Ɲanndra Mun 15:1-33
15 Kɛ a tɛ sran su amanniɛn* su’n, ɔ guɛ i ya’n i ase,+sanngɛ be nuan nunndɛ ng’ɔ yra fiaan’n,ɔ klɔklɔ ya.+
2 Kɛ ngwlɛlɛfuɛ’n kán ndɛ’n, ɔ fa sa ng’ɔ si i’n yosran ye,+sanngɛ ndɛ ng’ɔ fin sinnglinfuɛ’n i nuan nun fite’n, ɔ ti sinnzin ndɛ ngunmin.
3 Zoova i ɲin ta lika kwlaa,i sran tɛ-o, i sran kpa-o, i ɲin ta be kwlakwla.+
4 Ndɛ nga be kɛn i wɛtɛɛ su’n,* ɔ ti kɛ nguanwaka sa,+sanngɛ gblɛ ndɛ’n bosran wla.
5 Sinnglinfuɛ’n buman fɔ nga i si tu i’n i like fi,+sanngɛ akunndanfuɛ’n fa ngwlɛlɛ nga be klei’n* su.+
6 Be diman ninnge kpakpa’m be yalɛ sran ng’ɔ yo sa i nuan su’n i sua’n nun,sanngɛ klunwifuɛ’n i like ng’ɔ ɲɛn i’n, ɔ mɛn i ndɛ.+
7 Kɛ ngwlɛlɛfuɛ’m be uke be nuan’n, ɔ ti like silɛ ngunmin,+sanngɛ sinnglinfuɛ’m be awlɛn’n timan sɔ.+
8 Zoova i ɲin ci tɛ nga klunwifuɛ’m be yi’n,+sanngɛ kɛ be nga be nanti seiin’n be srɛ i’n, ɔ yo i fɛ.+
9 Zoova kloman klunwifuɛ’m be ayeliɛ’n,+sanngɛ ɔ klo sran ng’ɔ kunndɛ titi kɛ ɔ́ yó sa i nuan su’n.+
10 Sran ng’ɔ yaci atin kpa’n i su nantilɛ’n, ɔ kloman fɔ nga be tu i’n,*+sanngɛ sran ng’ɔ kloman kɛ be ijɔ i’n, ɔ́ wú.+
11 Zoova i ɲin ta Ndia’n* nin lika nga like saci lɔ’n* be weiin.+Sɛ ɔ ti sɔ’n, nán klɔ sran’m be awlɛn’n yɛ ɔwunmɛn i-ɔ.+
12 Sran ng’ɔ yo sran finfin’n, ɔ kloman sran ng’ɔ kle i ngwlɛlɛ’n* i sa.+Ɔ su ko usaman ngwlɛlɛfuɛ’n ingwlɛlɛ afɛ.+
13 Aklunjɔɛ’n yo maan be ɲrun’n kpaja.Sanngɛ awlabɔɛ’n sanngan be akunndan.+
14 Like nga sran ng’ɔ bu sa sin’n i awlɛn o su’n yɛlesa silɛ,+sanngɛ sinnzin’n yɛ ɔ ti sinnglinfuɛ’n i nuan nun aliɛ-ɔ.*+
15 Ɲrɛnnɛnfuɛ’n i cɛn’m be kwlaa be ti tɛ kpan,+sanngɛ sran nga i klun ti jɔwa’n,* cɛn yɛ ɔ di i sa trilili-ɔ.+
16 Sɛ ɔ li a sro Zoova naan like nga a le i’n ti kaan’n,+ɔ flunman tra kɛ w’a ɲan ninnge kpanngban naan ɔ wla guaman ase’n.*+
17 Sɛ a ɲan like kan di naan klolɛ o lɛ’n,+ɔ flunman tra kɛ w’a ɲan nannin nga w’a lo kpa’n mɔ sanngɛ kpɔlɛ o lɛ’n.+
18 Sran nga i awlɛn’n ti fufu’n, ɔ klɔklɔ ngondin,+sanngɛ sran ng’ɔ faman ya ndɛndɛ’n, ɔ yo maan be yaci ndɛ’n nun.+
19 Fuɛnfuɛ’n i atin’n ti owieowie ngunmin,+sanngɛ sran ng’ɔ nanti seiin’n i atin’n ti kɛ akpɔ dan kun m’ɔ ti weiin’n sa.+
20 Ba ng’ɔ ti ngwlɛlɛfuɛ’n, ɔ yo maan i si i klun jɔ,+sanngɛ sran ng’ɔ ti sinnglinfuɛ’n, ɔ bumɛn i nin’n i sran.+
