•  Bibuk bi bisu 2

•  Masôô ma nkus ma Bibel 3-5

  •  Nkwel 3

  •  Tik ngok i mbuu 4

  •  Lisoñgol li Bibel 5

•  Ligip yaga i nson u ñañ nlam 6-14

  •  I bôdôl nkwel 7

  •  I kena nkwel ni bisu 8

  •  I yilha bôt banigil 9

  •  I toñol mam u nhémle 10

  •  Nkwel 11

  •  I yom nkwel u mpôdôl 12

  •  Ntén likalô u nla pohol 13

  •  Gwélél bikaat ni bividéô 14

•  Di niñik kiki bikristen 15-16

  •  Yigil i Bibel i likoda 16

•  Bibuk bi nsôk 17

•  Bibégés ni maéba 18

•  Ngéda i ntina 19

•  Mayuuga ma ngwélél makiiña 20

•  Sonde i likoda li makiiña tole i likoda li ndôn 21

•  Sonde i Bilôp bi Nwet 22

•  Ngwélél nu likoda li ñem sonde 23

•  Ñéga likoda li ñem sonde 24

•  Nti maéba 25

•  Mandap ma suklu mape 26

•  Bividéô 27

1. Biniigana bini bi ga hôla babobasôna ba ga yoñ ngaba i Likoda li Niñ yés ni nson wés u bikristen. Ibale u gwé nkwel, u baudu tole umpe, nwaa le u ntégbaha wo, tiimba béñge biniigana bitôbôtô inyu nkwel woñ, bi bi yé ntilga i mapep ma Niñ yés ni nson wés u bikristen—Kaat likoda li ñem sonde. Ba nlama naña batéé likalô bobasôna i lôôs minkwel mi baudu. I bôt bape ba nlo i makoda hiki ngéda ba nla tégbaha minkwel mi baudu ibale ba neebe biniigana bi Bibel, ni ibale ba niñ inoñnaga ni matiñ ma Bibel inyu bikristen. Ibale mut nu a yé ngi yila ntéé likalô nu ngi sôblana a nsômbôl tégbaha minkwel mi baudu, ngwélél nu likoda li ñem sonde a ga kwel ni nye, ba pôdôl matode a nlama yônôs, a yis ki nye ibale a nyônôs matode ma. Ba ga bana nkwel u i bisu bi mankéé a ntégbaha yigil ni nye, (tole isañ tole nyañ nu a yé Mbôgi Yéhôva). Matode nnigil a nlama yônôs ma yé nlélém ni ma a nlama yônôs inyu yila ntéé likalô nu ngi sôblana.—od chap. 8 § 8.

2. Linut jada. Hiki sonde, i mbus hiémbi hi majubul ni masoohe, ñéga likoda li ñem sonde a ga ti bilôk bikéé makénd inyu likoda li nke i tagbe. Ñéga likoda a ga yigye ndik matode ma ma ga lôôha tihba likoda.

 3. Nkwel: Jôm li manut. Kaat Likoda li ñem sonde i nti ño nkwel lôñni matode ima tole maa. Mañ tole nhôla nson nu a kôli nyen ba nla ti nkwel unu. I sonde het ba mbôdôl añ kaat Bibel mondo, ba nlama leñ vidéô i Majubul ma kaat Bibel i. Nti nkwel a nlama unda maada ma yé ipôla i vidéô i, ni ño nkwel. Ndi, a nlama ki boñ biliya le a toñol matode momasôna ba nti mu nkwel wé. Jam lipe li yé le, inoñnaga ni ngéda a gwé, a nlama gwélél bititii bi bi nkiha ni nkwel, inyule bi nhôla i tibil nok matode ma nkwel wé. A nla kônde matode ma nlôl mu bikaat ba nti inyu boñ nyiña, ibale matode ma, ma nhôla i tibil toñol nkwel wé.

 4. Tik ngok i mbuu: Jôm li manut. Hana a yé nkwel u mambadga ni mandimbhe, ibabé i bana bibuk inyu jubus tole inyu mélés nkwel. Mañ wada tole nhôla nson nu a kôli nyen ba nla ti i pes ini. Nti nkwel a nlama bat baemble mambadga mo ima. Ni le, a nlama kit ibale minlôñ mi Bibel mi nlama éña tole to. Mandimbhe ma nlama bé pam 30 ma batjaktjak.

 5. Lisoñgol li Bibel: Manut ma-na. Ñudu nu munlôm nyen a nlôôs jo. Ñudu a nlama añ Bibel ibabé nye i jubus tole bana bibuk inyu mamélél ma lisoñgol jé. Ñéga likoda a nlama boñ biliya bi tôbôtôbô inyu hôla baudu i añ bibañga bi yé ntilga, le lisoñgol jap li kuli, le kiñ yap i kiha ni mam ba ñañ, le ba yi noñ maton ni dikep, inyu telep i ngéda i kôli, ni le ba ba bomede. I nla pam le lisoñgol li ba nténdéé tole kidik, jon mañ u u nti baudu minkwel inyu likoda li ñem sonde u ga yoñ ngéda i wan ngap i hiki wada ilole a nti bo minkwel.

