1. Aha do situasi na mambahen susa roha ni si Petrus?

NDANG tarlupahon ni si Petrus situasi na borat tingki padompak bohi ibana dohot Jesus. Sungkunsungkun do roha ni si Petrus, muruk manang marsak do Jesus mangida ibana. Ndang dipaboa sude na masa i. Alai disurat do, ’Humusor ma Tuan i, dibereng ma si Petrus.’ (Luk. 22:61) Dung diida Jesus, diboto si Petrus ma na balga situtu hasalaanna i. Diboto ma, nunga digohi be surirang ni Jesus taringot ibana, na mansoadahon Tuan, na hinaholonganna. Gale situtu ma pangkilalaan ni si Petrus, jala susa situtu rohana.

2. Aha do na porlu diparsiajari si Petrus, jala aha do parsiajaranna tu hita?

² Alai ndang na gabe so adong pangkirimonna. Si Petrus sahalak baoa na marhaporseaon na togu. Alani i, dilehon do tingki tu ibana mambahen hamubaon jala marsiajar sian Jesus laho manesa hasalaan. Songon si Petrus, ringkot do hita marsiajar manesa hasalaan. Alani i, taparrohahon ma songon dia si Petrus marsiajar sian pengalaman na borat.

3, 4. (a) Aha do sungkunsungkun ni si Petrus tu Jesus, jala aha do na dipingkirhon si Petrus? (b) Songon dia do Jesus mangurupi si Petrus?

³ Onom bulan andorang so laho tu Kapernaum, disungkun si Petrus ma Jesus, ’Tuan, piga hali do sesaonku sala ni donganku na dompak ahu? Pola do pitu hali?’ Ninna roha ni si Petrus, nunga burju hian ibana disi. Tarlumobi tingki i, diajarhon angka pamimpin agama do taringot tu manesa hasalaan sahat tu tolu hali. Alai dialusi Jesus ma, ”Ndada pitu hali dohononku tu ho, tung sintap pitupulu hali pitu do!”​—Mat. 18:21, 22.

⁴ Na dijujui Jesus do asa dietong manang disurat si Petrus hasalaan ni donganna? Ndang songon i. Gariada, diganti Jesus do sian pitu hali gabe pitupulu hali pitu, na patuduhon ndang ditontuhon piga hali sasahalak manesa hasalaan. (1 Kor. 13:4, 5)  Dipaboa Jesus ma tu si Petrus, naung diihuthon ibana hasomalan ni halak na sai mangetong hasalaan ni na asing, jala i mambahen ibana maol manesa hasalaan. Hombar tu Patik ni Debata, ingkon tasalpuhon do sude hasalaan ni na asing.​—Jaha  1 Johannes 1:7-9.

5. Tingki sadihari do ringkot di hita manalpuhon hasalaan?

⁵ Dijangkon si Petrus do pangajarion ni Jesus i. Alai, hona do tu rohana pangajarion i? Sipata, tingki taulahon na sala, taantusi ma ringkot ni manesa hasalaan. Alani i, taida ma na masa andorang so mate Jesus. Di situasi na borat i, gok hasalaan ni si Petrus na mangkaporluhon asi ni roha ni Jesus.

6. Aha do na diulahon si Petrus tingki dipatudu Jesus sitiruon taringot tu martoruk ni roha, alai songon dia do Jesus mangurupi ibana?

⁶ Di tingki i ma borngin na parpudi Jesus mangolu di portibi on. Alai, godang dope na diajarhon Jesus tu angka apostelna. Umpamana, taringot tu martoruk ni roha. Dibahen Jesus ma sitiruon tingki disunsi ibana patnasida, na somal diulahon sahalak hatoban. Mulana, sungkunsungkun do roha ni si Petrus, gabe ndang dilehon ibana patna disunsi Jesus. Alai dungkon i, gabe dipangido ma muse tu Jesus asa disunsi patna, tanganna dohot simanjujungna! Ndang na gabe muruk Jesus, alai dame do rohana paboahon lapatan ni ulaonna i.​—Joh. 13:1-17.

