ISAMBILILO 9
Finshi Mufwile Ukucita pa Kuti mu Lupwa Lwenu Muleba Insansa?
1. Mulandu nshi ukuupana ukulingana ne funde kwacindamina pa kuti mu lupwa muleba insansa?
Imbila nsuma ifuma kuli Yehova, Lesa wa nsansa, uufwaya aba mu lupwa ukuba ne nsansa. (1 Timote 1:11) E wabikako icupo. Ukuupana ukulingana ne funde kwalicindama pantu kulacingilila abana e lyo na baupana. Abena Kristu bafwile ukukonka amafunde ya kulembesha icupo aya ku ncende bekala—Belengeni Luka 2:1, 4, 5
Bushe Lesa amona shani icupo? Afwaya ukuti abaupana baleikala pamo ukwabula ukulekana. Yehova afwaya abalume na bakashi ukuba ne cishinka ku bena mwabo. (AbaHebere 13:4) Alipata ukulekana. (Malaki 2:16) Alasuminisha Abena Kristu ukulekana nga umo acita ubucende kabili kuti baupa nelyo ukuupwa na kabili.—Belengeni Mateo 19:3-6, 9.
2. Bushe umulume no mukashi bafwile ukulaikala shani?
Yehova apangile abaume na banakashi ukulaba ifibusa ku bena mwabo. (Ukutendeka 2:18) Apo umulume e mutwe wa lupwa, e wakwata umulimo wa kulapekanishisha ulupwa lwakwe ifyo lukabila no kulabasambilisha pali Lesa. Afwile ukutemwa umukashi wakwe no mweo wakwe onse. Abalume na bakashi bafwile ukutemwana no kulacindikana. Apo bonse abalume na bakashi babembu, icingalenga baba ne nsansa mu cupo kulaelelana.—Belengeni Abena Efese 4:31, 32; 5:22-25, 33; 1 Petro 3:7.
3. Bushe mufwile ukufuma ku bena mwenu nga mu cupo tamuli insansa?
Nga muli na mafya mu cupo, bonse babili mufwile ukulaesha na maka ukulanga icitemwiko ku bena mwenu. (1 Abena Korinti 13:4, 5) Icebo ca kwa Lesa tacisuminisha abantu ukupatukana nga bali na mafya ayo abaupana bambi nabo bakwatako.—Belengeni 1 Abena Korinti 7:10-13.
4. Mwe bana, bushe Lesa afwaya mube shani?
Yehova afwaya ukuti mube ne nsansa. Alamupanda amano ayasuma pa fyo mufwile ukucita pa kuti muleba ne nsansa. Afwaya ukuti muleumfwila abafyashi benu pa kuti mukakule bwino. (Abena Kolose 3:20) Na kabili Yehova afwaya muleba ne nsansa ishaba mu kulacita ifyo Kabumba wenu no Mwana wakwe bafwaya.—Belengeni Lukala Milandu 11:9–12:1; Mateo 19:13-15; 21:15, 16.
5. Mwe bafyashi, bushe kuti mwacita shani pa kuti abana benu babe ne nsansa?
Mufwile ukulabombesha pa kuti mulepekanisha abana benu ifya kulya, umwa kwikala, ne fya kufwala. (1 Timote 5:8) Lelo pa kuti abana benu babe ne nsansa, mufwile no kubasambilisha ukutemwa Lesa no kulasambilila kuli ena. (Abena Efese 6:4) Nga mwatemwa Lesa, abana benu nabo bakamutemwa. Nga mulebomfya Icebo ca kwa Lesa pa kubafunda, bakakula bwino.—Belengeni Amalango 6:4-7; Amapinda 22:6.
Abana balakula bwino nga mulebakoselesha no kulabatasha. Na kabili balakabila ukubalungika no kubasalapula. Ukubasambilisha muli uyu musango kukalenga ukuti bekacita ifingabaletela ubulanda. (Amapinda 22:15) Lelo tamufwile ukulabasalapula bukali bukali.—Belengeni Abena Kolose 3:21.
Inte sha kwa Yehova balilemba ifitabo ifingi ifya kwafwa abafyashi na bana. Muli ifi fitabo mwaba amashiwi ya mu Baibolo.—Belengeni Amalumbo 19:7, 11.
Nalimo Kuti Mwatemwako ne fi
MU LUPWA LWENU KUTI MWABA INSANSA
Lesa Kuti Amwafwa Ukukwata Insansa mu Cupo Cenu
Ukuyipusha ifi ifipusho fibili kuti kwamwafwa ukuba ne nsansa mu cupo cenu.
MU LUPWA LWENU KUTI MWABA INSANSA
Ifya Kupwisha Amafya
Ukwishiba ifya kucita nga mwaba na mafya kuti kwalenga icupo ukuba icakosa kabili ica nsansa nelyo icishakosa kabili ica mafya.
