Mantang mas naaaraman ta an mga kuwalidad nin sarong tawo, mas namimidbid ta siya, kaya puwedeng magrarom pa an pakikiamigo ta sa saiya. Sa kaparehong paagi, mantang mas naaaraman ta an mga kuwalidad ni Jehova, mas namimidbid ta siya, kaya puwedeng magrarom pa an pakikiamigo ta sa saiya. Sa gabos na magagayon na kuwalidad nin Diyos, apat an talagang pambihira: an saiyang kapangyarihan, kadunungan, hustisya, asin pagkamuot.

‘O [Soberanong] Kagurangnan na Jehova! Uya! Ika an naglalang kan langit asin kan daga [paagi] kan saimong dakulang kapangyarihan.’—JEREMIAS 32:17.

An ebidensiya kan kapangyarihan nin Diyos mahihiling sa mga linalang. Halimbawa, kun maluwas ka sa kainitan kan aldaw, ano an mamamati mo? An init kan saldang. An totoo, namamatian mo an mga resulta kan kapangyarihan ni Jehova sa paglalang. Gurano kainit asin kapuwersa an saldang? Sinasabing an temperatura sa pinakasentro kaiyan minaabot nin mga 15,000,000 degrees Celsius. Kada segundo, an saldang nagpapaluwas nin enerhiya na kapareho kakusog kan pagsabog nin ginatos na milyon na bomba nuklear.

Pero sadit an satong saldang kumpara sa dai mabilang na trinilyon na bituon sa uniberso. Kinakarkulo kan mga siyentista na an saro sa pinakadakulang bituon, na inaapod na UY Scuti, mas dakula nin mga 1,700 na beses kisa sa saldang. Kun sasalidahan kan UY Scuti an saldang, masasakop kaiyan an daga asin malampas pa sa orbit kan planetang Jupiter. Makakatabang nanggad iyan sa sato na lubos na masabutan an sinabi ni Jeremias na linalang nin Diyos na Jehova an langit asin an daga, buot sabihon an uniberso, paagi kan saiyang dakulang kapangyarihan.

 Paano kita nakikinabang sa kapangyarihan nin Diyos? An satong buhay nakadepende sa pisikal na mga linalang nin Diyos, arog kan saldang asin kan gabos na makangangalas na yaman kan daga. Dugang pa, ginagamit kan Diyos an saiyang kapangyarihan tanganing makinabang an lambang saro sa sato. Paano? Kan inot na siglo, tinawan nin Diyos nin kapangyarihan si Jesus para magsagibo nin mga bagay na talagang milagroso. Mababasa ta: “An mga buta nakakahiling na asin an mga pilay nagraralakaw, an mga may leproso nagigin malinig asin an mga bungog nakakadangog, an mga gadan ibinabangon.” (Mateo 11:5) Kumusta man ngunyan? ‘Siya nagtataong kakusugan sa napapagal,’ an sabi kan Bibliya, asin idinagdag pa kaiyan: ‘An mga nananarig ki Jehova magkakaigwa nin panibagong kusog.’ (Isaias 40:29, 31) Kaya nin Diyos na tawan kita nin “puwersa na urog kisa sa ordinaryo” para makayanan ta o matagalan an mga kasakitan asin pagbalo. (2 Corinto 4:7) Bako daw na gusto tang maparani sa sarong Diyos na namumutan kitang marhay asin ginagamit an saiyang dakulang kapangyarihan para tabangan kita?

‘Kaniguan kadakul kan saimong mga gibo, O Jehova! Ginibo mo iyan gabos sa kadunungan.’—SALMO 104:24.

Mantang mas dakul kitang naaaraman manungod sa mga bagay na ginibo nin Diyos, mas napapahanga kita sa saiyang kadunungan. Sa katunayan, igwa nin sarong klase nin pag-aadal na inaapod na biomimetics, o biomimicry, kun sain pinag-aadalan kan mga siyentista an mga linalang ni Jehova asin kinokopya an pagkadisenyo kaiyan para mapagayon an saindang mga disenyo, magpuon sa simpleng pantakod o pandukot sagkod sa disenyo nin mga eroplano.

