Godang do halak na sukkun-sukkun rohana boasa masa Holocaust manang pembantaian massal, ala adong keluarga ni nasida na gabe korban. Dang holan alusna na porlu diboto nasida, alai porlu do nasida dihibur. Na asing mandok, masa pe Holocaust on patuduhon na kejam do jolma. On mambahen gabe maol halak porsea tu Debata.

 Pandapot na sala: Sala do molo tasukkun boasa dipaloas Debata masa Holocaust.

 Na sasittongna: Akka halak na togu haporseaonna pe, hea do manukkun boasa dipaloas Debata masa akka na jahat. Contohna, hea do disukkun panurirang Habakuk tu Debata, “Boasa ma dipasombu Ho ikkon idaokku akka na jahat? Boasa ma dipasombu Ho halak manusai na asing? Boasa ma ikkon idaokku akka na hancur dohot akka na kejam? Boasa ma tung godang na marbadai dohot na marsalisi?” (Habakuk 1:3) Dang muruk Debata tu si Habakuk ala disukkun ibana songon i. Alai disuru Debata do asa disurat sukkun-sukkuna i di Bibel, asa boi sude halak manjaha i.

 Pandapot na sala: Dang parduli Debata molo susa jolma.

 Na sasittongna: Sogo do roha ni Debata mangida akka na jahat dohot hasusaan. (Poda 6:16-19) Di jaman ni si Noak, ‘haccit do roha’ ni Debata mangida akka na jahat na masa di tano on. (1 Musa 6:5, 6) Pasti haccit do tong roha ni Debata mangida tikki masa Holocaust.​—Maleaki 3:6.

 Pandapot na sala: Holocaust on, i ma hukuman tu halak Jahudi.

 Na sasittongna: Di abad na parjolo, dipaloas Debata do dihancurhon halak Rom Jerusalem. (Mateus 23:37–24:2) Mulai sian i, dang adong be ditottuhon Debata sada bangso na istimewa jala dang ditottuhon be dia bangso na ikkon dihukum. Di pandangan ni Debata, ‘dang adong imbar ni halak Jahudi dohot halak na so Jahudi’.​—Rom 10:12.

 Pandapot na sala: Molo tutu do Debata i parholong jala na marhuaso, pasti dang paloasonna masa Holocaust.

 Na sasittongna: Nang pe dang hea Debata mambahen hasusaan, alai olo do sipata dipasombu Ibana masa i.​—Jakobus 1:13; 5:11.

 Lao pasaehon parsoalan na hea masa marribu tano naung salpu, i ma antara Debata dohot Sibolis, dipasombu Debata ma masa hasusaan tu sude jolma. Jala sarupa do alasanna boasa dipasombu Debata masa Holocaust. Jala takkas do didok Bibel Sibolis do na mangarajai portibi on, dang Debata. (Lukas 4:1, 2, 6; Johannes 12:31) Dipaboa do di Bibel alasanna, boasa dipasombu Debata masa Holocaust.

1.   Dipaloas Debata do jolma bebas mamillit. Didok Debata do tu jolma na parjolo i ma si Adam dohot si Hawa, aha na ikkon diulahon nasida. Alai dang dipaksa Debata nasida asa mangoloi Ibana. Dibahen nasida do keputusan na sala, alana gabe nasida do na mamillit dia na denggan dohot na so denggan. Songon i do tong keputusan na dibahen godang halak. Ujungna, gabe susa ma nasida. (1 Musa 2:17; 3:6; Rom 5:12) Bukku Statement of Principles of Conservative Judaism mandok, “Ala dilehon do kebebasan mamillit tu jolma, gabe lomo-lomo ni nasida do mambahen keputusan di nasida sandiri. Ujungna, gabe godang ma hasusaan na masa di portibi on.” Nang pe songon i, dipaloas Debata dope jolma bebas mamillit. Alai dilehon Debata do tikki tu jolma lao patuduhon, boi do manang na dang denggan ngolu ni nasida molo dang diurupi Debata.

2.   Sanggup do Debata jala lao padengganonna do akka hasusaan na masa alani Holocaust. Marjanji do Debata lao paheheonna do godang halak naung mate, termasuk ma akka halak na mate alani Holocaust. Jala lao diapus Debata do trauma ni akka halak alani Holocaust. (Jesaya 65:17; Ulaon ni Apostel 24:15) Alani holong ni Debata tu jolma, marjanji do Ibana lao pasautonna do sude akka naung dijanjihon Ibana.​—Johannes 3:16.

 Godang do akka halak na gabe korban ni Holocaust, boi mampartahatton haporseaon ni nasida. Jala adong do tujuan ni ngolu ni nasida, ala diboto nasida do boasa dipaloas Debata masa akka na jahat. Diboto nasida do muse, lao diapus Debata nama akka hasusaan.