Menurut hamu, boi dope dibedahon dia na sittong dohot na sala? Godang halak saonari dang mangalului aha fakta na sebenarna. Alai holan pandanganna sandiri dohot perasaanna do na diandalhon. Alani i do godang halak mandok, dang adong be hasittongan.

 Sian najolo nungnga godang halak na marpikkir songon i. Hira-hira 2.000 taon naung salpu, disukkun Gubernur Rom na margoar si Pontius Latus do tu Jesus, “Ai aha do huroa hasittongan i?” (Johannes 18:38) Sebenarna, dang serius ibana naeng mamboto aha alusna. Alai sukkun-sukkun na massai penting do i. Jala adong do alus ni i di Bibel. Boi do i mangurupi hamu mamboto dia do na sittong dohot dia do na sala, nang pe godang halak saonari dang mamboto i.

Adong dope hasittongan i?

 Adong. Di Bibel jotjot do hata “hasittongan” dipakke lao mandok aha fakta na sebenarna manang songon dia moral na denggan di jolo ni Debata. Sian Debata Jahowa a do ro hasittongan. Alani i ma didok do Ibana “Debata na makkatahon na sittong”. (Psalmen 31:5) Sude hasittongan na adong di Bibel, sian Debata do i. Dipatudos do i songon lampu na boi manogu-nogu hita di portibi na holom saonari on.—Psalmen 43:3; Johannes 17:17.

Boha do carana asa taboto hasittongan i?

 Dang lomo roha ni Debata asal porsea hita tu sude na adong di Bibel. Alai dipangido Ibana do asa tapakke kemampuan berpikirta lao mamareso i, jala dang holan mangandalhon perasaanta. (Rom 12:1) Lomo do roha ni Debata asa tatanda jala tahaholongi Ibana ‘sian nasa pikkiranta’. Jala dipangido Ibana do asa tapareso aha na taparsiajari sian Bibel jala tabuktihon tutu do i hasittongan manang na dang.—Mateus 22:37, 38; Ulaon ni Apostel 17:11.

Ise do sumber ni sude gabus?

 Bibel mandok, Sibolis do na parjolo sahali margabus. Didok do ibana “ama ni gabus”. (Johannes 8:44) Dihatahon do na so sittong taringot Debata tu si Adam dohot si Hawa. (1 Musa 3:1-6, 13, 17-19; 5:5) Mulai sian i, torus ma ibana mandok gabus taringot Debata jala ditabunihon ma hasittongan taringot Debata.—Pangungkapon 12:9.

Boasa lam godang na margabus saonari?

 Ala nungnga mangolu “di ari parpudi” hita saonari, lam sering do Sibolis mandok gabus lao mangaliluhon akka jolma. Alani i ma jolma saonari pe, lam sering do manggabusi donganna lao memanfaatton nasida. (2 Timoteus 3:1, 13) Akka pamimpin agama pe jotjot do margabus. Didok do nasida “guru na holan paboahon hata na tabo begeon”. Jala gabe dibahen nasida do akka jolma ‘dang olo be manangihon hasittongan’.—2 Timoteus 4:3, 4.

Boasa massai penting hasittongan i?

 Asa boi tahaporseai hata ni na asing, ikkon pos do rohatta sittong na didokna i. Alana molo dang pos rohatta tu sasahalak, dang boi akrab hita tu ibana. Lomo do roha ni Debata asa tasomba Ibana mangihutton hasittongan. Didok do di Bibel, “Sude na naeng manomba [Debata] ikkon mangihutton panogu-noguon ni tondi parbadia dohot hasittongan.” (Johannes 4:24) Porlu do taboto hasittongan na adong di Bibel asa boi taboto dia akka ajaran na sala jala asa boi hita malua sian ajaran na so sittong i. Lao mamboto taringot i, jaha ma artikel “Akka Gabus na Mambahen Hita Maol Makkaholongi Debata”.

Boasa lomo roha ni Debata taboto hasittongan?

 Lomo do roha ni Debata mangolu saleleng ni lelengna hamu. Alai ikkon jolo diparsiajari hamu do hasittongan taringot Ibana. (1 Timoteus 2:4) Molo diparsiajari hamu standar ni Debata taringot na sittong dohot na sala jala diulahon hamuna i, boi ma hamu akrab tu Ibana. (Psalmen 15:1, 2) Disuru Debata do Jesus ro tu tano on lao mangurupi jolma mamboto hasittongan. Alani i do lomo roha ni Debata asa tatangihon na diajarhon Jesus.—Mateus 17:5; Johannes 18:37.

Salelengna do adong gabus?

 Daong. Sogo do roha ni Jahowa tu akka jolma na manggabusi donganna lao memanfaatton nasida. Marjanji do Ibana lao pamatehon akka pargabus. (Psalmen 5:6) Molo dung dipasaut Debata i, tergenap ma hatana na mandok, “Na lao martahan do hata na sittong saleleng ni lelengna.”—Poda 12:19.