7, 8. (a) Songon dia do si Petrus muse manguji lambas ni roha ni Jesus? (b) Songon dia do Jesus pataridahon lambok ni roha jala marpamuati?

⁷ Ndang sadia leleng, diuji do muse lambas ni roha ni Jesus tingki marsoal siseanna taringot ise na sumurung sian nasida. Tontu, dohot do si Petrus. Lambok do Jesus mangajari nasida. Dipuji do nasida, ala marsihohot jala unduk tu ibana. Dipaboa Jesus ma na laho tadingkononna nasida, alai pintor dialusi si Petrus ma na so tadingkononna Jesus sahat tu na mate ibana. Dung i, disurirangkon Jesus ma na laho soadahonon ni si Petrus ibana tolu hali, andorang so martahuak manuk dua hali. Alai dipatudu si Petrus do ginjang ni rohana, didok ibana do dirina ummarsihohotan sian sude apostel!​—Mat. 26:31-35; Mrk. 14:27-31; Luk. 22:24-28; Joh. 13:36-38.

⁸ Tongtong do sabar Jesus mangadopi si Petrus? I do. Di situasi na borat pe, dilului Jesus do angka na denggan sian apostelna. Diboto do na hansit rohana bahenon ni si Petrus. Alai, didok Jesus do, ’Ahu do manangiangkon ho, unang mintop haporseaonmi. Jala dung mulak sogot roham, pargogoi ma roha  ni angka hahaanggim!’ (Luk. 22:32) Pos do roha ni Jesus, hiras do muse roha ni si Petrus marbarita. Tutu ma, sai marpamuati do roha ni Jesus!

9, 10. (a) Aha do sipasingot na dilehon tu si Petrus di Getsemane? (b) Aha do na taparsiajari sian hasalaan ni si Petrus?

⁹ Tingki di Getsemane, diurupi Jesus do muse si Petrus. Dipangido Jesus do asa dungo si Jakobus, si Petrus, dohot si Johannes tingki martangiang ibana. Hansit do dihilala Jesus jala mangkaporluhon pangurupion. Alai, tarpodom do nasida jumpang ni ibana. Dipatudu Jesus do pangantusion, jala didok, ”Girgir do nian tondi i, alai gale do ia daging.”​—Mrk. 14:32-41.

¹⁰ Sahat ma punguan ni halak Jahudi na mamboan obor, podang, dohot lobonglobong. Ingkon manat jala marbisuk do nasida mangadopi i. Alai, hatop do si Petrus mangalaluhon podangna tu ulu ni si Malkus, naposo ni sintua ni malim jala manampulhon sada pinggolna. Lambok do Jesus pasingothon si Petrus, jala dipamalum ma pinggol ni si Malkus. Dipaboa Jesus do sada prinsip na so boi marbadai, jala gabe ojahan do on sahat tu hita saonari. (Mat. 26:47-55; Luk. 22:47-51; Joh. 18:10, 11) Ala nunga godang hasalaan ni si Petrus, tontu dihaporluhon ibana do asa marpamuati roha ni Tuanna. Taantusi ma, hita sude jotjot marsala. (Jaha Jakobus 3:2.) Ise do sian hita na so mangkaporluhon hasesaan ni dosa sian Debata ganup ari? Alai, adong dope muse dosa na umbalga dibahen si Petrus.

11, 12. (a) Songon dia do si Petrus patuduhon habaranion tingki ditangkup Jesus? (b) Songon dia do si Petrus ndang manggohi hatana?

¹¹ Dipaboa Jesus ma tu punguan na ro i, asa dipaloas angka siseanna laho molo dirina do na niluluan ni nasida. Ndang adong be na boi diulahon si Petrus dung ditali na torop i tangan ni Jesus. Alani i, maporus ma ibana dohot sisean na asing.

¹² So ma si Petrus dohot si Johannes jonok tu jabu ni si Hannas na hea gabe Sintua ni Malim, inganan ni Jesus mulana diadili. Tingki diboan muse Jesus, diihuthon si Petrus dohot si Johannes do ibana sian na dao. (Mat. 26:58; Joh. 18:12, 13) Ndang na parbiar si Petrus. Alai, porlu do habaranion laho mangihuthon Jesus tarlumobi di tingki sisongon i. Mamboan sinjata do punguan i, jala sanga do gotap dibahen si Petrus pinggol ni sahalak sian nasida. Sian on taida, ndang marsihohot si Petrus tu janjina na mandok, rade do ibana rap mate dohot Tuanna, Jesus.​—Mrk. 14:31.

