Taon 1949, pinda ma bapakku sian Jerman tu Australia ala mangalului karejo di pertambangan. Tading ma ibana di Victoria. Jumpang jala marhasohotan ma dohot omakku, tubu ma ahu taon 1953.

Dung pigapiga taon, marsiajar Bibel ma omakku dohot Sitindangi Ni Jahowa. Alai, bapakku ndang porsea tu agama. Garang do ibana, pangarehei, jala jotjot mamungkuli omakku. Las do roha ni omak marsiajar Bibel jala sai tongtong do ibana marsiajar nang pe ingkon martabunitabuni. Tingki ndang di jabu bapak, diajari do ahu dohot anggingku taringot paradeiso, jala dipaboa boi do martua parngoluonnami molo mangulahon prinsip ni Bibel.​—Psalmen 37:10, 29; Jesaya 48:17.

Tingki marumur 18 taon, laho ma ahu sian jabu ala jahat bapakku. Porsea do ahu tu aha na didok Bibel, alai ndang huulahon. Karejo ma ahu gabe tungkang listrik di tambang batubara. Marhasohotan ma ahu tingki marumur 20 taon. Dung tolu taon, tubu ma borungku jala disi ma hurimangi aha na ringkot di ngolungku. Huboto do, Bibel boi mangurupi keluargangku. Marsiajar Bibel ma ahu dohot Sitindangi Ni Jahowa, alai sogo do roha ni tungganeborungku. Tingki dohot ahu tu parpunguan ni nasida, didok tungganeborungku ma, keluargam do pillitonmu manang Sitindangi Ni Jahowa i. Mabiar ma ahu jala ndang marsiajar Bibel be. Alai, gabe manolsoli do ahu ala ndang huihuthon na sintong.

Di sada tingki, dipatudu dongan karejongku ma gombar na rorang. Tabo do idaon, alai dung huida i gabe manolsoli ma ahu. Huingot ma na huparsiajari sian Bibel, na laho uhumon ni Debata nama ahu. Alai lam leleng, lam jotjot do ahu mangida gombar na rorang.

Lobi sian 20 taon, nunga lam dao ahu sian hasintongan na diajarhon omakku. Ala na rorang hupamasuk tu pingkiranku, gabe rorang ma pangkataionku dohot  parniulaonku. Nang pe adong dope tungganeborungku, alai mangalangkup do ahu dohot borua na asing. Di sada tingki, markaca ma ahu jala hudok, ”Ndang lomo rohangku mangida ho.” Ndang huargai be diringku.

Marsirang ma ahu dohot tungganeborungku jala sursar ma parngoluonku. Marsitutu ma ahu martangiang tu Jahowa jala marsiajar Bibel ma ahu muse. Tingki i nunga marujung ngolu bapakku jala omak nunga tardidi gabe Sitindangi Ni Jahowa.

Ndang sai mura ahu mangulahon prinsip ni Bibel, alai saonari marsitutu do ahu asa boi dame pingkiranku songon na didok Bibel. Huorom ma diringku, ndang olo be ahu mangkatahon na rorang, mangulahon parmainanon, mabuk, jala manangko di parkarejoan.

Ndang porsea angka dongan karejongku na naeng marhamubaon ahu. Saleleng tolu taon, sai dielaela nasida do ahu asa huulahon muse songon na uju i. Sipata, ndang boi huorom diringku. Molo muruk ahu hudok ma hata na roa. Pintor didok dongan sakarejongku ma, ”Bah! Nunga mulak be si Joe na uju i.” Dung i, manolsoli ma ahu.

Di parkarejoanku, godang do gombar dohot video na rorang. Jotjot do dongan karejongku mangirim gombar na rorang sian komputer. Sai marsitutu do ahu manundalhon i, alai dijugulhon nasida do mangelaela ahu. Hupaboa ma tu na mangurupi ahu marsiajar Bibel. Sabar do ibana manangihon sude na solot di rohangku. Diurupi do ahu marhite ayat sian Bibel jala dijujui asa hupangido pangurupion sian Jahowa marhite tangiang.​—Psalmen 119:37.

Sada tingki, hupapungu ma sude donganku jala hupangido asa dipatudu nasida dua halak parmabuk. Didok nasida ma, ”Ndang boi dipatudos ho dirim tusi! Alana, nasida marsitutu asa unang mabuk!” Hudok ma, ”Ahu pe songon i do, marsitutu laho manundalhon angka gombar na rorang.” Mulai sian i, diantusi nasida ma jala ndang dielaela nasida be ahu.

Ala diurupi Jahowa, boi do hutundalhon hagaleonki. Taon 1999, tardidi ma ahu gabe Sitindangi Ni Jahowa. Mandok mauliate do ahu tu Jahowa ala dilehon dope tingki asa marhamubaon.

Saonari, huboto ma boasa dihasogohon Jahowa pangalahongku na uju i. Songon Ama parholong, dilinggomi do ahu asa unang sega ala mangida angka na rorang. Tutu ma na didok di Poda 3:5, 6! Didok di ayat i, ”Marhaposan tu Jahowa ma ho sian nasa roham, jala unang marpangunsandean ho tu pingkiranmu sandiri. Sai Ibana ma tanda di nasa dalanmu, asa Ibana patigor angka dalanmu.” Prinsip ni Bibel ndang holan mangalinggomi, alai mangurupi asa marhasil.​—Psalmen 1:1-3.

Najolo, magigi do ahu mangida diringku, alai saonari dame ma roha dohot pingkiranku. Marpamuati do Jahowa jala diurupi do ahu. Di taon 2000, marhasohotan ma ahu tu si Karolin, sahalak Sitindangi na uli jala mangkaholongi Jahowa songon ahu. Martua do parsaripeonnami. Hasurungan do di hami gabe Sitindangi Ni Jahowa di liat portibi on.