Finshi Baibolo Ilanda pa Fikuko?
Icasuko ca mu Baibolo
Baibolo yalisobele ukuti mu nshiku sha kulekelesha kukaba ifikuko, e kutila amalwele ayambukila, ukubikako fye na malwele ayasalangana isonde lyonse. (Luka 21:11) Lesa te uleta aya amalwele pa kuti akande abantu. Na kuba, nomba line fye Lesa ali no kubomfya Ubufumu bwakwe ukufumyapo amalwele yonse, ukubikako fye ne fikuko.
Bushe Baibolo yalisobele ukuti kukalaba ifikuko?
Baibolo tayalumbula mu kulungatika ifikuko nelyo amalwele pamo nga COVID-19, AIDS, na Spanish flu. Lelo yalisobele ukuti mu nshiku sha kulekelesha kukaba “ifikuko” ne “cinkunka ca mfwa.” (Luka 21:11; Ukusokolola 6:8) Ifi fikuko fyaba pa filenga twaishiba ukuti tuleikala mu “nshiku sha kulekelesha,” isho Baibolo ita no kuti ‘impela ya calo.’—2 Timote 3:1; Mateo 24:3.
Bushe Lesa alibala alwalikapo abantu pa kuti abakande?
Kwena Baibolo yalilandapo pa nshita shimo isho Lesa alwalike abantu pa kuti abakande. Ku ca kumwenako, alilwalike abantu bamo ifibashi. (Impendwa 12:1-16; 2 Ishamfumu 5:20-27; 2 Imilandu 26:16-21) Na lyo line, aya amalwele tayali fikuko ifya-ambukiile na bantu bambi aba kaele, lelo abo Lesa alwalike fye ni balya abo akandile pa mulandu wa kuti balimupondekele.
Bushe Lesa e walenga ukuti kuleba ifikuko pa kuti atukande?
Awe. Abantu bamo balanda ukuti Lesa abomfya ifikuko na malwele yambi pa kukanda abantu. Nomba ifi te fyo Baibolo ilanda. Cinshi twalandila ifi?
Cimo icilanga ukuti Lesa te ulenga kuleba ifikuko pa kuti akande abantu ca kuti na babomfi bakwe bamo aba ku kale balelwala, e lyo na ba muno nshiku mwine nabo balalwala. Ku ca kumwenako, Timote uwali uwa cishinka kuli Lesa ‘alelwalilila.’ (1 Timote 5:23) Lelo Baibolo tailanda ukuti icalengele Timote alelwalilila ni co Lesa alemukanda. Na muno nshiku mwine, ababomfi ba kwa Lesa bamo ababa ne cinshika kuli ena balalwala. Kabili ilingi line icilenga balwale, ni pa mulandu fye wa kuba ku ncende ukuli ubulwele nelyo ukwacitika fimo ifyalenga ukuti balwale.—Lukala Milandu 9:11.
Na kuba, Baibolo isambilisha ukuti inshita tailafika iyo Lesa akonaula abacita ifyabipa. Lelo tucili tuleikala mu “bushiku bwe pusukilo,” e kutila mu nshita iyo Lesa afwaya ukuti abantunse bonse baba ifibusa fyakwe no kwisapusuka. (2 Abena Korinti 6:2) Inshila imo iyo Lesa abomfya pa kulenga abantu baba ifibusa fyakwe, mulimo wa kubila “imbila nsuma . . . iya bufumu,” uubombwa mwi sonde lyonse.—Mateo 24:14.
Bushe ifikuko fikapwa?
Ee. Baibolo ilanda ukuti nomba line fye inshita ili no kufika ilyo takwakabe umuntu uukalalwala. Ilyo Ubufumu bwa kwa Lesa bukalateka, Lesa akondapa bonse abalwala. (Esaya 33:24; 35:5, 6) Akafumyapo ukucula ne mfwa, e lyo ne filenga tuleumfwa ubukali. (Ukusokolola 21:4) Na kabili akabuusha abafwa pa kuti bakabe no bumi ubusuma kabili bakabe ne nsansa umuyayaya pano pene pe sonde.—Amalumbo 37:29; Imilimo 24:15.
Amalembo ayalanda pa malwele
Mateo 4:23: “[Yesu] ashingulwike mu Galili monse, alesambilisha mu masunagoge yabo no kubila imbila nsuma ya bufumu no kuposha imisango yonse iya malwele ne misango yonse iya ntenda mu bantu.”
Umwalola ili ilembo: Filya Yesu aleposha abalwele mu cipesha amano filanga fye ifinono pa fingi ifyo Ubufumu bwa kwa Lesa bukacitila abantu nomba line.
Luka 21:11: “Kukaba . . . ifikuko.”
Umwalola ili ilembo: Amalwele ayaba mwi sonde lyonse yaba pa filanga ukuti tuleikala mu nshiku sha kulekelesha.
Ukusokolola 6:8: “Moneni! kwali kabalwe uwabutulukila; no waikelepo ishina lyakwe ni Mfwa. Ne Nshiishi yalemukonka pa numa. Kabili bapeele Imfwa ne Nshiishi amaka . . . aya kwipaila . . . ku cinkunka ca mfwa.”
Umwalola ili ilembo: Ubusesemo ubulanda pa banina pali bakabalwe bane bulanga ukuti mu nshiku sha kulekelesha mwali no kuba ifikuko.
Nalimo Kuti Mwatemwako ne fi
ULUPUNGU LWA KWA KALINDA
Bushe nga Tulecula Ninshi Lesa Aletukanda?
Bushe Lesa e ulenga abantu balelwala no kucula pa kuti abakande pa membu shabo?
AMASAMBILISHO YA MU BAIBO AYACINDAMA
Mulandu Nshi Lesa Asuminishisha Ukucula?
Abantu abengi balepusha ico mu calo mwafulila ulupato no kucula. Mu Baibolo mwaliba amasuko kuli aya mepusho.
ULUPUNGU LWA KWA KALINDA
Bushe Yesu Atile ni Lilali Impela Ikesa?
Bushe mulamona ifishibilo ifyo Yesu alandilepo filecitika?
AMASUKO KU MEPUSHO YA MU BAIBOLO
“Finshi Twingeshibilako Inshiku sha Kulekelesha, Nelyo ‘Inshita ya Mpela’?”
Baibolo yalisobele ifintu ifingi ifyali no kulanga ukuti tuleikala mu nshiku sha kulekelesha.
AMASUKO KU MEPUSHO YA MU BAIBOLO
Finshi Ubufumu bwa kwa Lesa Bukacita?
Sambilileni ifyo ubuteko bwa kwa Lesa bukacita ilyo bukalateka aba pa calo.
AMASAMBILISHO YA MU BAIBOLO
Tendekeni ukusambilila Baibolo ne Nte sha kwa Yehova
Tendekeni ukusambilila baibolo ne Nte sha kwa Yehova ukwabula ukulipila.