Pa kuti icipelebesha citendeke ukupupuka, intanshi icikabilila ukufuma ku kasuba cilakafya imicincili iyo icipelebesha cibomfya pa kupupuka. Lelo nga kuli amakumbi, icipelebesha beta ukuti cabbage white e cibalilapo ukutendeka ukupupuka ilyo ifipelebesha fimbi fishilatendeka. Cinshi cilenga?

 Tontonkanyeni pali ici: Ifipelebesha ifingi ilyo fishilatendeka ukupupuka, filabalilapo ukontela akasuba ninshi nafisala amapindo ya fiko. Lelo icipelebesha beta ukuti cabbage white cena cilafungululako panono amapindo. Abafwailisha pa fintu basanga ukutila pa kuti icipelebesha cipokelele sana icikabilila ukufuma ku kasuba, cifwile ukufungululako panono amapindo (pa kuti pa kati ka mapindo paba amadigri nalimo 17.) Icipelebesha nga cafungululako panono amapindo icikabilila icifuma ku kasuba cilengila bwangu mu micincili iyo icipelebesha cibomfya pa kupupuka, lyena imicincili nga yakaba cilatendeka ukupupuka.

 Abafwailisha pa fintu bamo aba pa University of Exeter, ku England balifwailishe pa fyo bengapashanya filya icipelebesha cifungululako panono amapindo ilyo cileontela akasuba, pa kuti bapange ama solar ayafumya amaka ayengi. Basangile ukuti amaka ama solar bapashenye ku mapindo ya cipelebesha yafumishe, yalifulileko mupepi ne miku ibili.

 Abafwailisha pa fintu basangile no kuti amapindo ya cipelebesha yalabeeka sana. Ukupashanya amapindo ya cipelebesha kwalilenga balepanga ama solar aya-anguka kabili ayafumya amaka ayengi. Ici e calengele Professor Richard ffrench-Constant, uwali mwi bumba lya balefwailisha pa mapindo ya cipelebesha, alande ukutila icipelebesha beta ukuti cabbage white “capangwa mu musango wa kuti cilepokelela sana amaka ukufuma ku kasuba.”

 Muletipo shani? Bushe icipelebesha beta ukuti cabbage white icifungululako panono amapindo pa kuti cipokelele amaka ayengi ukufuma ku kasuba caishilebako fye nelyo kwali uwacipangile?