ICIPANDE ICIKALAMBA | KUTI MWAISHIBA IFYABA MU BAIBOLO
Cinshi Tulingile Ukwishibila Ifyaba mu Baibolo?
“Baibolo citabo ico abantu abengi baishiba. Na lyo line, ici icitabo tacacindama kuli ifwe fwe bena China.”—E fyalandile ba LIN, aba ku CHINA.
“Nangu ca kuti ndi mu Hindu, nalifilwa ukwishiba bwino ifyalembwa mu mabuuku yesu aya mushilo. Kanshi ne fyaba mu Baibolo fine te kuti mfishibe bwino bwino.”—E fyalandile ba AMIT, aba ku INDIA.
“Nalicindika Baibolo pantu citabo ca kale sana kabili nalyumfwa ukuti e citabo abantu abengi bashita sana, lelo ine, nshatalamonapo Baibolo.”—E fyalandile ba YUMIKO, aba ku JAPAN.
Abantu abengi mu fyalo ifyalekanalekana balomfwila ifyo Baibolo ilanda. Na lyo line, bamo finono ifyo baishiba pa fyaba mu Baibolo, e lyo bambi nabo tabaishibapo fye nangu fimo. Ifi fine e fyo caba na ku bantu abengi abekala mu Asia e lyo na mu fyalo ifingi umo Baibolo yasabankanishiwa sana.
Nalimo kuti mwayipusha amuti, ‘Mulandu nshi uo mfwile ukufwaila ukwishiba ifyaba mu Baibolo?’ Ukwishiba ifyaba muli ici icitabo ca mushilo, kuti kwalenga mwaishiba:
-
Ifyo mwingacita pa kuti muleba ne nsansa
-
Ifyo mwingacita nga muli na mafya mu lupwa
-
Ifyo mwingacefyako amasakamika
-
Ifyo mwingalaumfwana bwino na bantu bambi
-
Ifyo mwingalabomfya bwino indalama
Natulande pali ba Yoshiko, aba ku Japan. Ba Yoshiko tabaishibe ifyaba mu Baibolo, e ico batendeke ukulabelenga Baibolo. Cinshi cacitike? Ba Yoshiko batile: “Ifyo nalebelenga mu Baibolo fyalilenga naishiba ico twabela pano calo kabili fyalilenga naishiba ne fyo Lesa atulaya. Ukwishiba ifi, kwalenga naba ne nsansa.” Ba Amit abo tulandilepo kale, nabo balitendeke ukubelenga Baibolo. Batile: “Nalipapile ukusanga ukuti mu Baibolo mwaliba ifyebo ifingaafwa abantu bonse.”
Baibolo yalilenga imikalile ya bantu abengi ukuba bwino. E ico tulemukoselesha ukutendeka ukubelenga Baibolo pa kuti mukamone ifyo ingamwafwa.