21 Sran nga ngwlɛlɛ’n timɛn i’n,* i sinnzin like ng’ɔ yo’n mɛn i aklunjɔɛ,+sanngɛ sran ng’ɔ wun sa wlɛ’n, ɔ nanti kɔ i ɲrun ndɛnman su.+
22 Kɛ be usaman ngwlɛlɛ afɛ’n,* like nga be waan bé yó’n, ɔ yoman ye,sanngɛ kɛ afɔtuɛ manfuɛ’m be sɔn’n, ɔ yo ye.+
23 Kɛ be usa ndɛ mɔ sran kun tɛ su klanman’n, ɔ di su aklunjɔɛ,*+yɛ ndɛ ng’ɔ ju i kanlɛ sɛsɛsɛ mɔ be kan’n, i kpa liɛ’n be kanman.+
24 Sran ng’ɔ ti akunndanfuɛ’n, ɔ o nguan atin’n su, yɛ atin sɔ’n kɔ nglo.+Ɔ faman atin ng’ɔ jra Ndia’n* nun lɔ’n su.+
25 Zoova búbú sran ng’ɔ tu i wun’n i sua’n,+sanngɛ ɔ́ sásá angbeti bla’n i lika liɛ’n.*+
26 Zoova i ɲin ci like nga klunwifuɛ’n gugu kɛ ɔ́ yó’n,+sanngɛ ndɛ fɛfɛ nga be kan’n, ɔ bu i like kpa.+
27 Sran ng’ɔ di sran lufle ɔ fa ɲɛn i wun’n, ɔ kpɛ ndɛ* mɛn i awlofuɛ mun,+sanngɛ sran nga i ɲin ci adi ninnge mun’n, ɔ́ ká nguan nun.+
28 Sran ng’ɔ yo sa i nuan su’n, ɔ bu ndɛ sin i klun lɔ naan w’a tɛ su,*+sanngɛ ndɛ tɛtɛ’n yɛ ɔ fin klunwifuɛ’m be nuan nun fite-ɔ.
29 Zoova nin klunwifuɛ’m be afiɛn ti nun kpa,sanngɛ ɔ tie be nga be yo sa i nuan su’n be srɛlɛ’n.+
30 Be ɲrun m’ɔ ti kpajawa’n,* ɔ man sran aklunjɔɛ.Jasin fɛ’n kusu wla fanngan.*+
31 Sran ng’ɔ fa afɔtuɛ ng’ɔ man nguan’n su’n,be kwla fɛ i wla ngwlɛlɛfuɛ’m be nun.+
32 Sran ng’ɔ faman fɔ nga be tu i’n, ɔ bumɛn i nguan’n i like fi,+sanngɛ sran nga kɛ be ijɔ i’n ɔ sie i su tie’n, ɔ wun sa wlɛ.*+
33 Zoova i srolɛ’n kle sran ngwlɛlɛ,+yɛ wun ase kanlɛ’n yɛ ɔ fa aɲrunɲan’n ba-ɔ.+
Ja ngua lɔ ndɛ mun
^ Annzɛ “wɛtɛɛ.”
^ Annzɛ “Ndɛ ng’ɔ yo sran juejue’n.”
^ Annzɛ “ijɔlɛ nga be ijɔ i’n.”
^ Annzɛ “ɔ bu i kɛ be tuli i fɔ kekle dan.”
^ Annzɛ “nin Abadɔn.”
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
^ Annzɛ “sran ng’ɔ ijɔ i’n.”
^ Annzɛ “i like ng’ɔ kunndɛ’n niɔn.”
^ Annzɛ “kpa’n.”
^ Annzɛ “naan ɔ akunndan’n ti sannganwa’n.”
^ Ebr., “Sran ng’ɔ leman awlɛn ba’n.”
^ Annzɛ “Kɛ be kokoman yalɛ nvialiɛ nun’n.”
^ Ebr., “i su tɛlɛ ng’ɔ o i nuan nun’n ti’n i klun jɔ.”
^ Annzɛ “Seɔlu’n.” Nian Ndɛ’m be bo tulɛ lika’n nun lɔ.
^ Ebr., “i awɛ mun.”
^ Annzɛ “ɲannzuɛn.”
^ Annzɛ “ɔ bu wafa ng’ɔ́ tɛ́ su’n i akunndan kpa, ɔ bu ndɛ sin naan w’a ijɔ.”
^ Ebr., “yo maan lui tran be owie’n nun.”
^ Annzɛ “Be ɲinma m’ɔ sɔ’n.”
^ Ebr., “ɔ ɲan awlɛn ba.”
