Sering do istilah “Halak Samaria na Burju” dipakke lao patuduhon sasahalak na olo mangurupi halak na susa. Sian perumpamaan ni Jesus do dibuat istilah on. Perumpamaan i manceritahon taringot halak Samaria na olo patuduhon asi ni rohana tu halak Jahudi.

Lao tabahas ma

•  Songon dia do ceritana perumpamaan “Halak Samaria na Burju” i?

•  Boasa diceritahon Jesus perumpamaan on?

•  Aha do parsiajaranna sian perumpamaan on?

•  Ise do halak Samaria i?

•  Memang hea do terjadi na diceritahon di perumpamaan “Halak Samaria na Burju” i?

On ma cerita singkat taringot perumpamaan ni Jesus i: Adong halak Jahudi na sian Jerusalem naeng lao tu Jeriko. Alai dirampok ma ibana tikki di pardalanan jala dipukkuli sappe naeng mate.

Dung i lewat ma malim jala diida ibana do halak na hona rampok i. Alai dang diurupi ibana i. Lewat ma muse halak Lepi jala tong do dang diurupi halak na hona rampok i. Nang pe sarupa halak Jahudi nasida, dang olo nasida mangurupi halak na hona rampok i.

Dung i ro ma sahalak Samaria. (Lukas 10:33; 17:16-18) Asi ma rohana mangida halak na hona rampok i jala diubati ibana ma lukka ni bawa i. Dung i diboan ibana bawa i tu penginapan. Disi ma nasida marborngin jala diurus ibana ma bawa i. Marsogotna i, dilehon ibana ma hepeng tu pemilik penginapan i asa diurus bawa i. Jala molo hurang biayana, ditambai ibana pe muse hepeng i.—Lukas 10:30-35.

Tu sahalak bawa do diceritahon Jesus perumpamaan on. Menurut bawa i, holan dongan sabangso dohot dongan saagamana do na dianggap ibana donganna. Jadi dipaboa Jesus ma perumpamaan i tu bawa i, asa diboto ibana dang holan halak Jahudi na “gabe dongan jolma ni” bawa i. (Lukas 10:36, 37) Disurat do perumpamaan on di Bibel jala bermanfaat do i tu sude halak na naeng mambahen las roha ni Debata.—2 Timoteus 3:16, 17.

Sian perumpamaan i boi ma taboto, dongan na burju pasti olo do patuduhon asi ni rohana. Olo ibana mangurupi halak na susa nang pe dang sarupa latar belakangna, sukuna, manang negarana. Jala dibahen ibana do na denggan tu halak na asing, ala lomo do rohana asa denggan bahenon ni halak tu ibana.—Mateus 7:12.

Di sabola utara ni wilayah Judea do halak Samaria tinggal. Jala keturunan perkawinan campur do nasida, i ma perkawinan ni halak Jahudi dohot halak na so Jahudi.

Di abad na parjolo, berkembang ma agama ni halak Samaria. Porsea do nasida tu lima bukku na disurat ni si Musa, alai holan i do na dihaporseai nasida.

Tikki di tano on Jesus, godang do halak Jahudi na leas rohana tu halak Samaria. Jala dang olo nasida mardongan tu halak Samaria. (Johannes 4:9) Piga-piga halak Jahudi mamakke istilah “halak Samaria” lao mangejek nasida.—Johannes 8:48.

Dang adong memang dipaboa di Bibel na hea terjadi na dipaboa di perumpamaan i. Alai sering do dibahen Jesus perumpamaan sian kegiatan dohot inganan na ditanda halak Jahudi. Alani i, gabe mura ma diattusi nasida parsiajaranna sian perumpamaan ni Jesus i.

Godang do rincian na di perumpamaan i memang toho adong. Contohna:

• Dalan sian Jerusalem to Jeriko—na lobi sian 20 kilometer ganjangna—dalanna turun-turunan, kemiringanna sahat tu sakilometer. Sarupa ma hatorangan i songon na didok di Bibel, “turun sian Jerusalem” do bawa i naeng lao tu Jeriko—Lukas 10:30.

• Sering do Malim dohot halak Lepi na tinggal di Jeriko mardalan sian i lao tu Jerusalem.

• Sering do akka pangarampok martabuni di dalan na sepi i paima-imahon halak na lewat, tarlumobi na sahalakna mardalan.