MAY midbid ka daw na brother o sister na nagbalyo sa ibang nasyon kun sain mas nangangaipo nin mga parahulit kan Kahadian? Sa parati, inaapod niyato sindang mga “need-greater.” Naihapot mo na daw sa sadiri: ‘Ano an nakapahiro sa sainda na maglingkod sa ibang nasyon? Paano sinda nag-andam para sa arog kaining paglilingkod? Kaya ko man daw na magibo iyan?’ Siyempre, an marahay na paagi para masimbag ini iyo na ihapot mismo iyan sa sainda. Iyan an gigibuhon ta.

Taano ta naisipan nindo na maglingkod sa ibang nasyon na may mas dakulang pangangaipo? Hali sa Estados Unidos si Amy, na mga 35 anyos na ngunyan. Sinabi niya: “Dakul na taon ko nang pinag-iisipan na maglingkod sa ibang nasyon, pero garo dai ko iyan kayang gibuhon.” Paano nawara an pagduwa-duwa niya? “Kan 2004, sarong mag-agom na naglilingkod sa Belize an inimbitaran akong magpasyar sa sainda saka magpayunir kaiba ninda sa laog nin sarong bulan. Ginibo ko iyan—asin nagustuhan ko! Pakalihis nin sangtaon, nagbalyo ako sa Ghana para duman magpayunir.”

Mga pirang taon na an nakaagi, si Stephanie, na mayo pang 30 anyos asin hali man sa Estados Unidos, pinag-adalan na marhay an kamugtakan niya asin sinabi sa sadiri: ‘Marahay an salud ko; mayo akong mga obligasyon sa pamilya. An totoo, mas urog pa sa nagigibo ko ngunyan an kaya kong gibuhon para ki Jehova.’ An onestong pagsiyasat na iyan sa sadiri an nakapahiro sa saiya na magbalyo sa Ghana para pahiwason an ministeryo niya. Pirming pinapangarap ni Filip asin Ida, mag-agom na payunir na labi nang 50 anyos haling Denmark, na magbalyo sa lugar na mas dakula an pangangaipo. Naghanap sinda nin mga paagi para magkatotoo iyan. An sabi ni Filip: “Kan may mag-abot nang oportunidad, garo man sana sinasabi sa samo ni Jehova: ‘Sige, lakaw na kamo!’” Kan 2008, nagbalyo sinda sa Ghana asin naglingkod diyan nin labing tulong taon.

 Naglilingkod sa Estados Unidos si Hans asin Brook, mag-agom na payunir na parehong labi nang 30 anyos. Kan 2005, nagtabang sinda sa pagtao nin ayuda pagkatapos kan Bagyong Katrina. Kan huri, nag-aplay sinda para magtabang sa mga proyekto nin internasyonal na pagtutugdok pero dai sinda naapod. An sabi ni Hans: “Dangan, nadangog mi sa pahayag sa sarong kumbensiyon na inako ni Hading David na dai siya tinugutan na magtugdok kan templo, kaya binago niya an saiyang pasuhan. Nahiling mi sa puntong iyan na mayo man nin maraot kun babaguhon nin saro an teokratikong mga pasuhan niya.” (1 Cron. 17:1-4, 11, 12; 22:5-11) Sinabi man ni Brook, “Gusto ni Jehova na sa ibang pinto kami nin oportunidad magtuktok.”

Kan madangog ni Hans asin Brook an magagayon na eksperyensiya kan mga amigo nindang naglingkod sa ibang nasyon, napahiro sindang purbaran man iyan. Kan 2012, nagduman sinda sa Ghana asin nagpayunir sa sarong kongregasyon sa lengguwaheng pasenyas sa laog nin apat na bulan. Dawa kinaipuhan nindang magbalik sa Estados Unidos, an paglilingkod ninda sa Ghana nakapakusog sa pagmawot nindang padagos na inuton sa saindang buhay an kapakanan kan Kahadian. Dangan, nagtabang na sinda sa pagtugdok kan sangang opisina sa Micronesia.

