Ee. Ilyo Yesu ali pano isonde, alifikilishe amasesemo ayalanda pali “Mesia Intungulushi,” uwali no kuba “Umupusushi wa ba muli ici calo.” (Daniele 9:25; 1 Yohane 4:14) Na pa numa ya mfwa yakwe, Yesu alitwalilile ukufikilisha amasesemo ayalanda pali Mesia.—Amalumbo 110:1; Imilimo 2:34-36.

•  Bushe ishina lya kuti “Mesia” lyalola mwi?

•  Bushe bantu abengi e balingile ukufikilisha amasesemo yalanda pali Mesia?

•  Bushe Mesia akesa ku ntanshi?

•  Masesemo yanga ayaba mu Baibolo ayalanda pali Mesia?

•  Amasesemo yamo ayalanda pali Mesia ayo Yesu afikilishe

 Ishiwi lya ciHebere Ma·shiʹach (Mesia) ne shiwi lya ciGriki Khri·stos (Kristu) yonse yalola mu kuti “Uwasubwa.” Kanshi ishina lya kuti “Yesu Kristu” lyalola mu kuti “Yesu Uwasubwa” nelyo “Yesu Mesia.”

 Mu nshita balelemba Baibolo, umuntu nga bamupeela umulimo waibela, pa ku musuba baleitulwila amafuta ya kusubilako pa mutwe wakwe. (Ubwina Lebi 8:12; 1 Samwele 16:13) Lesa asontele Yesu ukuba Mesia pa kuti akabombe umulimo uwacindama sana. (Imilimo 2:36) Lelo tabomfeshe amafuta ya kusubilako pa kumusuba, amusubile no mupashi wa mushilo.—Mateo 3:16.

 Awe. Nga filya fine abantu abengi bashingakwata icifwati ca munwe icapalana e fyo na masesemo ayaba mu Baibolo yashingafikilishiwilwa mu bantu abengi kano fye mu muntu umo e kutila Mesia nelyo Kristu. Na lyo line Baibolo ilatusoka ukuti “baKristu ba bufi na bakasesema ba bufi bakema no kucita ifishibilo fikalamba ne fipapwa ku kulufya abantu ica kuti ni cikanga balufye na basalwa bene.”—Mateo 24:24.

 Awe. Baibolo yasobele ukuti Mesia ali no kufuma mu lupwa lwa Mfumu Davidi uwa mu Israele. (Amalumbo 89:3, 4) Umo balelemba intuntuko sha baYuda ukufuma pali Yesu ukufika kuli Davidi nalimo fyalyonawilwe ilyo abena Roma baonawile Yerusalemu mu mwaka wa 70 ninshi Yesu alibwelelamo ku muulu. * Kanshi ukutula ilya nshita, takwaba uwingasanga ifilanga ukutila Yesu atuntwike mu lupwa lwa bufumu ulwa kwa Davidi. Na lyo line ifyalembwa e ko fyali ilyo Yesu ali pano isonde, pantu nangu balwani bakwe tabamukenye ilyo alandile ukuti atuntwike mu lupwa lwa kwa Davidi.—Mateo 22:41-46.

 Kuti cayafya ukwishiba impendwa ya masesemo yonse fye ayalanda pali Mesia. Katulangilile, ifyo twingapenda amasesemo yalanda mukulungatika pali Mesia kuti fyapusanapusana. Ilembo lya kwa Esaya 53:2-7 lyalisobele ifintu ifingi ifyali no kucitikila Mesia. Bamo kuti bamona ukuti pali ili lembo paba fye ubusesemo bumo lelo bambi kuti bamona ukuti paba amasesemo ayengi.