Iyo. Inte sha kwa Yehova basumina ukuti Lesa e wapangile ifintu fyonse. Lelo tatwasumina ukuti abumbile umuulu ne calo mu nshiku 6 isha ma-awala 24. Mulandu nshi? Pantu te fyo Baibolo ilanda. Moneni ifya kumwenako fibili:

1.   Inshiku 6 isho apangilemo umuulu ne calo. Bamo batila inshiku 6 isho Lesa abumbilemo ifintu ni nshiku isha ma-awala 24. Lelo Baibolo nga yalanda pa bushiku, limo ninshi ilelanda pa ciputulwa ca nshita icikalamba sana.—Ukutendeka 2:4; Amalumbo 90:4.

2.   Imyaka iyapitapo apo icalo capangilwa. Bamo basambilisha ati, apo icalo capangilwa papita fye imyaka amakana ayanono. Lelo Baibolo itila, umuulu ne calo e ko fyali ilyo inshiku 6 isha kubumbamo ifintu shishilatendeka. (Ukutendeka 1:1) Kanshi Inte sha kwa Yehova balasumina filya abasambilila ifya sayansi balanda ukuti icalo calikala imyaka nalimo amabilioni.

 Nangu ca kutila Inte sha kwa Yehova shalisumina ukuti Lesa e wabumbile ifintu, tabakaana ifyo abasambilila sayansi balanda. Twalisumina ukuti ifyo sayansi ya cine ilanda, filalingana ne fyo Baibolo yalanda.