Boha do Carana Asa Boi Mangolu Salelengna?

PANGOLU

Na didok Bibel

Didok di Bibel, “Mangolu saleleng ni lelengna do halak na mangulahon lomo ni roha ni Debata.” (1 Johannes 2:17) Aha do huroha lomo ni roha ni Debata asa taulahon?

Mamparsiajari taringot Debata dohot Jesus, Anakna. Tikki martangiang, didok Jesus do, “On do hangoluan na saleleng ni lelengna, ingkon tandaon ni nasida do Ho Debata na Sasada i, na sintong i dohot Jesus Kristus na sinurum.” (Johannes 17:3) Aha do lapatan ni ‘mananda’ Debata dohot Jesus? Lapatanna, taparsiajari ma Bibel jala taulahon. a Dipaboa do di Bibel taringot Debata Jahowa, Silehon hangoluan. (Ulaon ni Apostel 17:24, 25) Dipaboa do tong di Bibel taringot Jesus, na paboahon “hata hangoluan na saleleng ni lelengna”.—Johannes 6:67-69.
Porsea tu tobusan ni Jesus. Ro pe Jesus tu tano on, “na laho marhobas do [ibana] jala mangalehon ngoluna bahen tobus ni torop jolma”. (Mateus 20:28) Tobusan na dilehon Jesus boi mambahen akka jolma mangolu salelengna di tano on. b (Psalmen 37:29) Didok Jesus, “Ai songon on do balga ni holong ni roha ni Debata di portibi on, pola do Anakna na sasada i dilehon, asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna.” (Johannes 3:16) Jadi dang cukup holan porsea tu Jesus. Attong aha do lapatan ni “patuduhon haporseaon tu ibana”? Lapatanna, taulahon ma na didok Jesus dohot na didok Debata.—Mateus 7:21; Jakobus 2:17.
Marale-ale tu Debata. Lomo do roha ni Debata asa jonok hita tu Ibana jala gabe ale-alena. (Jakobus 2:23; 4:8) Toktong do mangolu Debata saleleng ni lelengna. Jadi lomo do rohana asa ale-alena pe mangolu salelengna. Dipaboa Debata do di Bibel taringot akka ale-alena, “Anggiat ma martua nasida ro di salelenglelengna.”—Psalmen 22:27, Bibel siganup ari.

Pandapot ni Akka Halak taringot Mangolu Salelengna

Pandapot ni Akka Halak: Boi do dibahen jolma dirina mangolu salelengna.

Na Sasittongna: Didok akka ilmuwan, ala nungnga lam maju ilmu kedokteran, boi do ganjang umur ni jolma dibahen. Alai manang aha pe na dibahen jolma lao mangolu salelengna, pasti dang boi saut. Holan Debata do na boi mambahen jolma mangolu salelengna. Alana Ibana do “mual hangoluan”. (Psalmen 36:10) Didok di Bibel, “bondutonna ma hamatean salelenglelengna” jala lehononna ma ngolu na salelengna tu akka jolma na setia.—Jesaya 25:8; 1 Johannes 2:25.

Pandapot ni Akka Halak: Holan sada suku do na boi mangolu salelengna.

Na Sasittongna: Dang songon i Debata. Alana didok di Bibel, “Dihalomohon Debata do ganup halak na mangkabiari Ibana jala na mangulahon na sintong, sian bangso na dia pe nasida.” (Ulaon ni Apostel 10:34, 35) Jadi sian suku dia pe hita, molo taoloi Debata, boi do hita mangolu salelengna.

Pandapot ni Akka Halak: Pasti bosan do mangolu salelengna.

Na Sasittongna: Lomo do roha ni Debata asa las rohatta. Ala holong rohana tu hita, lehononna ma ngolu na salelengna tu hita. (Jakobus 1:17; 1 Johannes 4:8) Diboto Debata do, asa las rohatta ikkon adong ulaotta manang karejotta. (Parjamita 3:12) Jadi marjanji do Debata lao mangalehon ulaon dohot karejo na boi mambahen sude halak marlas ni roha mangolu salelengna.—Jesaya 65:22, 23.

Godang do annon na lao diparsiajari nasida taringot Debata dohot akka tompaanna na so hea dope diboto nasida. Sude do lomo rohatta asa mangolu salelengna dohot mamparsiajari taringot Debata, jala memang songon i do hita ditompa Debata. Alai nang pe songon i, “ndang hea boi tangkas taantusi sude pambahenanNa”. (Parjamita 3:10, 11, Bibel siganup ari) Jadi godang do na lao diulahon akka halak na mangolu salelengna, jala godang do na lao diparsiajari nasida.

a Las do roha ni Saksi Jahowa mangurupi hamu marsiajar Bibel. Lao mamboto gumodang hatorangan taringot on, tonton ma video Songon dia do Parsiajaran Bibel na Diulahon Hami?

b Ida ma artikel “Songon dia Jesus Paluahon Hita?”