Dang sala molo tahaholongi diritta. Alai unang ma gabe holan diritta sandiri na tapikkiri. Molo tahaholongi diritta, tontu tajaga do diritta asa sehat, taargai diritta, jala lomo rohatta asa diargai halak hita. (Mateus 10:31) Alai boha do cara na sittong lao makkaholongi diritta sandiri? Dipaboa do i di Bibel.

Akka ise do na ikkon tahaholongi?

1.   Debata do na ikkon parjolo tahaholongi. Didok do di Bibel, “Ingkon haholonganmu Jahowa, Debatam sian nasa roham.” On ma paretta na rumikkot.​—Markus 12:28-​30; 5 Musa 6:5.

2.   Paretta na paduahon, i ma “Ingkon haholonganmu do donganmu jolma doshon dirim.”​—Markus 12:31; 3 Musa 19:18.

3.   Memang, dang adong diparettahon di Bibel asa tahaholongi diritta sandiri. Alai adong paretta na mandok, “Ingkon haholonganmu do donganmu jolma doshon dirim.” Sian on taboto ma, ikkon tahaholongi do tong diritta sandiri. Jala denggan do i. Alai unang ma gabe paholonghu rohatta tu diritta sandiri.

Ise do na dihaholongi Jesus?

 Dipatudu Jesus do boha carana makkaholongi Debata, huhut makkaholongi dongan jolma jala makkaholongi diritta sandiri. Didok Jesus do tu akka muridna asa ditiru ibana.​—Johannes 13:34, 35.

1.   Na parjolo, Debata Jahowa do na dihaholongi ibana. Dilehon do dirina lao mangulahon na disuru Debata. Didok ibana, “Huulahon do songon na diparentahon ni Ama i tu ahu, asa diboto portibi on na holong do rohangku tu Ama i.”​—Johannes 14:31.

2.   Dihaholongi ibana do akka jolma. Buktina, diurupi do akka halak. Dilehon do muse ngoluna gabe tobusan tu sude jolma.​—Mateus 20:28.

3.   Dihaholongi ibana do dirina. Buktina, istirahat do ibana, mangan, jala marsaor tu akka muridna dohot akka na mangihutton ibana.​—Markus 6:​31, 32; Lukas 5:​29; Johannes 2:​1, 2; 12:2.

Molo tahaholongi akka halak, gabe hurang do las ni rohatta jala dang diargai be hita?

 Dang songon i. Alana tumiru Debata do hita ditompa. Debata dang holan mamikkiri dirina sandiri. (1 Musa 1:​27; 1 Johannes 4:8) Ditoppa do hita asa boi tahaholongi halak na asing. Memang dang sala tahaholongi diritta. Alai asa lam tamba las ni rohatta, tahaholongi ma Debata jala sai tabahen ma na denggan tu halak na asing. Songon na didok Bibel, “Umlas do roha ni halak na mangalehon sian na manjalo.”​—Ulaon ni Apostel 20:35.

 Saonari on godang halak mandok, las do roha ni nasida molo holan mamikkiri dirina sandiri. Gabe holan “dirina sandiri” ma na dihaholongi, dang be “mangkaholongi donganna”. Alai, nungnga godang halak na mandok gabe umsehat jala umlas do roha molo mangulahon poda ni Bibel on, “Ingkon pingkirhonon ni ganup halak do na ringkot tu halak na asing, unang ma holan na ringkot di dirina sandiri.”​—1 Korint 10:24.