Fluwa nga Pɔlu klɛli Kolɔsufuɛ mun’n 3:1-25
3 Sanngɛ kɛ mɔ be cɛnnin amun nin Klisi’n+ ti’n, maan amun kunndɛ nglo lɔ ninnge mun titi. Lɔ yɛ Klisi wo-ɔ. Ɔ ti Ɲanmiɛn i sa fama su.+
2 Asa ekun’n, maan amun akunndan’n tran nglo lɔ ninnge’m be su titi,+ nán maan ɔ tran asiɛ’n su wa ninnge’m be su.+
3 Afin amun wuli. Yɛ be fali amun nguan’n fiali Klisi nun kɛ nga Ɲanmiɛn bɔbɔ fa klo’n sa.
4 Cɛn nga Klisi m’ɔ ti e nguan’n+ wá yí i wun nglo’n, amun kusu bé wá yí amun nglo wie, yɛ amún ɲán ɲrun kɛ i sa wie.+
5 I sɔ’n ti’n, amun wla amun asiɛ’n su wa nzuɛn’m* be ase.+ Be yɛle bla nin bian kunndɛlɛ sukusuku nin i wunsu ɲannzuɛn sa mun,* ɔ nin sa kainkain’m be yolɛ’n, ɔ nin be konvi m’ɔ sɔ bla nin bian kunndɛlɛ sukusuku’n,+ ɔ nin konvi tɛ’n, ɔ nin aɲinkpli m’ɔ nin amuin sɔlɛ’n ti kun’n.
6 Ninnge sɔ’m be yolɛ’n ti yɛ Ɲanmiɛn wá yí i ya’n i nglo-ɔ.
7 Kusu laa’n, ninnge sɔ’m be yolɛ’n ti amun nzuɛn.+
8 Sanngɛ siɛn’n, maan amun wla ninnge nga’m be kwlaa be ase: Ya ble falɛ, nin awlɛn fufu, ɔ nin sa tɛtɛ’m be yolɛ,+ nin nzowa,+ ɔ nin be nvialiɛ nun lika’m be su aɔwi dilɛ’n.+ Nán maan ndɛ kɛ ngalɛ sa’m be fin amun nuan fite.
9 Asa ekun’n, nán maan amun bua ato kle amun wiengu.+ Amun kplo amun nzuɛn* laa’n+ nin i wunsu ninnge nga amun yo be’m be kwlaa gua,
10 kpɛkun amun fa nzuɛn uflɛ’n.+ Ndɛ nanwlɛ’n i silɛ’n ti’n, nzuɛn sɔ’n ɔ yo uflɛ tititi. Ɔ maan ɔ fa Sran ng’ɔ yili nzuɛn sɔ’n i liɛ’n.+
11 Be nga be fa nzuɛn uflɛ sɔ’n, sɛ wie ti Glɛki-o, sɛ wie ti Zifu-o, sɛ be wlali wie klɛn-o, sɛ b’a wlaman wie klɛn-o, sɛ wie ti mɛn uflɛ nunfuɛ-o, sɛ wie ti Sitifuɛ-o,* sɛ wie ti kanga-o, sɛ wie ti diewa-o, be kwlaa be sɛ. Sanngɛ Klisi ti like kwlaa, yɛ ɔ o like kwlaa nun.+
12 I sɔ’n ti’n, kɛ mɔ Ɲanmiɛn fali amun’n,+ mɔ amun ti i liɛ’n, m’ɔ klo amun ti’n, maan amun si sran aunnvɔɛ,+ amun yo sran ye, amun yo wun ase kanfuɛ,+ amun yo wɛtɛɛfuɛ,+ kpɛkun amun tra amun awlɛn.+
13 Sɛ amun wiengu yo amun sa’n, maan ɔ sɔn amun nun. Asa ekun’n, kannzɛ be loli sran kun i ngasi’n,+ maan ɔ yaci sa nga be yoli i’n ɔ cɛ klun ufue su.+ Wafa kunngba nga Zoova* yacili sa nga amun yoli i’n cɛli amun klun ufue’n su’n, amun kusu amun yo sɔ wie.+
14 Ng’ɔ o su ekun’n, yɛle kɛ maan amun kle kɛ amun klo amun wiengu.*+ Afin i sɔ’n yo maan sran’m be afiɛn sɛ kpa.+
15 Asa ekun’n, maan Klisi i aunjɔɛ’n sie amun awlɛn’n.+ Afin be flɛli amun kɛ amun yo sran wunmuan. Asa kusu’n, maan amun kle kɛ amun si ye.
