Kosan sɔ’n i su tɛlɛ’n kwla kaci e akunndan’n.

Ɲanmiɛn yili ninnge’m be nglanmannglanman kpa. ?Ɲanmiɛn kun m’ɔ yo sɔ’n, ɔ kwla yi klɔ sran’m be kɛ be wun ɲrɛnnɛn?

Be nga be suman Ɲanmiɛn’n be waan ɲrɛnnɛn mɔ e wun i’n kle kɛ e ndɛ loman Ɲanmiɛn annzɛ ɔ nunman lɛ. Be lafi su kɛ sa nga ti yɛ e wun ɲrɛnnɛn’n, yɛle kɛ (1) Ɲanmiɛn kwlá yiman e su afɛ’n, annzɛ (2) Ɲanmiɛn kunndɛman kɛ ɔ́ yí e su afɛ’n, annzɛ kusu (3) Ɲanmiɛn nunman lɛ.

?Be ndɛ sɔ’n ti su? ?Annzɛ sa uflɛ ti yɛ e wun ɲrɛnnɛn-ɔn?

Ɲanmiɛn w’a yiman e kɛ e wun ɲrɛnnɛn.

Ɔ kunndɛ kɛ e di aklunjuɛ.

“Like ng’ɔ ti kpa man sran’n yɛlɛ aklunjuɛ dilɛ nin mɛn dilɛ blɛ b’ɔ tɛ o mɛn’n nun’n. Yɛ n wunnin kɛ blɛ bɔ sran kun di like b’ɔ nɔn nzan’n b’ɔ di i sa ti junman’n i nuan like’n, Ɲanmiɛn yɛ ɔ fɛ i sɔ’n mɛn i-ɔ.”​—AKUNNDANFUƐ’N 3:12, 13.

Ɲanmiɛn mannin yasua nin bla klikli’m be like kpakpa kwlaa naan b’a fɛman.

W’a sunnzunman kɛ be bɔbɔ annzɛ be anunman’m be fɛ.

“Ɲanmiɛn [...] seli be kɛ: ‘An trɛ, an sɔn kpa, an yi asiɛ’n, an sie i.’”​—BO BOLƐ 1:28.

Klɔ sran nɲɔn klikli’m b’a kplinman su kɛ Ɲanmiɛn sie be.

I sɔ mɔ be yoli’n ti’n, be fali ɲrɛnnɛn yili i be bɔbɔ nin be anunman’m be kwlaa be su.

“Sran kunngba ti yɛ sa tɛ yolɛ’n bali mɛn’n nun-ɔn. Yɛ sa tɛ’n kusu ti yɛ wie’n bali-ɔ. Yɛ wie’n tɔli sran’m be kwlaa be su, afin be kwlaa be yoli sa tɛ.”​—RƆMUNFUƐ MUN 5:12. *

Ɲanmiɛn w’a yiman e kɛ e sie e bɔbɔ e wun.

Ɲanmiɛn w’a yiman e kɛ e tran nzue bo lɔ. I wafa kunngba’n, w’a yiman e kɛ e sie e bɔbɔ e wun.

“Ajalɛ ng’ɔ [sran] tu’n ɔ finmɛn i.”​—ZEREMI 10:23.

Ɲanmiɛn kunndɛman kɛ e wun ɲrɛnnɛn.

Ɔ kunndɛman kɛ e yo like wie m’ɔ́ fá e yi afɛ nun-ɔn.

“Sɛ ɔ ti kɛ amun sieli amun su mmla nga m mannin amun’n i bo’n, wuun amún dí alaje. Sɛ alaje sɔ’n ti nzue’n, nn ń sé kɛ ɔ́ yó kɛ nzue ba kun m’ɔ sonji kpuu m’ɔ kpɛman’n sa.”​—EZAI 48:18.