BAHUN ’isi ba bi léba ngandak mimbômôk mi brik ba bi gwélél inyu oñ i tison i, i ngéda ba bé hun ’isi i nlômbi Babilôn. Mut njoñ yi wada nu yak nye a nhun ’isi inyu léba tik gwom le Rober Koldewey, a nkal le, ba bé bôm i brik i, i muu makeñi ma ma bé “i mbus tison, i het biték bi bé bilam ngandak ba ban-ga ki . . . ngandak tjéé inyu kot i muu ma.”

Miñañ mi kôba mi ñunda ki le, bagomin ba loñ Babilôn ba bé gwéélak ki i muu ma inyu boñ béba jam kiyaga. Paul-Alain Beaulieu, malét nkeñi i Université de Tôrôntô, a nkal le: “Ngandak miñañ mi loñ Babilôn . . . i ñunda lelaa kiñe a bi ti kunde le ba ligis bôt ba bé kolba ane yé.” Ñañ u Kiñe Nébukadnézar i ngéda a bé kal le: “Tjéna bo, lighana bo, ni bôm bo, . . . mu i hié hikeñi . . . boña le ba numb hiida, le bup hiuu hi ligis bo.”

Ñañ u u mbigdaha basoñgol Bibel i yom i yé ntilga i kaat Daniel pes 3. Ñañ u u ntoñol le Kiñe Nébukadnézar a bi béñés bôm soso ôñgba ni gôl, i tegep mbok i Dura, i mbus tison i Babilôn. I ngéda i boñge ba wanda ba Lôk Héber bana baa le, Sadrak, Mésak, ni Abed-Négô ba bi tjél ôôp bisu bi ôñgba i, Nébukadnézar a unup ngandak, a ti oda le ba kônde lôñôs i hié hikeñi hi ngélé “isaambok iloo kiki ba bé béna lôñôs hio,” a ti oda le ba leñ i bôlôm bana bo baa i “juu li hié hikeñi.” Añgel i bi tohol bo.​—Daniel 3:1-6, 19-28.

I brik ba bi léba nyoo i Babilôn, bi ñunda ntiik le miñañ mi Bibel mi yé maliga. Brik bihogi mu bi gwé minkédlak mi bibañga bi bi nti kiñe Babilôn lipém. Bibañga gwada bini ba nléba mu: “Nébukadnézar, kiñe Babilôn . . . Yale, liyééne li lipémba jem memede me bi oñ . . . Mbôda yem i énél mu i yale i i boga ni boga.” Bibañga bi bi yé bebee le nlélém jam di nléba i kaat Daniel 4:30, i het Nébukadnézar a nkal ni ngôk wonsôna le: “Baa i Babilôn Nunkeñi nunu bé nyen memede me bi oñ ni ngui yem lôñni lipémba jem, le a ba ndap kiñe inyu ti bikeñi gwem lipém?”