Nungnga dipaboa Bibel hian na lao masa sahit di godang inganan saleleng ari parpudi, termasuk ma pandemi. (Lukas 21:11) Alai, pandemi on dang hukuman sian Debata. Gariada molo nungnga mamaretta Harajaon ni Debata, apusanna ma sude sahit, termasuk ma i pandemi.

•  Naung dipaboa Bibel hian do na lao masa pandemi?

•  Hea do Debata parohon sahit lao manghukum jolma?

•  Hukuman sian Debata do pandemi na masa saonari?

•  Boi do mago pandemi sian portibi on?

•  Na didok Bibel taringot sahit

 Dang adong memang dipaboa Bibel na lao masa pandemi songon COVID-19, AIDS, manang flu Spanyol. Alai nga dipaboa Bibel hian na lao masa “sahit di godang inganan” dohot “sahit na parohon hamatean”. (Lukas 21:11; Pangungkapon 6:8) Akka na masa on ma tanda ni “ari parpudi”. Jala didok do muse on, “panutup ni jaman on”.​—2 Timoteus 3:1; Mateus 24:3.

 Di Bibel hea do disurat piga-piga hali diparo Debata sahit lao manghukum jolma. Contohna, hea do dibahen Ibana halak marsahit kusta. (4 Musa 12:1-16; 2 Raja-Raja 5:20-27; 2 Kronika 26:16-21) Alai dang hea dipaboa na gabe bali sahit i tu halak na so marsala. Holan tu halak na marsala do masa sahit i. Molo pandemi na masa saonari, halak na so marsala pe hona do.

 Daong. Adong do na mandok, Debata do na mambahen pandemi na masa saonari manang akka sahit lao manghukum akka halak. Alai, dang adong didokkon Bibel songon i. Boasa?

 Sian najolo sahat tu saonari boi do marsahit halak na manomba Debata. Contohna si Timoteus, ‘jotjot do ibana marsahit’. (1 Timoteus 5:23) Alai, dang didokkon Bibel na dihukum Debata ibana. Dos songon i ma saonari, halak na manomba Debata pe boi do marsahit manang bali sahit ni halak tu nasida. Jadi boi do nasida marsahit, ala masa kejadian na so terduga di tikki na so panagaman.​—Parjamita 9:11.

 Asing ni i, didok Bibel dang tikkina dope Debata manghukum halak na jahat. Gariada didok do hita saonari mangolu “di ari haluaon”. Saonari ma tikkina dipangido Debata akka halak asa gabe donganna jala asa boi dipalua. (2 Korint 6:2) Diundang Debata do sude halak marhite ulaon marbarita na uli. Ai dipaboa do “barita na uli taringot tu Harajaon” di saluhut portibi on.​—Mateus 24:14.

 Boi. Didok Bibel na lao salpu nama sude akka sahit. Molo nungnga mamaretta Harajaon ni Debata, apusan ni Debata ma sude sahit. (Jesaya 33:24; 35:5, 6) Apusan ni Debata ma arsak ni roha, na haccit, dohot hamatean. (Pangungkapon 21:4) Jala bahenonna ma muse mangolu akka halak naung mate, asa boi hilalaon ni nasida las ni roha jala dang na lao marsahit be.​—Psalmen 37:29; Ulaon ni Apostel 24:15.

 Pangungkapon 6:8, “Huida ma sada hoda na langan-langan. Na hundul di hoda i margoar Hamatean jala mangihut do Kuburan jonok di pudina. Dilehon do tu nasida huaso . . . laho mambunu marhite . . . sahit na parohon hamatean.”

 Lapatanna: Gambaran na dipaboa bukku Pangungkapon taringot opat hoda na dihunduli, patuduhon na lao masa di tikkinta on.