13. Aha do na taulahon asa boi maniru Kristus?

 ¹³ Saonari, godang do na songon si Petrus, na mangihuthon Jesus sian na dao asa unang diparrohahon halak. Alai, songon na disurat si Petrus, asa boi tatiru Jesus, marsitutu ma hita jonok tu Jesus, jala maniru saluhut na binahenna nang pe mangadopi paraloan.​—Jaha 1 Petrus 2:21.

14. Aha do na diulahon si Petrus tingki diadili Jesus?

¹⁴ Marbunibuni do si Petrus mangihuthon punguan i sahat tu harbangan ni jabu ni si Kayapas, malim ni halak Jahudi. Sahalak na mora jala na marhuaso do ibana di Jerusalem. Bolak do alaman ni jabuna. Tingki sahat si Petrus di harbangan i, ndang diloas ibana masuk. Alai, nunga jumolo si Johannes sahat jala ditanda ibana do sintua ni malim i. Alani i, dipangido ma tu panjaga asa dipaloas si Petrus masuk. Ndang sahundulan nasida, jala ndang adong di roha ni si Petrus laho mandongani Tuanna. Sai di alaman i do ibana mansisulu di lambung ni api, rap angka hatoban dohot naposo ni malim. Huhut do diparrohahon ibana ruar masuk angka na manjehehon Jesus i sian pengadilan.​—Mrk. 14:54-57; Joh. 18:15, 16, 18.

15, 16. Songon dia do surirang ni Jesus taringot tu si Petrus digohi?

¹⁵ Tingki sahalak borua paloashon si Petrus masuk, ditanda borua i ma ibana, ala dibahen do api. Didok ma, ”Dohot do ho dongan ni Jesus, na sian Galilea i!” Alani songgotna, pintor disoadahon si Petrus ma na tinandana Jesus. Jala didok ma, na so diantusi ibana hata ni borua i. Alani i, manginsudut ma ibana tu jonok ni pagar asa unang diida na asing. Hape diparrohahon sada borua ma ibana jala didok, ”On do sada dongan ni Jesus na sian Nasaret!” Alai marsumpa ma si Petrus mandok, ’Ndang hutanda i.’ (Mat. 26:69-72; Mrk. 14:66-68) Olo do dung dua hali si Petrus mansoadahon Jesus, asa dibege ibana martahuak manuk. Alai, ala ni na masa i, ndang dilehon si Petrus be rohana tu surirang ni Jesus pigapiga jom naung salpu.

¹⁶ Dungkon i, marsitutu do muse si Petrus manabunihon ise ibana. Alai didapothon pigapiga halak na di alaman i do ibana. Sada sian na torop i, keluarga ni si Malkus, halak na luka dibahen si Petrus. Didok ibana ma, ”Nda huida ho rap dohot Ibana di porlak i?” Laho paposhon rohanasida, marsumpa ma si Petrus na marsahit kusta ibana molo margabus. On ma na patoluhalihon si Petrus mansoadahon Jesus. Dung marsumpa, dibege si Petrus ma martahuak manuk na paduahalihon.​—Joh. 18:26, 27; Mrk. 14:71, 72.

17, 18. (a) Songon dia do pangkilalaan ni si Petrus dung diboto naung marsala situtu ibana? (b) Aha do na dipingkirhon si Petrus?

 ¹⁷ Jongjong ma Jesus di teras ni loteng. Songon na dipaboa di mula ni pasal on, padompak bohi ma Jesus dohot si Petrus. Diboto si Petrus ma naung marsala situtu ibana maradophon Jesus, Tuanna. Ruar ma ibana sian alaman i. Naeng manetek iluna. Malengleng ma ateatena jala mangangguhi ma ibana.​—Mrk. 14:72; Luk. 22:61, 62.

