Bushe mulafulilwako ilyo mwapwisha ukulanshanya na bena mwenu pa bwafya mukwete? Nga mulafulilwako, ninshi kuti mwacitapo fimo. Mulingile ukwishiba ukuti inshila abanakashi balandilamo ifintu yalipusana ne nshila abaume balandilamo ifintu. *

Abanakashi balitemwa ukulanda pa bwafya ilyo tamulabeba ifya kubupwisha. Na kuba limo ico bafwaya fye kulanda pa bwafya epela, ninshi no bwafya bwapwa.

“Ndatemwa nga ca kuti nalanda ifyo ndeumfwa kabili namona no kuti abena mwandi nabeshiba ifyo ndeumfwa. Nga nabalondolwela, ilyo line fye cilafuma ku mukoshi.”—E fyalandile ba Sirppa. *

“Ndafilwa ukulaba ku bwafya nkwete nga nshebeleko abena mwandi ifyo ndeumfwa. Ndaleka ukusakamana nga nalanda pa bwafya nkwete.”—E fyalandile ba Ae-Jin.

“Nga ndelanda, ciba kwati ni filya abafwailisha pa milandu bacita, pantu ilyo ndelanda ndafwailisha pa kuti imone icacilenga kube ubwafya.”—E fyalandile ba Lurdes.

Abaume batemwa ukutontonkanya pa fya kupwisha ubwafya. Ukucita ifi takwabipa pantu abaume bomfwa kwati nga bapwisha ubwafya ninshi baleyafwa abena mwabo kabili bamona kwati nga bacita ifi, ninshi abena mwabo kuti babacetekela. Kanshi abaume cilabapapusha nga ca kuti abena mwabo tabatemenwe ilyo baleyesha ukubafwa ukupwisha ubwafya. Ba Kirk batile: “Nshishibe ico umuntu engafwaila ukuti tulande pa bwafya nga ca kuti talefwaya ukumwafwa.”

Icitabo icitila The Seven Principles for Making Marriage Work cilanda ukuti: “Mufwile ukwishiba ifyo abena mwenu baleumfwa ilyo mushilabeba ifya kucita. Mulingile ukuleka abena mwenu bamona ukuti namwishiba bwino ifyo baleumfwa kabili mulingile ukubalanga ukuti namumfwa ububi pa bwafya  bakwete ilyo mushilabeba ifya kucita. Ilingi line, abena mwenu nga bamulondolwela fimo ninshi tabalefwaya mubebe ifya kucita, lelo balefwaya fye mukutike ku fyo balelanda.”

Mwe balume: Mulebikako amano nga ca kuti abena mwenu balelanda. Ba Tomás batile: “Inshita shimo nga nakutika ku fyo umwina mwandi alelanda, ndatontonkanya nati, ‘Kwena tapali nangu cimo ico nacita.’ Lelo umwina mwandi acilafwaya fye ukuti nkutike.” Ba Stephen nabo batile: “Umwina mwandi alomfwa bwino nga alanda fyonse ifilemusakamika ukwabula ukumucilinganya, kabili nga nacita ifi alanjeba ukuti alomfwako bwino.”

Esheniko ukucita ifi: Ilyo mukalanshanya pa bwafya mukakwata na bena mwenu, mwikangufyanya ukubeba ifya kucita. Mukalebalolesha ilyo balelanda, kabili mukalebikako amano nga balelanda. Mukalebasuminisha ku mutwe. Kuti mwabwekeshapo amashiwi yamo ayo balandile pa kuti bamone ukuti namumfwa ifyo balelanda. Ba Charles batile: “Limo umwina mwandi afwaya fye ukwishiba ukuti ninjishiba ifyo aleumfwa no kuti ndefwaya ukumwafwa.”—Ilembo ilingamwafwa: Yakobo 1:19.

Mwe bakashi: Mulingile ukulanda ifyo mulefwaya abena mwenu bacite. Ba Eleni batile, “Tumona kwati abena mwesu kuti baishiba fye fyonse ifyo tulefwaya, nomba limo pa kuti beshibe kano twabalondolwela.” Ba Ynez nabo batile: “Limo kuti walanda fye ati, ‘Kuli fimo ifilencusha kabili ndefwaya fye ukuti mumfwe ifyo ndemweba. Nshilefwaya ukuti munjebe ifya kucita, lelo ndefwaya fye ukuti mwishibe ifyo ndeumfwa.’”

Esheniko ukucita ifi: Nga ca kuti abena mwenu bamweba ifya kucita pa kupwisha ubwafya ilyo mushilapwa ukulanda, mwikatontonkanya ukuti tababika amano ku fyo mumfwa. Nalimo icilenga ni co balafwaisha ukumwafwa. Ba Ester batile, “Mu nshita ya kufulwa, ndamona ukuti abena mwandi balintemwa kabili balafwaya ukukutika, lelo ndeshiba no kuti ico bafwaisha kungafwa.”—Ilembo ilingamwafwa: Abena Roma 12:10.

Ku baupana: Ilingi line tucitila bambi ifyo twingatemwa batucitile, lelo ilyo mulelanshanya pa mafya na bena mwenu mufwile ukutontonkanya pa fyo abena mwenu bengatemwa ukuti mucite. (1 Abena Korinti 10:24) Ba Miguel batile: “Nga muli balume, mulingile ukulakutika ku fyo abena mwenu balelanda. Nga muli bakashi, inshita shimo mufwile ukulakutika nga ca kuti abena mwenu balemweba ifya kucita pa kupwisha ubwafya. Nga ca kuti bonse mulecita ifi, icupo cenu cikawama.”—Ilembo ilingamwafwa: 1 Petro 3:8.