Abena Roma 14:1-23
14 Mwilakankamba uwanaka+ mu citetekelo, kabili mwilamutwishika.+
2 Umuntu umo icitetekelo cakwe kuti camusuminisha ukulya ifintu fyonse,+ lelo uwanaka alya fye umusalu.
3 Uulya esuula uushilya,+ kabili uushilya epingula uulya, pantu Lesa alimupokelela.
4 Ni we nani uwa kuti ulepingula umubomfi wa mu ng’anda ya muntu umbi?+ Ni shikulu wakwe e umupingula nga ali bwino atemwa iyo.+ Ca cine, akapingulwa, pantu Yehova kuti amupingula bwino.+
5 Umuntu umo amona ubushiku bumo ati bwalicindama ukucila ububiye;+ umbi na o amona ubushiku bumo ukuti bwaba fye nga shimbi;+ cila muntu ashininkishe bwino ukuti ico aletontonkanya e cishinka.
6 Uucindika ubushiku bumo ukucila shimbi ni kuli Yehova+ abucindikila. Kabili, uulya, ni kuli Yehova aliila, pantu atootela Lesa;+ no uushilya ni kuli Yehova ashiliila,+ lelo na o alatootela Lesa.+
7 Na kuba, takuli uwa muli ifwe uuikalila umwine,+ kabili takuli uuifwila umwine;
8 pantu nga tuli no mweo,+ ni kuli Yehova tubela aba mweo, kabili nga twafwa, ni kuli Yehova tufwila.+ E ico nga tuli aba mweo kabili nangu nga twafwa, tuli ba kwa Yehova.+
9 Pantu e co Kristu afwilile no kuba no mweo na kabili,+ pa kuti abe Shikulu wa bonse abafwa+ na ba mweo.+
10 Nomba iwe cinshi upingwila munonko?+ Nelyo cinshi usuulila munonko? Pantu ifwe bonse tukeminina ku cipuna ca bupingushi+ ica kwa Lesa;
11 pantu calembwa ati: “Yehova+ atila, ‘Na pali ne mwine, ikufi lyonse likafukama kuli ine, no lulimi lonse lukasumina ukuti lwalishiba Lesa.’”+
12 Awe ifwe bonse umo umo tukalubulula kuli Lesa.+
13 E ico twilapingulana,+ lelo mwiminine+ pa kukanabikila munyinenwe+ ica kupunwisha+ nangu ica kuipununako mu citetekelo.
14 Nalishiba kabili nalisumina ukulingana ne fyo nasambilila muli Shikulu Yesu ukuti takwaba icakowela icine;+ kano fye umuntu atila calikowela, kuli ena ninshi calikowela.+
15 Pantu nga ca kuti pa mulandu wa fya kulya munonko alelengwa ubulanda, ninshi taule-enda na kabili ukulingana no kutemwa.+ Wileka ifya kulya fyobe fyonaule umuntu uo Kristu afwilile.+
16 E ico, mwileka icisuma ico mucita cipontelwe.
17 Pantu ubufumu bwa kwa Lesa+ te kulya no kunwa,+ lelo bulungami+ no mutende+ no kusekelela+ mu mupashi wa mushilo.
18 Pantu uucita ifi ilyo alebombela Kristu alapokelelwa kuli Lesa kabili alatashiwa na ku bantu.+
19 E ico, kanshi, natulecita ifingaleta umutende+ kabili ifingatukuula.+
20 Mwilaonaula umulimo wa kwa Lesa pa mulandu fye wa fya kulya.+ Ca cine, fyonse fyalisanguluka, lelo cibi ukupunwisha umuntu pa mulandu wa fya kulya.+
21 Kanshi cawamapo ukukanalya inama nelyo ukukananwa umwangashi nelyo ukukanacita icingapunwisha munonko.+
22 Icitetekelo ico ukwete, ushininkishe ukuti cili fye bwino kuli iwe na mu menso ya kwa Lesa.+ Alipaalwa umuntu uucita ifyo aletontonkanya ukuti nafilungama, kabili asanga no kuti tamuli icilubo mu fyo apingwile ukucita.
23 Lelo nga aletwishika, e lyo alya,+ ninshi napingulwa kale, pantu te ku citetekelo aliila iyo. Awe conse ico umuntu acita ukwabula ukukonka icitetekelo, ninshi lubembu.+