BA KINGSLEY balitendeke ilyashi lya kubelenga Baibolo ilyo babapampenshe pa cipeya. Uyu e wali umuku wa kubalilapo ukulanda ilyashi mwi Isukulu lya Butumikishi Ilya Bulesa. Ilyo balelanda ilyashi, baleshimbula bwino sana amashiwi. Nomba namwishiba, tabalelolesha muli Baibolo! Mulandu nshi?

Ba Kingsley abaleikala ku Sri Lanka, tabalemona no kumfwikisha, kabili baleendela pa ncinga ya balemana. Cali shani pa kuti basambilile pali Yehova no kulembesha mwi Sukulu lya Butumikishi Ilya Bulesa? Kamushimikileko ifyo cali.

Ilyo nakumene na ba Kingsley pa muku wa kubalilapo, nalipapile nga nshi ukumona ifyo balefwaisha ukusambilila Baibolo. Kwena balisambililepo na ba Nte abengi, kabili balikwete ne citabo balesambililamo icaleti Ukwishiba Uko Kutungulula ku Mweo wa Muyayaya ica mu filembo fya bashimona nangu ca kuti calyonaike sana. * Ba Kingsley balisumine ukutendeka ukusambilila Baibolo na kabili, lelo kwali amafya yabili ayo twakwete.

Ubwafya bwa kubalilapo bwa kuti, ba Kingsley baleikala mu cikuulwa umo basungila abakote na balemana, kanshi mwaleba sana icongo ica kuti ifi  bashaleumfwikisha, nalelandisha pa kulanshanya nabo. Nga tulesambilila, bonse mu cikuulwa bwaleumfwako pantu nalelandisha!

Ubwafya bumbi bwa kuti, twalesambilila fye ifyebo ifinono pantu ba Kingsley tabalebelenga sana kabili tabaleumfwa nga wabasambilisha ifingi. Kanshi pa kuti bomfwikishe isambililo, balepekanya sana. Balepituluka sana mwi sambililo no kubelengela libeela amalembo muli Baibolo ya filembo fya bashimona, kabili balepekanya ifyasuko mu mashiwi yabo. Ukucita ifi kwalelenga tulesambilila bwino sana. Nga tulesambilila, baleikala pa butanda ninshi nabalema na makunda, kabili pa kwasuka balecincimuka sana no kulandisha. Tapakokwele, twatendeke ukusambilila imiku ibili mu mulungu, kabili twalesambilila pa ma-awala yabili!

Ba Kingsley balitemenwe sana ukuya mu kulongana pa Ng’anda ya Bufumu nangu ca kuti caleyafya. Lyonse kwalefwaikwa abakubaninika pa ncinga yabo e lyo no kubekisha, abakubengisha muli motoka, mu Ng’anda ya Bufumu e lyo no kubafumya. E ico bamunyinefwe mu cilonganino baleyafwa ba Kingsley lyonse fye. Mu Ng’anda ya Bufumu, ba Kingsley baleikalila apaba spika pa kuti baleumfwikisha kabili baleyasukanapo!

Ilyo twatwalilile ukusambilila, ba Kingsley baishilelembesha mwi Sukulu lya Butumikishi Ilya Bulesa. Ilyo kwashele imilungu ibili ukuti balande ilyashi lya kubalilapo, nalibepwishe nga ca kuti balipekanya ilyashi. Batile: “Ee nalipekanya, kabili nalipitulukamo imiku 30.” Nalibatashishe pa fyo babikileko amano, kabili nabebele ukuti babelengemo na kabili pa kuti nkutikeko. Bakupukwile Baibolo yabo iya filembo fya bashimona no kutampa ukubelenga ukubomfya iminwe. Lelo nalimwene ukuti ilyo balebelenga, tabalebomfya iminwe nge fyo balecita lyonse. Balisungile icipande conse ico balebelenga!

Nalipapile sana ica kuti nalilukwishe ne filamba. Nalibepwishe icabafwile ukusungila icipande pa numa ya kupitulukamo pa miku fye 30. Banjaswike ati: “Mpitulukamo imiku 30 cila bushiku.” Ba Kingsley balipitulwike mu lyashi ukucila pa mweshi umo, e calengele ukuti basungile ilyashi lyonse.

Ubushiku bwa kulanda ilyashi ku Ng’anda ya Bufumu bwasukile bwafika. Ilyo ba Kingsley bapwishishe ukulanda ilyashi, aba mu cilonganino balitemenwe sana ica kuti balitootele icine cine, kabili abengi balilukwishe ne filamba. Nkashi umo uwalekele ukulandako amalyashi mu sukulu pa mulandu wa mwenso, aebele kangalila we sukulu ukuti amulembe mwi sukulu na kabili. Cinshi calengele? Uyu nkashi atile: “Ba Kingsley nga kuti balanda ilyashi, ninshi na ine wine kuti nalanda!”

Pa numa ya kusambilila Baibolo pa myaka mupepi na itatu, ba Kingsley baliipeele kuli Yehova kabili balibatishiwe pa 6 September, 2008. Ba Kingsley balitwalilile ukubombela Yehova ne cishinka ukufikila ilyo bafwile pa May 13, 2014. Ilyo tabalafwa, balicetekele ukuti Lesa akaleta Paradaise pano calo, umo akabondapa kabili bakatwalilila ukumubombela ne cishinka. (Esa. 35:5, 6)—Abashimika ili lyashi ni ba Paul McManus.