap jajem man long fasin we i stret?+
5 Ol gudfala brata blong mi. Yufala i lesin gud. God i jusumaot olgeta we ol man oli luk se oli puaman, blong mekem olgeta oli kam rijman long fes blong hem from bilif blong olgeta.+ Mo hem i jusumaot olgeta blong oli kasem Kingdom ya we hem i promes blong givim long ol man we oli lavem hem.+
6 Be yufala i stap luk ol puaman olsem rabis nomo. ?Be hu ol man ya we oli stap mekem i strong tumas long yufala? ?Hu ol man ya we oli stap pulum yufala i go long kot? ?I no ol rijman?+
7 ?Mo i no ol rijman we oli stap tok nogud long haenem ya we yufala i kasem?
8 Yufala i mekem i gud sipos yufala i obei long loa blong king we i stap long Baebol, we i talem se: “Yu mas lavem neba blong yu olsem we yu lavem yu wan.”+
9 Be sipos yufala i gohed blong mekem i gud moa long samfala be yufala i luklukdaon long ol narafala,+ yufala i stap mekem sin mo loa i soemaot se yufala i man blong brekem loa.+
10 Sipos wan man i obei long olgeta Loa be hem i mestem wan tok blong loa nomo, hem i kam wan man we i brekem olgeta Loa ya.+
11 Man ya we i talem se: “Yu no mas mekem adaltri,”*+ hem i talem tu se: “Yu no mas kilim man i ded.”+ Sipos yu no mekem adaltri, be yu kilim man i ded, yu yu kam wan man blong brekem loa.
12 Yufala i mas gohed blong talem mo mekem samting we i soemaot se yufala i luksave se God bambae i jajem yufala folem Loa ya we i mekem ol man oli fri.+
13 Sipos man i no gat sore long narafala, jaj tu bambae i no gat sore+ long hem taem i jajem hem. Fasin blong sore long man i hae moa long jajmen.
14 Ol brata blong mi. Sipos man i stap talem se hem i bilif be hem i no mekem ol gudfala wok, ?bambae hem i winim wanem?+ Bilif ya i no save sevem hem.+
15 Sipos eniwan long ol brata o sista oli no gat klos* mo oli no gat naf kakae blong wan dei,
16 nao wan long yufala i talem long olgeta se: “Yu no wari, yu go mekem yu wom mo yu kakae,” be hem i no givim ol samting we bodi blong hem i nidim, ?tok ya bambae i givhan long hem olsem wanem?+
17 Long sem fasin, sipos i no gat wok i go wetem bilif, bilif ya hem wan i ded.+
18 Be sam man bambae oli talem se: “Yu yu gat bilif, mo mi mi mekem ol gudfala wok. Oraet, yu traem soemaot bilif blong yu we i no gat wok i go wetem, mo mi bambae mi soemaot bilif blong mi we i gat wok i go wetem.”
19 ?Yu yu bilif we i gat wan God i stap? Hemia i gud. Be ol dimon tu oli bilif, mo oli stap seksek from.+
20 O man we i no gat hed nating. Man we i bilif be i no mekem wok we i joen wetem bilif ya, bilif blong hem i blong nating nomo. ?Yu wantem mi soemaot samting ya long yu?
21 Yu traem tingbaot samting we Ebraham i mekem. Hem i putum Aesak long olta blong givim hem i go long God, nao God i talemaot se hem i wan stret man from wok ya we hem i mekem.+
22 Taswe yu luk se bilif blong hem i laef from i joen wetem ol wok we hem i mekem, mo ol wok ya oli mekem bilif blong hem i kam stret gud.+
23 Mo samting ya i mekem tok blong Baebol i kamtru se: “Ebraham i bilif long Jehova,* nao Hem i luk hem olsem wan stret man,”+ mo Jehova* i singaot hem se fren blong hem.+
24 Yu luk se man i save kam stret man from ol wok we hem i mekem be i no from bilif nomo.
25 Long sem fasin, prostitut ya Rehab i glad nomo blong tekem tufala mesenja ya i kam long haos blong hem, mo i sanemaot tufala i go long narafala rod. Nao God i talemaot se hem i wan stret man from wok ya we hem i mekem.+
26 Bodi we i no gat spirit,* hem i ded.+ Mo long sem fasin, bilif we i no gat wok i go wetem, hem tu i ded.+