An kadunungan nin Diyos hiling-hiling mismo sa makangangalas na pagkahaman kan hawak nin tawo. Halimbawa, pag-isipan kun paano nadi-develop an sarong umboy. Nagpupuon an proseso paagi sa sarong pertilisadong selula, kun sain nakabugtak an gabos na kinakaipuhan na henetikong mga instruksiyon. An selulang iyan magkakabaranga sa dakul na selula na parareho an itsura. Pero sa eksaktong panahon, an mga selulang iyan mapuon nang magkaigwa nin magkakalain na porma na maresulta sa ginatos na klase nin espesyal na mga selula, arog nin mga selula kan dugo, selula kan nerbiyo, asin selula kan tulang. Paghaloy-haloy, mabibilog an mga organo saka mapuon na iyan na magpunsiyonar. Sa laog sana nin siyam na bulan, an selulang iyan magigin nang sarong umboy na kompuwesto nin binilyon na selula. Huli sa kadunungan sa likod kan disenyong iyan minauyon an dakul sa sinabi nin sarong kagsurat kan Bibliya: ‘[Uumawon] taka huli ta makangangalas an pagkagibo sa sako.’—Salmo 139:14.

Paano kita nakikinabang sa kadunungan nin Diyos? Aram kan Kaglalang kun ano an kaipuhan ta para magin maugma. Huli sa saiyang mahiwas na kaaraman asin pakasabot, nagtatao siya nin madunong na mga sadol sa saiyang Tataramon, an Bibliya. Halimbawa, sinasadol kita kaiyan: “Padagos na . . . lubos na patawadon an lambang saro.” (Colosas 3:13) Madunong daw na sadol na iyan? Iyo. Nadiskubre kan mga doktor na an pagigin mapagpatawad nakakatabang para magin marahay an turog nin saro asin dai maglangkaw an presyon nin dugo. Makakatabang man ini para makalikay sa depresyon asin iba pang hilang. An Diyos garo sarong madunong asin may pagmakulog  na amigo na dai nagpupundo sa pagtao sa sato nin nakakatabang saka kapaki-pakinabang na sadol. (2 Timoteo 3:16, 17) Gusto mo daw na magkaigwa nin arog kaiyan na amigo?

‘Si Jehova namumuot sa [hustisya].’—SALMO 37:28.

Pirming ginigibo nin Diyos kun ano an tama. Sa katunayan, “harayong mangyari na gumibo nin maraot an tunay na Diyos, na gumibo nin sala an Makakamhan sa Gabos!” (Job 34:10, NW) Matanos an saiyang mga paghukom, arog kan sinabi kan salmista kan kinakaulay niya si Jehova: ‘Huhukuman mo an mga banwaan sa katanusan.’ (Salmo 67:4) Huling “si Jehova naghihiling sa puso,” dai siya nadadaya kan pagsagin-sagin kundi naaaraman niya pirmi an katotoohan asin naggigibo nin tamang mga paghusgar. (1 Samuel 16:7) Dugang pa, aram nin Diyos an gabos na nangyayaring inhustisya asin korapsiyon sa daga, asin nanunuga siya na dai mahahaloy an mga maraot hahalion sa daga.—Talinhaga 2:22.

Alagad, an Diyos bakong maringis na hukom na gustong-gustong magpadusa. Nagpapahiling siya nin pagkahirak kun kaipuhan. An Bibliya nagsasabi: ‘Mahihirakon asin [mapagmalasakit] si Jehova,’ dawa sa mga maraot kun sinda sinserong masulsol. Bako daw na iyan an tunay hustisya?—Salmo 103:8; 2 Pedro 3:9.

Paano kita nakikinabang sa hustisya nin Diyos? Si apostol Pedro nagsabi: “An Diyos mayong pinapalain, kundi sa lambang nasyon an tawong natatakot sa saiya asin naggigibo nin matanos saiyang inaako.” (Gibo 10:34, 35) Nakikinabang kita sa hustisya nin Diyos huling mayo nanggad siyang pinapalain o pinapaburan. Puwede niya kitang akuon asin magin saiyang mga parasamba ano man an satong lahi, nasyonalidad, pinag-adalan, o kamugtakan sa buhay.