Paano kamo nag-andam para makapaglingkod sa lugar na mas dakula an pangangaipo? Sinabi ni Stephanie: “Nag-research ako sa Torrengbantayan nin mga artikulo mapadapit sa paglilingkod kun sain mas dakula an pangangaipo. * Ipinakipag-ulay ko man sa mga elder mi sa kongregasyon asin sa paraataman nin sirkito saka sa saiyang agom an pasuhan kong maglingkod sa ibang nasyon. Urog sa gabos, parati kong ipinapamibi iyan ki Jehova.” Kasabay kaiyan, pinagdanay na simple ni Stephanie an saiyang buhay, nagtipid siya kaya nakatipon siya nin kuwartang panggastos niya mantang naglilingkod sa ibang nasyon.

Sinabi ni Hans: “Namibi kami ki Jehova para sa paggiya huling gusto ming  magduman sa kun sain niya kami gustong maglingkod. Sinambit mi man sa mga pamibi mi an espesipikong petsa kun nuarin mi gigibuhon an plano mi.” Nagsurat an mag-agom sa apat na sangang opisina. Pakaresibi nin positibong simbag hali sa sangang opisina sa Ghana, nagbiyahe sinda na an plano maglingkod diyan nin duwang bulan. “Nagustuhan ming marhay an maglingkod kaiba kan mga tugang sa kongregasyon,” an sabi ni Hans, “kaya nagdanay kami diyan nin mas halawig.”

Si George asin Adria, sarong mag-agom na taga Canada na parehong ma-40 anyos, pirming isinasaisip na binebendisyunan ni Jehova an marahay na mga desisyon, bako sanang basta marahay na intensiyon. Kaya naggibo sinda nin siguradong mga lakdang para maabot an pasuhan ninda. Nag-apod sinda sa sarong sister na naglilingkod sa sarong lugar sa Ghana na dakula an pangangaipo asin dakul sindang ihinapot sa saiya. Nagsurat man sinda sa sangang opisina sa Canada asin sa Ghana. An sabi ni Adria: “Pinasimple mi na dati an buhay mi, pero naghanap pa kami nin mga paagi para mas magpasimple.” Huli sa mga desisyon nindang iyan, nakabalyo sinda sa Ghana kan 2004.

Anong mga kadipisilan an inatubang nindo pagkatapos na nindong magbalyo, asin paano nindo iyan nakayanan? Kan primero, pungawon si Amy. “Gabos digdi ibang marhay sa kinatudan ko.” Ano an nakatabang sa saiya? “Inaapudan ako kan mga kapamilya ko saka sinasabi ninda na talagang napapahalagahan ninda an paglilingkod ko, na nakakatabang para dai ko malingawan an dahilan kun nata nagdesisyon akong magbalyo. Kan huri, nag-video chat na kami kaya garo yaon lang sinda sa harani.” Nakipag-amiga man si Amy sa sarong eksperyensiyadong sister duman na  nagtukdo sa saiya kan manlain-lain na kostumbre sa lugar na iyan. “Pirmi akong nagpapatabang sa amiga ko saka pirmi man siyang andam na magtabang pag dai ko nasasabutan an reaksiyon kan mga tawo. Huli sa saiya, nanudan ko kun ano an gigibuhon, saka kun ano an lilikayan, na nakatabang na marhay para magin maugma ako sa ministeryo.”

Sinabi ni George asin Adria na kan primero nindang pag-abot sa Ghana, garo man sana sinda nagbalik sa suanoy na panahon. “Imbes na sa washing machine, sa mga balde kami naglalaba. Dati madalion lang kaming nakakapagluto; pero ngunyan mga sampulong beses kahaloy,” an sabi ni Adria. “Pero dai nahaloy, nagin parte na man lang kan bagong mga eksperyensiya mi an medyo dipisil na mga sitwasyon na idto.” Sinabi ni Brook: “Dawa dakul na ulang an inaatubang ming mga payunir, kontento kami sa buhay. Pag tinipon mi an nakakapakusog na mga eksperyensiya, makakabilog kami nin garo marambong na burak nin magagayon na pangyayari na papahalagahan ming marhay.”

