Tubu di Paddington do ahu, sada huta na ribur di London, Inggris. Sajabu do ahu dohot tolu angkangku nang omakku. Ndang hea disarihon bapak hami, partenggen do ibana.

Tingki dakdanak, disuru omak do ahu martangiang ganup borngin. Adong do Bibelhu na gelleng na holan marisi buku Psalmen jala jotjot do hubahen i gabe ende. Sai huingot do sada kalimat sian buku singkolangku na mandok, ”Sada tingki ndang adong be ari sogot.” On mambahen ahu jotjot tarsunggul di tingki borngin. Gabe sungkunsungkun ma rohangku, ’Holan songon on do ngolu on? Aha do na tinuju ni ngolungku? Ndang olo ahu mate!’

Alani i, gabe lomo ma rohangku mamboto taringot begu. Laho ma ahu dohot dongan sasingkolangku tu kuburan laho mangkatai tu na mate jala ditonton hami film begubegu. Lomo do rohanami mangulahon i nang pe mabiar.

Dung marumur sampulu taon, ndang boi be ahu diatur. Marisap ma ahu, dung i marganja. Tingki marumur 11 taon, huinum ma siinumon na maralkohol. Nang pe ndang tabo daina, alai lomo do rohangku molo tenggen. Lomo do rohangku tu musik jala marjoget. Molo adong tingkiku laho do ahu tu diskotik. Martabunitabuni do ahu laho tingki borngin jala tahuak manuk ma ahu mulak. Ala nunga loja, ndang sahat be ahu tu singkola. Molo ro pe ahu tu singkola, huinum do siinuman maralkohol tingki marsiajar.

Ahu ma rangking na parpudi di singkola. Gabe muruk jala jut ma roha ni omak, hape ndang diboto ibana sude pangalahongku. Marbadai ma hami jala laho ma ahu sian jabu. Dung i, sanga do ahu sajabu dohot hamlethu si Tony na maragama Rastafari, i ma agama ni halak Afrika. Pareman do ibana jala partigatiga narkoba, ditanda halak do ibana sahalak na jahat. Ndang piga leleng denggan ma pamatangku jala tubu ma anaknami tingki ahu marumur 16 taon.

Pajumpang ma ahu dohot Sitindangi Ni Jahowa tingki tading di inganan penampungan tu inaina na so adong tungganedolina. Pamarenta do na mambahen inganan i. Jotjot do ro dua halak borua Sitindangi ni Jahowa laho manjumpangi angka inaina na poso. Sada tingki, dohot ma ahu manangihon laho patuduhon na sala do Sitindangi i. Lambok jala tangkas do nasida mangalusi sungkunsungkun sian Bibel. Burju jala lambok do nasida. Alani i, gabe olo ma ahu marsiajar Bibel.

Ndang leleng dung marsiajar, muba ma pangalahongku. Sian dakdanak, mabiar do ahu mate. Alai saonari nunga huboto be ajaran ni Jesus taringot haheheon! (Johannes 5:28, 29) Huboto ma, na disarihon Debata do ahu.(1 Petrus 5:7) Tarlumobi hona do tu rohangku hata di Jeremia 29:11 na mandok ”Ai nunga tangkas huboto sangkap angka na husangkapi taringot tu hamu, ninna Jahowa, sangkap hasonangan do tahe ndada tu hamagoan, asa ahu mangalehon tu hamu ujung na hinalungunhonmuna.” Gabe porsea ma ahu tu pangkirimon taringot hangoluan saleleng ni lelengna di Paradeiso di tano on.—Psalmen 37:29.

Dipatuduhon Sitindangi Ni Jahowa do holongna. Tingki parjolo sahali ahu ro tu parpunguannasida, burjuburju do nasida manjangkon ahu! (Johannes 13:34, 35) Imbar situtu do on tu angka parange ni halak na huida di gareja. Dijangkon Sitindangi Ni Jahowa do ahu nang pe sursar ngolungku. Dilehon nasida do tingki, roha, nang pingkiran laho mangurupi ahu. Hira na mandapot sada keluarga baru na masihaholongan ma huhilala.

Dung marsiajar Bibel, huantusi ma na ingkon muba do pangalahongku asa boi mangulahon lomo ni roha ni Debata. Ingkon marsitutu do ahu asa ndang marisap be. Jala huboto ma na ingkon hupaso do manangihon musik na mambahen ahu mamangke narkoba. Asa boi huorom diringku, ndang olo be ahu laho tu diskotik. Jala maraleale ma ahu tu angka dongan na mambahen lam denggan parangengku.—Poda 13:20.

Si Tony pe marsiajar Bibel do dohot Sitindangi ni Jahowa. Ala boi Sitindangi mangalusi sungkunsungkunna sian Bibel, pos ma rohana on do hasintongan. Godang ma hamubaonna: kaluar ma ibana sian organisasi pareman, ndang diulahon ibana be angka na jahat jala dipaso ibana ma mangisap ganja. Saleleng on ndang marhamulian dope hami nang pe nunga marianakhon. Asa boi huulahon hami lomo ni roha ni Debata jala boi denggan hupagodanggodang hami ianakhonnami, dipasurathon hami ma parsaripeonnami di taon 1982.

Di majalah Joujou Paboahon dohot Sadarlah! * godang do hujaha pengalaman ni angka halak na mambahen hamubaon. Gabe taronjar ma rohangku mambahen hamubaon alani manjaha angka pengalaman ni nasida! Jala sai hupangido tu Jahowa asa sabar Ibana mangurupi ahu mambahen hamubaon. Ujungna tardidi ma ahu rap dohot si Tony di bulan Juli taon 1982.

Las do rohangku mangurupi ianakhonku mananda Debata Jahowa. Saonari, las do muse rohangku mangida pahompungku mananda Debata.

Ndang tarsunggul be ahu tingki borngin ala mabiar tu ari sogot manang tu hamatean. Las do rohangku ala boi rap dohot si Tony patoguhon angka huria ganup minggu. Rap marbarita dohot nasida mangurupi angka halak asa marhaporseaon tu Jesus jala boi mandapot hangoluan salelenglelengna.