6. Jôm li manut ni matan. Njômbi i ini pes i likoda, i yé le baemble bobasôna ba kôôba loñge inyu likalô, ni le ba hôlôs ngap yap ni likeñge jap i añal ñañ nlam ni niiga bôt bape Bibel. Ibale hala a mbéda, yak mimañ mi nla tégbaha minkwel mi baudu. Hiki ñudu a ga sal litode jada munu man kaat le Niiga tole munu man kaat nunu le Gwés bôt; litode li, li ga ba mu i Kaat likoda li ñem sonde. Litode li, li yé ipôla bini biyimbne: “( ).” Ngim mangéda, minkwel ni baemble mi ga nene munu i pes ini le Ligip yaga i nson u ñañ nlam. Ha nya ngéda i, mañ wada tole nhôla nson nu a kôli nyen a ga lôôs i pes i.—Inyu tehe lelaa ba nlama tégbaha minkwel ni baemble, béñge  liben 15.

 7. I bôdôl nkwel: Ñudu nu a nlôôs i pes ini a nla ba munlôm tole muda. Bôlôm ba nlama ba ni bôlôm, bôda ni bôda, tole ba nlama ba ikété nlélém lihaa. Ba nla yén tole ba nla telep bitétéé.—Inyu yi i yom nkwel u mpôdôl, ni ntén likalô u nla pohol, béñge  maben 12 ni  13.

 8. I kena nkwel ni bisu: Ñudu nu a nlôôs i pes ini a nla ba munlôm tole muda. Munlôm a nlama bé lôôs i pes ini ni muda, tole muda ni munlôm. (km 5/97 p. 2) Ba nla yén tole ba nla telep bitétéé. Ñudu a nlama unda lelaa a nkwel ni ngim mut a yé tiimba yuuga, inyule i mut nu a bi diihe nkwel u bisu.—Inyu yi i yom nkwel u mpôdôl, ni ntén likalô u nla pohol, béñge  maben 12 ni  13.

 9. I yilha bôt banigil: Ñudu nu a nlôôs i pes ini a nla ba munlôm tole muda. Munlôm a nlama bé lôôs i pes ini ni muda, tole muda ni munlôm. (km 5/97 p. 2) Bo iba ba nla yén tole ba nla telep bitétéé. I pes ini i nlama unda lelaa yigil i Bibel i yé yaga i ke ni bisu. Jon, nseñ u ta bé i kôôba bibuk inyu jubus tole inyu mélés yigil, a mah le ñudu a gwé le a sal ngim litode li suklu li tôbôtôbô, li li mbéñge i jubus tole i mélés ngim nkwel. Balôôs yigil ba ta bé nyégsaga i añ maben ma yigil momasôna, tolakii hala a nla bôña.

 10. I toñol i mam u nhémle: Ibale i pes ini i nlama tagbe kiki nkwel i bisu bi baemble, ñudu nu munlôm nyen a ga lôôs wo, i bisu bi likoda. Ibale i pes ini i yé ndémbél i likalô, ñudu a nla ba munlôm tole muda. Bôlôm ba nlama lôôs nkwel ni bôlôm, bôda ni bôda, tole ba nlama ba ikété nlélém lihaa. Ñudu a ga gwélél bikaat ba nti nye inyu timbhe mbadgaI i, i nya i nôôga loñge, ndi ibabé le a babaa mut a yé kwélés. Ibale a ngwés, mu nkwel wé, a nla kal hee homa mandimbhe mé ma mpémél tole heeni.

 11. Nkwel: Ñudu nu munlôm nyen a ga lôôs i pes ini, kiki nkwel, i bisu bi likoda. Ibale litode li mpémél i apendis A i man kaat le, Gwés bôt, ñudu a ga éba lelaa ba nla gwélél nlôñ Bibel tole minlôñ mi Bibel, mi mi nene mu, i likalô. Kiki hihéga, a nla kal imbe ngéda di nla gwélél nlôñ Bibel u, a nla toñol nlôñ Bibel u, a éba ki lelaa di nla gwélél wo inyu hôla mut i ôt mahoñol mu. Ibale nkwel u mpémél i yigil yada, mu gwigil bi man kaat le, Gwés bôt, ñudu a ga éba, téntén, lelaa batéé likalô ba nla tibil gwélél litode li mu nson wap u ñañ nlam. A nla gwélél hihéga ba mpôdôl mu bibôdle bi yigil i, tole ibale hala a yé nseñ, a nla yak gwélél nlôñ Bibel umpe u u yé mu yigil i.

   12. I yom nkwel u mpôdôl: Biniigana ba nti munu liben lini ni li li noñ, bi mbéñge bipes bini le “I bôdôl nkwel” ni “I kena nkwel ni bisu.” Handugi biniinaga bipe, ñudu a ga pôdôl nwet ndap ngim biniigana bi Bibel, bi bi nla hôla toi nye, bi tombok i nok, a yék ki mbadga inyu lipeple. Ñudu a ga pohol ño nkwel u u nlémél bôt ba libôga jé, u u nti ki bôt makénd i bôdôl yigil i Bibel. A ga pohol too a ga éba nye kaat tole vidéô di nléba mu nkuu wés bisélél inyu niiga, tole heeni. Iloole ba tiimba ndik dihéga di minkwel di ba nigil ni ño, baudu ba nlama hôlôs bilem kiki bo i tôñ bôt bape ni i ba bomede i ngéda ba nkwel ni bôt.

