Ukutasha kwalicindama sana pa kuti icupo citwalilile ukubako. Na lyo line, abaupana abengi balaleka ukubika amano ku fintu ifisuma ifyo abena mwabo bacita kabili balaleka no kutasha abena mwabo. Mu citabo citila Emotional Infidelity, umuntu umo uupandako amano abaupana asangile ukuti abaupana abengi abaya mu kupandwa amano “babika sana amano pa fyo abena mwabo bashicita mu cupo ukucila pa fyo bacita. Nga baisa mu kumona, tabalanda pa fisuma ifyo abena mwabo bacita, lelo balanda fye pa fibi. Abaupana abacita ifya musango uyu tabalanga ukuti balitemwa abena mwabo pantu tababatasha pa fyo bacita.”

Finshi mulingile ukucita na bena mwenu pa kuti mulelanga ukuti mulatasha?

Ukutasha kuti kwacefyako amafya mu cupo. Nga ca kuti abaupana balebika amano ku fisuma ifyo abena mwabo bacita kabili balebatasha, icupo cabo kuti cawaminako. Nangu fye mafya ayakalamba kuti yacepako nga ca kuti abaupana baletasha abena mwabo.

Abakashi. Icitabo tulandilepo kale icitila Emotional Infidelity cilanda ukuti: “Abanakashi abengi tabatasha pa fyo abena mwabo babombesha pa kuti balepeela ulupwa lwabo ifyo lukabila.” Mu fyalo fimo amafya ya musango uyu yalaba na mu ndupwa umo abalume na bakashi babomba.

Abalume. Ilingi line, abaume tababika amano ku fyo abena mwabo babombesha ukusakamana aba mu ng’anda, ukusunga abana, e lyo no kubomba imilimo ya pa ng’anda. Ba Fiona, * abo papitile imyaka itatu apo baupiilwe batile: “Bonse tulalufyanya, kabili nga nalufyanya ndomfwa sana ububi. Kanshi abena mwandi nga bantasha pa fyo nacibomba bwino imilimo ya pa ng’anda, ndamona ukuti bacili balintemwa nangu ca kuti ndalufyanya. Ici cilalenga ndemona no kuti balantungilila kabili ndaba sana ne nsansa.”

Lelo nga ca kuti umulume nelyo umukashi tatasha umwina mwakwe pa fyo acita, icupo cabo te kuti cikose. Ba Valerie batile: “Nga ca kuti abena mobe tabalekutasha, kuti watendeka ukutemwa umuntu umbi uukutasha.”

Mulebika amano ku fisuma ifyo abena mwenu bacita. Mu mulungu ukonkelepo, mukalebika amano ku mibele iisuma iya bena mwenu. Na kabili mukalebika na mano ku fintu ifyo nalimo mushibikako amano ifyo abena mwenu bacita pa kuti ifintu pa ng’anda fileba bwino. Pa mpela ya mulungu, mukalembe (1) imibele iyo mwatemwa mu bena mwenu na (2) ifintu ifisuma ifyo abena mwenu bacitile ifyalengele ifintu pa ng’anda fibe bwino.—Ilembo ilingamwafwa: Abena Filipi 4:8.

Cinshi ukubika amano ku fisuma ifyo abena mwenu bacita kwacindamina? Ba Erika batile: “Nga papita imyaka ukutula apo mwaupanine, kulaba ukuleka ukubika amano ku fisuma ifyo abena mobe bacita, lelo kuba ukubika sana amano ku fyo balufyanya.”

Muleyipusha amuti: ‘Bushe nalileka ukutasha abena mwandi pa fyo babombesha?’ Ku ca kumwenako, nga ca kuti abalume benu balalungisha ifileonaika pa ng’anga, bushe mulafilwa ukubatasha pa mulandu wa kuti mumona ukuti mulimo wabo ukucita ifyo? Nga ca kuti muli balume, bushe tamutasha abena mwenu pa fyo babombesha ukusunga abana pa mulandu wa kuti mumona ukuti mulimo wabo ukucita ifi? Muleesha ukubika amano ku fintu ifikalamba ne finono ifyo abena mwenu bacita ifilenga ifintu mu lupwa fileba bwino kabili mulebatasha.—Ilembo ilingamwafwa: Abena Roma 12:10.

Mulebatasha ukufuma pa nshi ya mutima. Baibolo tailanda ukuti tufwile ukutashisha fye mu mutima lelo itila, “muletootela.” (Abena Kolose 3:15) Kanshi muleesha ukulatasha abena mwenu libili libili. Ba James batile: “Umwina mwandi nga antasha pa fyo ncita, cilalenga ndebombesha pa kuti mbe umulume umusuma e lyo na pa kuti icupo cesu cilewaminako.”—Ilembo ilingamwafwa: Abena Kolose 4:6.

Abatasha abena mwabo balakosha sana icupo cabo. Ba Michael batile: “Imona kwati ifyupo ifingi te kuti filepwa nga ca kuti abaupana baletwalilila ukubika amano ku fisuma ifyo abena mwabo bacita. Nga bakwata amafya, tabakalefwaya icupo cabo ukupwa pantu lyonse bakulaibukisha ifisuma ifyo abena mwabo bacita.”