“Ino e nshita tulingile ukucita ifingalenga ubu bwafya bwacepako. Ino e nshita tulingile ukulailama sana,” E fyalandile ba António Guterres ba Secretary-General ba kabungwe ka United Nations ilyo icalo ca Iran casanshile icalo ca Israel pa Cibelushi April 13, 2024.

 Ukulwa ukuli ku fyalo fya ku kabanga ni kumo fye pa filecitika mwi sonde lyonse.

 “Pali ino nshita kuli ifimfulunganya ifingi nga nshi ifishabala afibako ukutula apo kwabelele Inkondo ya Calo iya Bubili, kabili abantu 2 bilioni na baculilamo muli ifi.”—E fyalandile aba mu kabungwe ka United Nations Security Council pa January 26, 2023

 Ifyalo umuli ulukaakala ne fimfulunganya pali na Israel, Gaza, Syria, Azerbaijan, Ukraine, Sudan, Ethiopia, Niger, Myanmar, na Haiti. a

 Ni lilali abantu bakaleka ukulwa? Bushe intungulushi sha calo kuti shaleta umutende? Finshi Baibo yalandapo?

 Ifimfulunganya ifili mwi sonde filelangilila ukuti nomba line fye inkondo shili no kupwa. Inkondo isho tulemona shilefikilisha ubusesemo ubulanda pa nshiku tuleikalamo. Baibo itila “icalo cili ku mpela?”—Mateo 24:3.

•   “Mukomfwa pa lwa nkondo mupepi no kutali. . . . Uluko lukemina uluko lubiye no buteko bukemina ubuteko bubiye.”—Mateo 24:6, 7.

 Belengeni icipande citila “Finshi Twingeshibilako Inshiku sha Kulekelesha, Nelyo ‘Inshita ya Mpela’?” pa kuti mumone ifyo inkondo ishiliko shilefikilisha ubusesemo.

 Baibo yalisobele ukuti inkondo sha bantunse shikapwa. Cinshi cikashipwisha? Te bantunse iyo lelo ni Armagedone “inkondo ya bushiku bukalamba ubwa kwa Lesa Wa Maka Yonse.” (Ukusokolola 16:14, 16) Iyi inkondo ikalenga Lesa akafikilishe ifyo alaya abantu ukuti bakalaikala mu mutende.—Amalumbo 37:10, 11, 29.

 Nga mulefwaya ukwishibilapo na fimbi pa fyo inkondo ya kwa Lesa ikapwisha inkondo shonse, belengeni icipande citila “Bushe Inkondo ya Armagedone Cinshi?”