Huling gusto nin Diyos na masabutan ta asin makinabang kita sa saiyang hustisya, tinawan niya kita nin konsiyensiya. Ilinaladawan kan Kasuratan an konsiyensiya bilang sarong katugunan na ‘nakasurat sa satong puso,’ na “nagseserbing saksi” kun baga tama o sala an satong paggawi. (Roma 2:15) Paano kita nakikinabang diyan? Kun nasanay nin tama, an satong konsiyensiya puwedeng magpahiro sa sato na bayaan an nakakaraot o bakong matanos na gibo.  Asin kun makagibo kita nin sala, papahiruon kita kaiyan na magsulsol asin itama an satong dalan. An pakasabot ta sa pagmansay nin Diyos sa hustisya talagang makakatabang sa sato asin paagi kaiyan mapaparani kita sa saiya!

“An Diyos pagkamuot.”—1 JUAN 4:8.

An Diyos makapangyarihan, madunong, asin may hustisya, pero dai sinasabi kan Bibliya na an Diyos kapangyarihan, kadunungan, o hustisya. Sinasabi kaiyan na siya pagkamuot. Taano? Huling an kapangyarihan nin Diyos an nagpapangyari sa saiya na humiro, asin an saiyang hustisya saka kadunungan an naggigiya sa saiyang paagi nin paghiro. Pero an pagkamuot ni Jehova an nagmomotibar sa saiya na humiro. Pagkamuot an nasa likod kan gabos niyang ginigibo.

Yaon na ki Jehova an gabos, pero pinahiro siya kan saiyang pagkamuot na maglalang nin intelihenteng mga linalang sa langit asin sa daga, na puwedeng makinabang saka makaeksperyensiya kan saiyang pagkamuot asin pag-ataman. Dinisenyo niya an daga na magin magayon na istaran para sa mga tawo. Padagos niyang pinapahilingan nin pagkamuot an gabos na tawo, na “pareho niyang pinapasirangan nin aldaw an mga maraot asin an mga marahay saka pareho niyang pinapauranan an mga matanos asin an mga bakong matanos.”—Mateo 5:45.

Dugang pa, “si Jehova mamumuton nanggad asin mahihirakon.” (Santiago 5:11) Namumutan niya an mga sinserong naggigibo nin paagi para mamidbid asin magin harani sa saiya. Hinihiling nin Diyos an mga tawong iyan bilang mga indibidwal. Sa katunayan, ‘nagmamakulog siya sa saimo.’—1 Pedro 5:7.

Paano kita nakikinabang sa pagkamuot nin Diyos? Napapahanga kita sa gayon kan pagsulnop nin saldang. Nauugma kita sa ngirit nin sarong umboy. Pinapahalagahan ta an pagkamuot nin sarong dayupot na kapamilya. Tibaad bako man na gayong mahalaga an mga bagay na ini, pero ginigibo kaining mas maugma an satong buhay.

Nakikinabang man kita sa saro pang kapahayagan nin pagkamuot nin Diyos: an pamibi. Sinasadol kita kan Bibliya: “Dai kamo mahadit sa ano man na bagay, kundi sa gabos na panahon paagi sa pamibi asin pagngayo-ngayo na may kaibang pasasalamat, ipaaram nindo sa Diyos an saindong mga kahagadan.” Arog nin sarong mamumuton na ama, gusto niya na magpatabang kita saiya sa gabos tang mga ikinakahadit. Dangan, huli sa dakulang pagkamuot ni Jehova, nanunuga siya na itatao niya “an katuninungan nin Diyos na nakakalabi sa gabos na pakasabot.”—Filipos 4:6, 7.

Nakatabang daw saimo an halipot na pagtukar na ini sa panginot na mga kuwalidad nin Diyos—arog kan saiyang kapangyarihan, kadunungan, hustisya, asin pagkamuot—na mas mamidbid siya? Para mas lalo pa niyatong mamidbid an Diyos, aramon ta kun ano an mga ginibo niya asin mga gigibuhon pa para sa saimong kapakinabangan.