Sika nga sran’m be saci i alɛ kunlɛ nun’n, ɔ timan aɔwi.

•   Zronali kun seli kɛ: “Kɛ e kan sika nga afuɛ sin’n, awa nga be o mɛn wunmuan’n nun’n be sacili be alɛ nun’n e bo nun’n, ɔ ju miliaa akpiakpi blu-nin-nsan miliaa ya nɲɔn tra su. Lele nin kɛ afuɛ 2023 fá jú’n, be nin-a saciman sika kpanngban kɛ ngalɛ’n sa alɛ kunlɛ nun le.”—The Washington Post, afuɛ 2024, Fevrie i le 13 su’n.

 Sanngɛ nán sika ngunmin yɛ sran’m be saci i-ɔ. Alɛ nga be kun i Ikrɛnin lɔ’n kle sɔ weiin.

•   Sonja mun. Sran’m be kun alɛ Ikrɛnin lɔ i afuɛ nɲɔn yɛ. Fluwa sifuɛ wie’m be waan kɛ ɔ fɛ i cɛn nga alɛ’n boli i bo lele w’a fa ju andɛ’n, sonja nga be wuli annzɛ like yaya yoli be’n, be kwla ju sran akpiakpi ya nnun (500.000).

•   Be nga be kunman alɛ’n wie’n. Anuannzɛ nga be flɛ i ONU seli kɛ be nga be wuli alɛ sɔ’n nun annzɛ be yoli be like yaya’n, be tra sran akpiakpi ablaɔn-nin-mɔcuɛ (28.000). Anuannzɛ sɔ’n i su kpɛnngbɛn’n kun seli kɛ: “Be nga alɛ’n ti’n, be sa nun ninnge’m be fili be sa’n, be sɔnnin dan ti’n, e kwlá boman be nuan trele sa.” a

 Alɛ’m be ti’n, sran’m be wun be ɲrun kpa asiɛ wunmuan’n su.

•   Kɛ ɔ fɛ i afuɛ 2023 Sɛptanblu anglo nun’n, be nga alɛ nin nzaje sa’m be ti be jasoli be tranwlɛ’m be nun’n, be ti sran miliɔn ya kun blu-nin-nnan.

•   Mɛn wunmuan’n nun’n, be nga be ɲanman aliɛ kpa sa be diman’n, be ti sran miliɔn ya nso sran ablaɔcuɛ-nin-nsan. Anuannzɛ kun seli kɛ: “Blɛ sunman’n, alɛ’n ti yɛ awe’n kun sran mun-ɔn. Yɛ mɛn wunmuan’n nun’n, be nga be ɲanman like kpa sa be diman’n, be sunman lika be tran lika nga sran’m be kun alɛ lɔ’n be nun.”—Programme Alimentaire Mondial.

 ?Cɛn wie lele’n, alɛ kunlɛ’n wíe? ?Blɛ wie wá jú’n, sran’m bé dí fɔundi asiɛ’n su? ?Sran’m be su diman yalɛ kun? ?Ɔ maan sran’m be kwlaa bé ɲán like bé dí? ?Ndɛ benin yɛ Biblu’n kan-ɔn?

 Biblu’n kannin sran kun m’ɔ o nnɛn kpanngɔ kun su’n i ndɛ. Ɔ seli kɛ ɔ ti alɛ mɔ bé wá kún be mɛn wunmuan’n nun’n i nzɔliɛ.

•   “Kpɛkun nnɛn kpanngɔ uflɛ fiteli. Ɔ ti ɔkwlɛ kɛ sin sa. Be mannin sran ng’ɔ ti su’n i atin kɛ ɔ yo naan fɔundi’n tu asiɛ’n su naan klɔ sran’m be kun be wiengu. Kpɛkun be mɛnnin i tokofi dan kpa kun.”—Sa Nglo Yilɛ 6:4.

 Sran nɲɔn mɔ be o nnɛn kpanngbɔ’m be su’n, be suli i su. Be ti awe nin wie’n be nzɔliɛ. Tukpacɛ tɛ annzɛ sa uflɛ wie’m be ti’n, sran kpanngban be wu. (Sa Nglo Yilɛ 6:5-8) Sɛ a kunndɛ kɛ á sí Biblu’n nun ndɛ sɔ’n i kpa ekun’n ɔ nin like ng’ɔ kle kɛ ndɛ sɔ’n su kpɛn su andɛ’n, kanngan ndɛ akpasua nga nun: “?Ngue yɛ sran nnan sɔ’m be ti be nzɔliɛ-ɔ?”

 Ɔ cɛ kan’n, sran’m be su faman asiɛ’n su ninnge mun kunman alɛ kun. Sanngɛ nán klɔ sran’m be ti yɛ sa sɔ’n jú-ɔ. Ɲanmiɛn Ndɛ’n se kɛ:

•   Ɲanmiɛn yó maan ‘alɛ kunlɛ’n wíe asiɛ wunmuan’n su.’—Jue Mun 46:9.

•   Ɲrɛnnɛn nga alɛ’n ti’n sran’m be wun be’n, Ɲanmiɛn wá núnnún be kwlaa. “Ɔ́ núnnún be ɲinmuɛn’n kwlaa, wie’n su tranman lɛ kun, be su yoman sɛ kun, be su sunman kun, be su wunman ɲrɛnnɛn kun. Laa ninnge’m be nunman lɛ kun.”—Sa Nglo Yilɛ 21:4.

•   Ɲanmiɛn wá yó maan sran’m be kwlaa be wun wá jɔ́ be fɔuun. Ɔ seli kɛ: “Min nvlefuɛ’m bé wá trán lika fɔun kun nun, bé trán sua kpa nun, yɛ bé trán wunmiɛn lolɛ lika mɔ be ti diin’n be nun.”—Ezai 32:18.

 Biblu’n kɛnnin i kɛ alɛ nin sa uflɛ nga e wun be andɛ’n be kle kɛ ɔ ka kan’n sran’m be wun jɔ́ be fɔuun.

 Ɲanmiɛn Sielɛ’n, mɔ yɛle i awa m’ɔ o ɲanmiɛn su lɔ’n ti’n, sran’m be wun wá jɔ́ be kpa fɔuun. (Matie 6:10) Sɛ a kunndɛ kɛ á sí Ɲanmiɛn Sielɛ’n i su like kpa ekun ɔ nin wafa ng’ɔ kwla yo ɔ ye’n, nian video nga be flɛ i ?Ngue yɛ be flɛ i Ɲanmiɛn Sielɛ’n niɔn?