16 Maan Klisi i ndɛ’n tran amun nun naan amun yo ngwlɛlɛfuɛ. Maan amun kle amun wiengu like titi, yɛ amun wla amun wiengu fanngan* titi. Kɛ amún yó sɔ’n, maan amun to jue,+ amun manman Ɲanmiɛn, amun to Ɲanmiɛn sulɛ jue be fa kle kɛ amun si ye, amun tu amun klun be to jue* be manman Zoova.*+
17 Sɛ amún yó like wie annzɛ sɛ amún kán ndɛ wie’n, maan amun yo i kwlaa sɔ’n e Min Zezi i dunman nun. Kɛ amún yó sɔ’n, maan amun la e Si Ɲanmiɛn ase i dunman nun.+
18 Bla mun, maan amun lo amun wun man amun wun mun.+ Afin i sɔ’n ti kpa e Min’n i ɲrun.
19 Yasua mun, amun klo amun yi mun titi,+ yɛ nán amun fa be wun ya.*+
20 Ba mun, maan amun ɲin yi amun si mun nin amun nin mun sa’n kwlaa nun,+ afin i sɔ’n jɔ e Min’n i klun.
21 Siɛ mun, nán amun fɔkɔ amun mma’m be awlɛn+ naan be wla bo.*
22 Kanga mun, maan amun ɲin yi amun min mun sa’n kwlaa nun.+ Nán kɛ be ɲin ta amun mɔ amun kunndɛ kɛ sran’m be klun jɔ amun wun’n i ngunmin ti yɛ ɔ fata kɛ amun yo sɔ-ɔ. Sanngɛ kɛ mɔ amun sro Zoova* mɔ amun buman akunndan tɛ’n, i ti yɛ ɔ fata kɛ amun yo sɔ-ɔ.
23 Like kwlaa nga amún yó’n, maan amun tu amun klun yo i kɛ Zoova* yɛ amun su yo mɛn i sa.+ Nán maan ɔ yo kɛ klɔ sran yɛ amun su yo mɛn i-ɔ.
24 Afin amun si kɛ aja like nga amún ɲɛ́n i’n, ɔ fin Zoova.*+ Maan amun di junman kekle man Klisi m’ɔ ti e Min’n.
25 Sran ng’ɔ yo sa tɛ’n, ɔ́ ɲán sa tɛ ng’ɔ yo’n i nuan like.+ Afin Ɲanmiɛn kpaman sran nun.+
Ja ngua lɔ ndɛ mun
^ Annzɛ “amun wunnɛn’n i likalika mun.”
^ Glɛki nun: pɔɔneia. Nian Ndɛ’m be bo tulɛ lika’n nun lɔ.
^ Glk., “sran.”
^ Laa’n, be nga be nzuɛn’n ti’n, sran’m be buman be sran’n, yɛ be flɛ be Sitifuɛ-ɔ.
^ Annzɛ “maan amun fa klolɛ’n wla amun wun kɛ tralɛ sa.”
^ Annzɛ “amun tu amun wiengu fɔ.”
^ Annzɛ “amun to jue amun klun lɔ.”
^ Annzɛ “nán amun yo be kpokokpoko.”
^ Annzɛ “be sa sin bubu be.”
