Alɛ kasiɛn nga Ɲanmiɛn nin klɔ sran’m be siefuɛ’m bé wá kún’n yɛ be flɛ i Aamagedɔn’n niɔn. Mɛn siefuɛ mun ɔ nin be nga be o be sin’n, be kplinman su kɛ bé ló be wun bé mán Ɲanmiɛn naan bé súɛn i sielɛ’n i bo. (Jue Mun 2:2) Alɛ sɔ’n nun yɛ bé wá núnnún klɔ sran’m be sielɛ liɛ’n niɔn.—Daniɛli 2:44.

 Biblu’n nun’n Sa Nglo Yilɛ 16:16 nun ngunmin yɛ be kan Aamagedɔn’n i ndɛ-ɔ. Sa Nglo Yilɛ 16:14 se kɛ lɔ yɛ ‘bé yíayía famiɛn nga be o asiɛ wunmuan’n su’n naan be kun alɛ Ɲanmiɛn m’ɔ Kwla Like Kwlaa Yo’n i cɛn dan’n nun.’—Sa Nglo Yilɛ 16:14.

 ?Wan mun yɛ bé kún Aamagedɔn alɛ’n niɔn? Zezi dún ɲanmiɛn su lɔ anzi’m be ɲrun mmua, kpɛkun be nin Ɲanmiɛn i kpɔfuɛ mun bé kún. (Sa Nglo Yilɛ 19:11-16, 19-21) Ɲanmiɛn i kpɔfuɛ sɔ mun’n yɛle be nga be loman be wun be mɛnmɛn i mɔ be yo ɲin kekle i su’n.—Ezekiɛli 39:7.

 ?Asiɛ’n i lika trele kun nun yɛ bé kún Aamagedɔn alɛ’n niɔn? Cɛcɛ. Ɔ́ yó asiɛ’n wunmuan’n su.—Zeremin 25:32-34; Ezekiɛli 39:17-20.

 Aamagedɔn i bo’n yɛle ‘Megido oka’n.’ Laa’n Izraɛli nvle’n i lika kun yɛ be flɛ i sɔ-ɔ. Be kunnin alɛ cinnjin wie mun lika’n sɔ’n nun lɔ. Biblu’n kan alɛ sɔ’m be nun wie’m be ndɛ. (Jɔlɛ Difuɛ Mun 5:19, 20; 2 Famiɛn Mun 9:27; 23:29) Sanngɛ kɛ be kan Aamagedɔn’n i ndɛ’n, nán lika sɔ’n i ndɛ yɛ be kan-ɔn. Afin oka dan fi nunman lika sɔ’n nun. Asa’n sɛ be fa Zizreɛli i lika kpɛtɛkplɛɛ ng’ɔ mɛntɛn i wun lɛ bɔbɔ’n, Ɲanmiɛn i kpɔfuɛ m’ɔ nin be bé wá kún’n be kwlaa be sɔnman lɛ. Blɛ kasiɛn nga mɛn siefuɛ’m bé bó wá yó kun mɔ bé fá be ɲin cí Ɲanmiɛn i sielɛ’n yɛ be flɛ i Aamagedɔn’n niɔn.

 ?Sa benin yɛ ɔ́ jú Aamagedɔn alɛ’n nun-ɔn? E siman wafa trele nga Ɲanmiɛn nin i kpɔfuɛ mun bé wá kún blɛ sɔ’n nun’n. Sanngɛ ninnge nga Ɲanmiɛn fa kunnin alɛ laa’n be o lɛ. I wie yɛle nzraama nga kɛ nzue’n tɔ́’n be gua’n, nin asiɛ’n mɔ keje’n, nin nzue m’ɔ tɔ di lika’n, ɔ nin sin nin sufru, nin ɲanmiɛn m’ɔ kpa sin’n, nin tukpacɛ’n. (Zɔbu 38:22, 23; Ezekiɛli 38:19, 22; Abakiki 3:10, 11; Zakari 14:12) Ɲanmiɛn i kpɔfuɛ mun be wla m’ɔ́ wá tɔ́ blo’n ti’n, be nun wie’m bé kún be wiengu. I kwlaa yoli-o, bé wún i wlɛ kɛ Ɲanmiɛn yɛ ɔ nin be su kun-ɔn.—Ezekiɛli 38:21, 23; Zakari 14:13.

 ?Asiɛ’n núnnún mlɔnmlɔn Aamagedɔn alɛ’n nun? Cɛcɛ. Afin asiɛ’n yó klɔ sran’m be tranwlɛ tititi. (Jue Mun 37:29; 96:10; Akunndanfuɛ’n 1:4) Ɔ maan Aamagedɔn’n ɔ su yoman sran’m be nunnunlɛ, ɔ́ yó be delɛ. Afin Ɲanmiɛn i sufuɛ “kpanngban kpa” bé fín nun bé fíte.—Sa Nglo Yilɛ 7:9, 14; Jue Mun 37:34.

 Biblu’n nun’n, ɔ ju wie’n kɛ be se kɛ “mɛn’n” be nga be yo ɲin kekle Ɲanmiɛn su’n be ndɛ yɛ be kan-ɔn. (1 Zan 2:15-17) I sɔ’n ti yɛ Biblu’n se kɛ Aamagedɔn alɛ’n ɔ́ yó “mɛn’n i awieliɛ’n” niɔn.—Matie 24:3.

 ?Blɛ benin nun yɛ bé kún Aamagedɔn alɛ’n niɔn? Kɛ Zezi kán ‘ɲrɛnnɛn dan’n’ m’ɔ́ wíe Aamagedɔn alɛ’n nun’n i ndɛ’n, ɔ seli kɛ: “Cɛn sɔ’n, ɔ nin dɔ sɔ’n, sran fi siman be. Ɲanmiɛn su lɔ anzi mun be siman be, Ba’n bɔbɔ siman be. Saan Siɛ’n i kunngba cɛ yɛ ɔ si be-ɔ.” (Matie 24:21, 36) Biblu’n se kɛ blɛ mɔ Zezi o lɛ’n i nun yɛ bé kún Aamagedɔn alɛ’n niɔn. Blɛ sɔ’n boli i bo afuɛ 1914 nun.—Matie 24:37-39.