5 ?Cɛn wie lele’n ɲrɛnnɛn’n wíe?
?Ngue ti yɛ kosan sɔ’n ti cinnjin-ɔn?
Ɔ ti cinnjin afin sɛ e lafi su kɛ ɲrɛnnɛn m’ɔ o e su’n wíe’n, i sɔ’n úka e naan e mɛn dilɛ’n w’a yo kpa w’a tra laa’n. I kpa bɔbɔ’n, ɔ́ sú e bo naan y’a fa e wun y’a mantan Ɲanmiɛn.
Bu ndɛ nga i sin nian
Sran sunman be kunndɛ kpa kɛ bé yó naan ɲrɛnnɛn’n wie asiɛ’n su. Sanngɛ be kwlɛmɛn i yo. Nian ndɛ nga mun:
Kannzɛ sran’m b’a ɔ be ɲrun sran’m be ayre yolɛ nun’n, sanngɛ...
-
Awlɛn ba ya’n te kun sran kaka.
-
Afuɛ kwlaa nun’n, kansɛli te kun sran miliɔn kaka.
-
Davidi Blumun m’ɔ ti fluwa sifuɛ dan kpa kun’n klɛli i kɛ: “Dɔɔtrɔ’m be siman tukpacɛ wie’m be ayre. Tukpacɛ uflɛuflɛ wie mun nin tukpacɛ nga b’a sa be sin ekun’n be te kle sran’m be yalɛ.”—Frontiers in Immunology
Kannzɛ lika wie’m be nun sran’m be le sika kaka’n, sanngɛ...
-
Afuɛ kwlaa nun’n, ba kanngan miliɔn kaka be wu. I li lika nga sran’m be di yalɛ lɔ’n, yɛ i sɔ sa’n ju kpɛ sunman-ɔn.
-
Lika nga sran miliaa kpanngban be tran nun’n, ɔ timan sanwun.
-
Sran miliɔn kaka be ɲanman nzue kpa be nɔnman.
Kannzɛ sran kaka be si kɛ ninnge wie’m be o lɛ’n ɔ fataman kɛ be fa yo sran’n, sanngɛ...
-
Nvle kaka nun’n, be te yo sran wie’m be atɛ. Yɛ be nga be yo sɔ’n, be diman be jɔlɛ. Sa nga ti yɛ ɔ ti sɔ’n, anuannzɛ nga be flɛ i kɛ ONU kɛnnin i ndɛ. Ɔ seli kɛ awa wie’m “be siman kɛ be yo sɔ be nvle liɛ’n nun annzɛ kusu be leman like nga be kwla fa tra sran sɔ mun’n.”
A KWLA SI NUN KPA EKUN
Kɔ jw.org su naan ko nian video ng’ɔ suan ?Ngue yɛ be flɛ i Ɲanmiɛn Sielɛ’n niɔn?
Ndɛ nga Biblu’n kan’n
E ndɛ lo Ɲanmiɛn.
Kɛ e wun ɲrɛnnɛn mɔ e kplin’n, ɔ yo i ya.
“[Ɲanmiɛn] yoman ɲrɛnnɛnfuɛ’n i finfin, ɔ yimɛn i ase, ɔ kacimɛn i sin simɛn i. Sanngɛ kɛ ɲrɛnnɛnfuɛ sɔ’n ɔ kpan flɛ i’n, ɔ sie i su ɔ ti.”—JUE MUN 22:25.
“An fa amun su sa’n kwlaa wlɛ i Ɲanmiɛn sa nun, afin amun ndɛ lo i.”—1 PIƐLI 5:7.
E su wunman e ɲrun sa trilili.
Biblu’n kle weiin kɛ like nga Ɲanmiɛn sunnzunnin kɛ ɔ́ yó mán e’n, ɔ́ kpɛ́n su.
“Ɲanmiɛn [...] núnnún be ɲinmuɛn’n kwlaa, wie’n su tranman lɛ kun, be su yoman sɛ kun, be su sunman kun, be su wunman ɲrɛnnɛn kun. Laa ninnge’m be nunman lɛ kun.”—SA NGLO YILƐ 21:3, 4.
Ɲanmiɛn wá núnnún ninnge kwlaa nga be fa ɲrɛnnɛn fa yi klɔ sran’m be su’n
Ɔ́ sín Famiɛn Dilɛ kun i lika yɛ ɔ́ yó i sɔ-ɔ. Biblu’n kle kɛ Famiɛn Dilɛ sɔ’n ti awa kun.
“Ɲanmiɛn m’ɔ o nglo lɔ’n ɔ́ síe famiɛn diwlɛ kun m’ɔ su saciman le, yɛ mɛn uflɛ su siemɛn i le. [...] Ɔ́ ká lɛ tititi.”—DANIƐL 2:44.