Ukwafwa Bankomamatwi mu Indonesia
Mu Indonesia icalo umwafula ifilimwa mwaliba bankomamatwi abengi. Pa kwafwa aba bantu, Inte sha kwa Yehova balipekenye impapulo ishilanda pali Baibolo e lyo na programu ya kusambilisha abantu mu lulimi lwa bankomamatwi mu ciIndonesian. Abantu abengi balitasha sana pali ifi bacitile.
Ukulongana kwa Citungu mu Lulimi lwa Bankomamatwi
Mu 2016, Inte sha kwa Yehova mwi tauni ilikalamba ilya Medan mu citungu ca North Sumatra, balikwete ukulongana kwa citungu mu lulimi lwa bankomamatwi mu ciIndonesian. Umulanshi uulolekesha pa kucingilila abantu muli ici citungu alile kuli uku kulongana kabili alitashishe ba Nte pa kubikako programu ya kusambilisha abantu ukwabula ukulipilisha. Alitemenwe sana ica kuti aliile apali ibumba kabili alitendeke ukukonkeleshamo ilyo baleimba ulwimbo mu lulimi lwa bankomamatwi.
Maneja wa cikuulwa balonganinepo ukulongana kwa citungu atile, ukulongana kwa citungu “kwalipwa fye bwino. Kuti cawama sana nga ca kuti ba Nte batwalilila ukupekanya ukulongana kwa musango uyu ku kwafwa abanensu bankomamatwi.” Alandile no kuti ilyo umwine wa cikuulwa aishibe ukuti ukulongana kwa citungu kwali kwa bankomamatwi, “alefwaya ukucitila ba Nte ifisuma. E ico anjebele ukupekaninshisha [bonse 300] abasangilweko kuli uku kulongana ifya kulya.”
Batasha pa Mavidio Ayali mu Lulimi Lwaba Bankomamatwi
Inte sha kwa Yehova nabo balatandalila bankomamatwi uko basangwa ku kulanshanya nabo ifya mu Baibolo. Ba Nte ilingi line babomfya amavidio mu lulimi lwa bankomamatwi mu ciIndonesian ayo bapangile pa kuti abanensu abashumfwa baleba ne nsansa mu bumi bwabo. Ba Mahendra Teguh Priswanto inkonkani ku mukalamba wa kabungwe ka Indonesian Association for the Welfare of the Deaf mu musumba wa Semarang, mu Central Java batile “tulatasha sana pa mulimo mulebomba uwakwafwa bankomamatwi ne fyo mubabikako amano, ku ca kumwenako, vidio iitila Mu Lupwa Lwenu Kuti Mwaba Insansa isuma sana. Tukatasha sana nga mwatwalilila ukubomba uyu mulimo.”
“Baliba no Kutemwa”
Ba Yanti abanakashi bankomamatwi, balitemwa sana umulimo ba Nte babomba. Batile: “Ilingi line abantu balaseka bankomamatwi, lelo Inte sha kwa Yehova bena baliba no kutemwa. Ba Nte abengi abashili bankomamatwi balasambilila ululimi lwa bankomamatwi pa kuti baleyafwa bankomamatwi ukwishiba Kabumba wabo no kubafwa ukulacita ifingalenga baba ne nsansa. Nalitemenwe sana ukumona ifyo baipeelesha.”
Mu kupita kwa nshita ba Yanti baishileba Inte ya kwa Yehova kabili pali ino nshita balapilibula amavidio mu lulimi lwa bankomamatwi ulwa ciIndonesian. Ba Yanti batile: “Impapulo tupanga shilafwa abantu bamo abashaishiba sana ululimi lwa bankomamatwi ukwishiba bwino ulu lulimi. Kabili shilasambilisha na bantu ifya kuba ne nsansa no kulaikala bwino.”