Siansifuɛ wie mɔ be fa be ɲin be sie i lika’n i lolɛ mɔ w’a lo’n su’n yɛ be kannin ndɛ sɔ’n niɔn. Sɛ amun lafi su kɛ Ɲanmiɛn yɛ ɔ yili ninnge mun naan sran’m be ndɛ lo i’n, nn atrɛkpa’n ndɛ nga siansifuɛ’m be kɛnnin i lɛ’n ti’n, amún wlá kpɛ́n wafa nga Ɲanmiɛn yili asiɛ’n i su. Wafa nga Ɲanmiɛn yili asiɛ’n ti’n, sɛ be saci asiɛ’n ɔ kwla sin i osu laa’n nun ekun.

Sanngɛ kɛ mɔ sran’m b’a saci asiɛ’n i dan’n ti’n, asiɛ’n i bɔbɔ ngunmin kwlá yoman naan w’a sin i osu laa’n nun ekun. ?Ngue ti yɛ e kwla lafi su kɛ Ɲanmiɛn yó maan asiɛ’n yó kpa-ɔ?

Biblu’n nun ndɛ mma nga’m be kle kɛ asiɛ’n sín i osu laa’n nun, yɛ ɔ́ yó klanman kpa.

• Ɲanmiɛn yɛ ɔ yili asiɛ’n niɔn. . “I bo bolɛ’n nun’n, Ɲanmiɛn yili nglo nin asiɛ’n.”—Bo Bolɛ 1:1.

• Ɲanmiɛn liɛ yɛle asiɛ’n. “Asiɛ’n, ɔ nin i su ninnge’n kwlaa be ti Zoova a liɛ.”—Jue Mun 24:1.

• Wafa nga Ɲanmiɛn yili asiɛ’n ti’n sɛ be saci i’n, ɔ kwla sin i osu’n nun ekun. “Ɔ wlali asiɛ’n i bo ase kekle kpa, ɔ su tumɛn i bo i osu’n nun le.”—Jue Mun 104:5.

• Ɲanmiɛn ta e nda kɛ asiɛ’n su kaman ngbɛn. ‘Ɲanmiɛn Kpli m’ɔ yili asiɛ’n, nán ngbɛn ti yɛ ɔ yili-ɔ, sanngɛ ɔ yili i kɛ be tran su.’—Ezai 45:18.

• Ɲanmiɛn tali nda kɛ sran’m bé trán asiɛ’n su tititi. “Asiɛ’n yó sran kpa’m be liɛ, yɛ bé trán su tititi.”—Jue Mun 37:29.

Wafa nga Ɲanmiɛn yili asiɛ’n ti’n, sran’m be su kwlá sacimɛn i mlɔnmlɔn le. Biblu’n se kɛ Zoova wá núnnún klunwifuɛ mɔ be saci asiɛ’n blɛ ng’ɔ sieli’n su.—Sa Nglo Yilɛ 11:18.

Biblu’n se kɛ Ɲanmiɛn wá yó maan asiɛ’n káci lika klanman kpa kun, kpɛkun ‘ɔ́ trɛ́ i sa’n nun, yɛ ɔ́ mán ninnge nga be o nguan nun’n be like ng’ɔ ju be’n.’—Jue Mun 145:16.