Inyuki Mbôgi Yéhôva i nlôôs bé ngand Kristak?
Biniigana bi bitembee
Tembee: Mbôgi Yéhôva i nlôôs bé ngand Kristak inyule ba nhémle bé Yésu.
Maliga: Di yé bikristen. Di hémle le tohi i nlôl ndik ni Yésu Kristô.—Minson mi baôma 4:12.
Tembee: Ni mbagal mahaa i ngéda ni niiga bôt le ba lôôs bañ Kristak
Maliga: Di ndiihe mahaa ngandak, di gwéélak ki Bibel inyu lédés mo.
Tembee: Ni nok bé “mahoñol ma ngand Kristak,” hala wee i ba liyômba, niñ ikété nsañ hana isi, ni i bôñôl bôt mam malam.
Maliga: Di mboñ biliya i ba bôt ba nkap ni bôt ba nsañ dilo tjodisôna. (Bingéngén 11:25; Rôma 12:18) Kiki héga, i nya makoda més ma ntagbe, ni kiki di ntéé likalô, di noñ biniigana bi Yésu bi bi yé le: “Ni nkôs yañga, tina yañga.” (Matéô 10:8) Ni ki le, di ñôt mahoñol ma bôt inyu Ane i Djob i i ga lôna bañga nsañ i nkon isi.—Matéô 10:7.
Inyuki Mbôgi Yéhôva i nlôôs bé ngand Kristak?
Yésu a bi ti oda le di bigda nyemb yé, he ligwéé jé bé.—Lukas 22:19, 20.
Baôma ba Yésu lôñni banigil bé ba bisu ba bé lôôs bé ngand Kristak. Ini kaat le, New Catholic Encyclopedia i nkal le: “Ngand i Kristak i bi tééba bé ilole ñwii 243 [N.Y.],” i mbôdôl,” hala a bé loo mbôgôl ñwii le ñôma nu nsôk a bé a ma wo.
To yom to yada i ñunda bé le Yésu a bi gwéé hilo 25 hi sôñ Libuy li nyéé; Bibel i nsima bé to hilo hié ligwéé.
Di nhémle le Djob a neebe bé Kristak inyule i umne ikété bilem ni maboñok ma nyega ma nkoñ isi.—2 Korintô 6:17.
Inyuki di yé bebee i neebe le bôt ba oo bés inyule di ntjél lôôs Kristak?
Ngandak i ngi lôôak ngand Kristak tolakii ba nyi le i nlôl biniigana bi bibase bi bihaiden, ni le Bibel i nit bé i ngand i. I nya mintén mi bôt i yé le i bat le: Inyuki bikristen bi nlama yoñ i nya makidik i i mbagal bo ni bana bôt bape? Inyuki ba nlama nôgha bomede i nya ndutu i hala?
Bibel i nti bés makénd i yoñ ngéda i hek pék, i gwélél Djob nson ‘ni mahoñol més.’ (Rôma 12:1, 2) Hala a niiga bés mahee ma maliga. (Yôhanes 4:23, 24) Jon to ibale di ntôñ ni lelaa bôt ba ntehe bés, di noñ matiñ ma Bibel to ibale bôt ba ga yahal bés.
Tolakii di mpohol i tjél lôôs ngand Kristak, di neebe le hiki mut a gwé kunde i kit ni nyemede mu jam li. Di nkéñ bé bôt bape i lôôs ngand Kristak.