Juu li Bakena ntôñ u yé man juu li minhôôlak mi bikristen u u ñéga ntôñ u Mbôgi Yéhôva ikété nkoñ isi wonsôna. Bôlô yap i gwé maboñ ima:

•   Ba ñéga ngôôba i biniigana bi nlôl i Bibel, bi bi mpam ikété bikaat, bi di nigil i makoda ni bisuklu bi Mbôgi Yéhôva.​—Lukas 12:42.

•   Ikété nkoñ isi wonsôna ba ñéga nson u Mbôgi Yéhôva, ba ñéga ki likalô jap, ba nyoñ ki ngéda ni bigwel moo bi ntôñ.

 Juu li Bakena ntôñ li noñ ndémbél i “baôma ni mimañ mi Yérusalem” mi hiai bisu, ba bé yoñ makidik makeñi inyu likoda li bikristen ikété nkoñ isi wonsôna. (Minson mi baôma 15:2, 6) Kiki bôt ba ba bé ba tiñi ni Djob, bilôk bikéé bi bi nsal i Juu li Bakena ntôñ bi ta bé ño ntôñ. Ba nwas le Bibel yon i éga bo mu makidik map, ba neebege le Yéhôva Djob nyen a ntéé Yésu Kristô kiki Ño ntôñ.​​—1 Korintô 11:3; Efésô 5:​23.

 Bini bilôk bikéé gwon bi yé i Juu li Bakena ntôñ: Kenneth Cook, Jr., Samuel Herd, Geoffrey Jackson, Stephen Lett, Gerrit Lösch, Anthony Morris III, Mark Sanderson, ni David Splane. Ba nsal i hikuu hiés hikeñi, i tison i Brooklyn, New York, i loñ Amérika.

 Juu li Bakena ntôñ li bi téé bon ba juu basamal inyu éga ngandak mam ma ma ntihba nson wés, hiki wada wap a nsal i man juu wada tole ngandak muu.

•   Juu li bakot li Bakena ntôñ: Li ñéga mam ma bikééhene, li nti mahôla i ngéda bikuu bi nkwo, li nyoñ bitelbene i hôla Mbôgi Yéhôva i i mboma ndééñga inyu hémle yap, ni ngim mam mape ma tôbôtôbô ma ntihba Mbôgi Yéhôva.

•   Juu li mbôñgôl basal i Bétel li Bakena ntôñ: Li nyoñ bitelbene inyu basal Bétel.

•   Juu li mpémés bikaat li Bakena ntôñ: Li ñéga nson i pémés ni i kap bikaat bi bi mpôdôl Bibel, li ñéga ki maoñ ma mandap ma Ane, ma mandap ma ngobol, ni mandap ma hikuu hi loñ.

•   Juu li nson li Bakena ntôñ: Li ñéga nson wés i añal ‘ñañ nlam u Ane.’​​—Matéô 24:14.

•   Juu li biniigana li Bakena ntôñ: Li ñéga ngôôba i bijek bi mbuu bi bi ntiba ni njel makoda, bisuklu, bividéô ni makiñ.

•   Juu li matila li Bakena ntôñ: Li ñéga ngôôba u bijek bi mbuu bi bi mpam ni njel bikaat, site yés internet ni nson wés u ngobol.

 U héya nson i bon ba muu, Juu li Bakena ntôñ li nkodba hiki sonde inyu wan mam ma mbéñge ngôñ i ntôñ ikété nkoñ isi. Mu makoda ma, bilôk bikéé bi, bi nwan i jam Bitilna bi nkal, ba nwas ki le mbuu mpubi u Djob u éga bo, ba boñok ki biliya i bana kiñ yada mu makidik ba nyoñ.​​—Minson mi baôma 15:25.

 Bikristen bini bi yé bôt ba nla bôdôl ñem. Ba nsal i bon ba muu ba Juu li Bakena ntôñ. (1 Korintô 4:2) Ba gwé pék ni likeñge mu i bôlô i, man juu a nlama sal. Ba yé ba ba i likoda li man juu hiki sonde. Tolakii ba ta bé i nsoñgi u bôt ba nyoñ makidik, bahôla ba Juu li Bakena ntôñ, ba nti biyi ni biniigana bi mahee, ba mbii makidik ma nyôña i bisélél, ni béñge too makidik ma, ma num matam malam, ma boñok le nson u kee ni bisu. Juu li Bakena ntôñ li nla ki ep bo i yuuga bilôk bikéé bahoma bape i nkoñ isi tole i ti minkwel i makoda makeñi kiki bo likoda li ñwii li hikuu hikeñi hi ntôñ tole mapémél ma suklu Giléad.