¹⁸ Tingki diboto sasahalak naung mardosa situtu ibana, olo do pintor didok rohana ndang tarsesa be dosana i, jala i do ra na dipingkirhon si Petrus. Alai, tutu do na so boi disesa dosana i?

19. Songon dia do pangkilalaan ni si Petrus, jala sian dia do taboto na so tongtong ibana mandele?

¹⁹ Ndang tarhatahon susa ni pingkiran ni si Petrus sahat tu na tiur ari. Tontu, diburai ibana do dirina tingki diboto na disiksa Jesus saleleng marjomjom jala gabe mate! Lam malengleng ma muse ateatena, dung dipingkiri na parsidohot do ibana mambahen lam hansit sitaonon ni Jesus. Alai, ndang tongtong ibana mandele. Rade do ibana muse marsaor dohot sisean na asing. (Luk. 24:33) Manolsoli situtu do roha ni angka sisean alani pambahenannasida di borngin i, alai on mangonjar rohanasida asa masipatogutoguan.

20. Aha do na boi taparsiajari sian haputusan ni si Petrus tingki marmetmet ni roha ibana?

²⁰ Tarida ma bisuk ni si Petrus sian aha na diulahonna. Tingki tartuktuk naposo ni Debata, unang ma dipingkirhon sadia balga dosana i, alai marsitutu ma laho mambahen hamubaon jala ndang mangulahon i. (Jaha Poda 24:16.) Ndang mandao si Petrus sian angka sisean nang pe hansit dihilala ibana. Ra, tingki tartuktuk manang marsak, olo do naeng mandao hita sian huria, alai parohon jea do i. (Poda 18:1) Na dumenggan, tongtong ma hita rap marpungu dohot dongan sahaporseaon asa togu partondionta.​—Heb. 10:24, 25.

21. Ala tongtong si Petrus marsaor dohot dongan sahaporseaon, aha do na gabe diboto ibana?

 ²¹ Ala tongtong raphon dongan sahaporseaon, boi ma diboto si Petrus, na so di kuburan be bangke ni Jesus. Marlojong ma si Petrus dohot si Johannes tu kuburan ni Jesus. Ala umposo do si Johannes, parjolo ma ibana sahat disi. Dung i, diida si Petrus ma na tutu ndang disi be bangke ni Jesus!​—Joh. 20:3-9.

22. Aha do na mangurupi si Petrus gabe ndang marsak be alani hasalaanna?

²² Porsea do si Petrus na dipahehe Jesus? Mulana, ndang porsea. Hape, adong do angka borua na mandok tu ibana, naung jumpang nasida dohot surusuruan na paboahon naung dipahehe Jesus. (Luk. 23:55–24:11) Alai, ndang bonom dope mata ni ari, nunga salpu lungun ni roha dohot ganggu ni rohana. Nunga hehe Jesus, gabe mardaging tondi na gogo! Dipataridahon Jesus do dirina tu angka apostel, alai andorang so i laho do Jesus manjumpangi si Petrus. Di na sadari i, didok angka apostel, ’Naung tutu do dipahehe Tuan i, jala diida si Simon do Ibana!’ (Luk. 24:34) Di pudian ni ari, disurat si Paulus do taringot tu Jesus na ”dipataridahon do dirina tu si Kepas, dung i tu na sampuludua i”. (1 Kor. 15:5) Si Kepas manang si Simon do tingki i dijou goar ni si Petrus. Alani i, si Petrus do na jinumpangan ni Jesus.

23. Boasa ringkot ingoton ni halak na mangulahon dosa pengalaman ni si Petrus?

²³ Ndang disurat sude di Bibel aha na masa tingki pajumpang nasida. Holan Jesus dohot si Petrus do na umboto i. Na boi dapot rohanta, balga do roha ni si Petrus tingki diida ibana hehe muse Tuan na hinaholonganna. Dung i, boi ibana mangangku sala huhut pasahathon lungun ni rohana. Ringkot do di ibana asa disesa Jesus hasalaanna. Jala ndang borat di Jesus mangulahon i. Saonari, tingki mardosa sasahalak, porlu diingot pengalaman ni si Petrus. Unang ma dihilala na so tarsesa ni Debata hasalaanna i. Nunga dipatudu Jesus, molo Debata ”buas” manesa dosa.​—Jes. 55:7.