Taano ta irinerekomendar nindo sa iba an arog kaining klase nin paglilingkod? Sinabi ni Stephanie: “Talagang nakakaugmang maghulit sa sarong lugar na gustong-gusto kan mga tawo na manudan an katotoohan, na haros gusto ninda aroaldaw mo sindang tukduan sa Bibliya. An pagbalyo saka paglingkod ko sa lugar na mas dakula an pangangaipo an saro sa mga pinakamarahay na nagin desisyon ko!” Kan 2014, nagpakasal si Stephanie ki Aaron, asin ngunyan, naglilingkod sinda sa sangang opisina sa Ghana.

Si Christine, sarong payunir hali sa Germany na labi pa sanang 30 anyos ngunyan, nagsabi: “Magayunon na eksperyensiya talaga idto.” Naglingkod si Christine sa Bolivia bago siya nagbalyo sa Ghana. Sinabi pa niya: “Harayo ako sa pamilya ko, kaya pirmi akong naghahagad nin tabang ki Jehova. Nagin mas totoo siya para sa sako kisa kasuarin man. Namatian ko man an pambihirang pagkasararo na mahihiling sa mga lingkod ni Jehova. Nagin magayon an buhay ko huli sa paglilingkod na ini.” Kasuarin pa sana, ikinasal si Christine ki Gideon, asin pareho sindang padagos na naglilingkod sa Ghana.

Sinabi ni Filip asin Ida kun ano an ginibo ninda para matabangan na umuswag an mga tinutukduan ninda sa Bibliya. “Dati, 15 o labi pa an Bible study mi, pero ginibo ming sagkod sa sampulo na sana para mas matukduan mi sindang marhay.” Nakinabang daw an mga tinutukduan ninda? Sinabi ni Filip: “May Bible study akong hoben na an pangaran Michael. Kaya niyang aroaldaw mag-study saka nag-aandam siyang marhay kaya natapos mi nin sarong bulan an librong Itinotokdo kan Biblia. Tapos, nagin dai pa bawtisadong parahayag si Michael. Sa inot niyang pag-service, hinapot niya ako, ‘Puwede mo daw tabi akong tabangan sa mga Bible study ko?’ Nabigla ako. Sinabi ni Michael na nakapuon siya nin tulong pag-adal sa Bibliya asin gusto niyang magpatabang kun paano magkondukta nin pag-adal.” Isipa na sana, dakul nanggad an kaipuhan na mga paratukdo mala ngani ta maski mga tinutukduan pa sana sa Bibliya nagigin nang mga paratukdo!

Nahiling tulos ni Amy kun gurano kadakula kan pangangaipo. Sinabi niya: “Dai nahaloy pagkaabot ko sa Ghana, naghulit asin naghanap kami nin mga púla sa sarong sadit na baryo. Sa baryo sanang iyan, nakanumpong kami nin bako sanang sarong púla, kundi walo!” Nagpakasal si Amy ki Eric, asin pareho sindang naglilingkod bilang mga espesyal payunir. Yaon sinda sa sarong kongregasyon sa lengguwaheng pasenyas asin nagtatabang sa nagkapira sa labing 300 na púlang parahayag asin interesado sa bilog na nasyon na iyan. Huli sa paglilingkod ni George asin Adria sa Ghana, naeksperyensiyahan ninda mismo kun ano an inaagihan kan mga tugang tang misyonero. Kaya ugmahon sinda kan maimbitaran sinda sa ika-126 na klase kan Paadalan nin Gilead! Sa ngunyan, naglilingkod sinda bilang mga misyonero sa Mozambique.

Nakakaugmang mahiling na kadakul na indibidwal an nagtatabang sa mga tugang ta sa ibang nasyon sa pagtipon kan ani. (Juan 4:35) Sa kada semana kan taon, may average na 120 katawo an nababawtismuhan sa Ghana. Arog kan 17 need-greater na nagbalyo sa Ghana, rinibong ebanghelisador sa bilog na kinaban an napapahiro kan pagkamuot ninda ki Jehova para ‘gikan sa buot na ipresentar an saindang sadiri.’ Naglilingkod sinda sa mga lugar na nangangaipo nin dugang na mga parahulit kan Kahadian. Siguradong napapaugma kan mga boluntaryong ini an puso ni Jehova!—Sal. 110:3, NW; Tal. 27:11.