24, 25. (a) Patorang ma na masa tingki manjala dengke si Petrus di Tao Galilea. (b) Aha do diulahon si Petrus tingki dibahen Jesus tanda halongangan?

²⁴ Disuru Jesus do siseanna tu Galilea, laos disi do nasida pajumpang. Dung sahat di Galilea, mulak ma si Petrus muse manjala dengke, jala didongani deba sian sisean i do ibana. Di Tao Galilea on do si Petrus sian uju haposoonna. Nunga somal  ibana mambege soara ni parau, galumbang ni tao dohot manarik jala. Alai, ndang adong dapot nasida dengke di borngin i.​—Mat. 26:32; Joh. 21:1-3.

²⁵ Dung lam tiur ari, dibege nasida ma sasahalak manggora sian topi ni tao. Disuru ma nasida asa manampakkon jala. Dapot nasida ma dengke 153 ekor! Diboto si Petrus do ise halak na manuru i. Mangangkat ma ibana sian parau i, marlange tu topi ni tao. Dung sahat di topi ni tao i, diida ma Jesus paradehon dengke na dipanggang laho panganon ni alealena. Sumurung do si Petrus dibahen Jesus tingki i.​—Joh. 21:4-14.

26, 27. (a) Aha do tolu ulaon na dilehon Jesus tu si Petrus? (b) Aha do na patuduhon molo Jesus nunga manalpuhon hasalaan ni si Petrus?

 ²⁶ Huhut ditudu tu dengke na jinalana i, disungkun Jesus ma si Petrus, na dihaholongi do Tuanna lobi ”sian angka on”. Ra sungkunsungkun do roha ni si Petrus, boi do humolongan rohana tu karejona sian tu Jesus? Taboto, nunga tolu hali disoadahon si Petrus Jesus. Alai, dipaboa Jesus ma di jolo ni sisean na asing, tolu ulaon na patuduhon dihaholongi si Petrus do Jesus. Dipatorang Jesus ma cara patuduhon holong, i ma marhite manjumolohon ulaon partondion, mangalehon mangan jala mamparmahani birubiru ni Kristus.​—Luk. 22:32; Joh. 21:15-17.

²⁷ Dipapos Jesus ma, na arga do si Petrus di adopanna dohot di adopan ni Jahowa. Ulahonon ni si Petrus do tanggung jawab di huria marhite tudutudu ni Kristus. On patuduhon, disalpuhon Jesus do hasalaan ni si Petrus! Tontu, hona do tu roha ni si Petrus hata ni Jesus i.

28. Songon dia do parniulaon ni si Petrus hombar tu goarna?

²⁸ Marsihohot do si Petrus mangulahon tanggungjawabna. Saleleng martaontaon, dipatogu do angka dongan sahaporseaon songon na diparentahon Jesus andorang so mate ibana. Lambok jala sabar do si Petrus mangaradoti jala mangalehon mangan angka siihuthon Jesus. Tutu ma, hombar do parngoluon ni si Simon tu goar na nilehon ni Jesus, i ma si Petrus manang Batu Mamak. Diurupi ibana do asa marsihohot jala marhaporseaon dongan di huria. On boi taida di bagasan dua suratna, na dibahen gabe bagian ni Bibel. Isi ni suratna i patuduhon, ndang hea ibana lupa tu parsiajaran na jinalona sian Jesus taringot tu manalpuhon hasalaan.​—Jaha 1 Petrus 3:8, 9; 4:8.

29. Songon dia do hita boi maniru haporseaon ni si Petrus dohot asi ni roha ni Jesus?

²⁹ Parsiajaran on denggan tu hita. Ganup ari do tatangiangkon asa disesa Debata hasalaanta? Tajangkon do asi ni roha dohot huaso ni Debata na boi manesa dosa jala mambahen hita ias? Tasalpuhon do hasalaan ni donganta? Molo taulahon on, tatiru ma haporseaon ni si Petrus dohot asi ni roha ni Jesus.