   13. Ntén likalô u nlama boñ: Ñudu a ga téé likalô inoñnaga ni i homa a yé. Kiki hihéga:

1.  (1) Likalô li mandap ni mandap: Hana, di ngwés pôdôl likalô li mandap ni mandap, li téléfôn, tole ni njel biléta. Bebek i nla ki ba le u yé i kena nkwel ni bisu (lipeple) ni mut u bi kwélés i likalô li mandap ni mandap.

2.  (2) Likalô i ngéda di mboñ mam més ma hiki kel: Njômbi i pes ini i yé le di hôlôs likeñge jés i bôdôl nkwel to numbe homa di yé, kayéle mu kii di nkena nkwel ni bisu, di sôk tééne mut likalô. Ni i njel i, di nla añle ngandak bôt ngim mam i i mpémél ikété Bibel, bôt kiki bo solôñ yés i bôlô, liwanda jés li suklu, mut wés libôk, i ngéda di nyoñ matôa, ni ngandak bôt ipe di mboma i ngéda di mboñ mam més ma hiki kel.

3.  (3) Likalô li mbamba: Hala wee likalô ni bikak bi bikaat, i minloñ, i bahoma ba nyuñga, i homa bôt ba nyôñôl mbebi, i homa ba ntééne matôa, tole hiki homa di nla boma mut.

 14. Gwélél bikaat ni bividéô: Inoñnaga ni yom ñudu a mboma, a nla pohol i ti kaat tole i unda vidéô. Ibale ñudu a mpohol i éba mut vidéô tole nkwel won u mbat nye le a gwélél yo, a ga boñ kiki bo le a ñéba yo, (ndi a tuk bañ yo,) i mbus ba kwélél mu.

15. I mbus hiémbi, 15 manut ma bisu, munu pes ini i likoda, ma ga ba inyu ti nkwel wada tole ima, inyu hôla baemble i ha Bañga i Djob i bibôñôl. Handugi biniigana bipe, mimañ tole bahôla nson ba ba kôli bon ba ga lôôs minkwel mi, u héya nkwel inyu “Ngôñ likoda,” le mañ ndigi won u nlama tégbaha. I ngéda nkwel ni baemble u, handugi mambadga ma nene mu nkwel wé, nti nkwel a nla ki bat mambadga mape; a nlama boñ le majubul mé ma nkwel ma ba sem kwep inyu boñ le a bana ngéda inyu pôdôl balôm ba matode ba nkwel wé, a boñ ki le lôk kéé i timbhe mambadga. Ibale nkwel u mbat le ngim bôt i ti mbôgi, bati mbôgi ba nlama timbhe ba bak i hikôma, iloole ba timbhe ba bak ba yii i yééne yap.

  16. Yigil i Bibel i likoda: Môm maa ma manut. Mañ u likoda, u u kôli, won u nlama tégbaha i pes ini. (Makoda ma ma gwé bé ngandak mimañ, ma nla gwélél minhôôlak mi bahôla nson, ibale ngôñ i nene.) Juu li mimañ li nlama kit njee a kôli éga yigil i Bibel i likoda. Bilôk bikéé ba mpohol bi nlama ba bet ba gwé ngap i éga yigil loñge, kayéle ba mal i ngeñ, ba gwéélak minlôñ mi Bibel mi mi nit yigil, ba hôlga bôt bobasôna i tehe nseñ u mam ba yé nigil. Balôôs yigil ba ga hôlôs likeñge jap mu jam li ibale ba ntiimba añ biniigana ntôñ u mpémés inoñnaga ni lelaa ba nlôôs gwigil bi mambadga ni mandimbhe. (w23.04 lp. 24, minkéñék mi matila) I mbus le likoda li ntibil wan matode momasôna ma yigil inyu sonde i, i ga ba ha bé nseñ i buñgbaha yigil yañga. Ibale hala a nla bôña, hiki sonde, ba nla héñha lôk kéé i i nlôôs yigil i Bibel i likoda, yak baañ maben. Ibale ñéga likoda li ñem sonde a mbat le ba hubus ngéda i yigil i Bibel i likoda, mankéé nu a nlôôs yo a ga tehe lelaa a boñ hala. A nla pohol le ba ga añ bé ngim maben.

17. Manut maa. Ñéga likoda li ñem sonde a ga bigdaha ngim matode ma likoda ma ma nlôôha ba nseñ. A nlama ti dinyo malép inyu sonde i noñ. Ibale ngéda i ngi yii, a nla ti môl ma bilôk bikéé bi bi ga ba baudu mu likoda li ñem sonde li noñ. Handugi biniigana bipe, ibale minlegla tole maléta ma yé, ñéga likoda li ñem sonde nyen a ga añ mo mu bibuk gwé bi nsôk. A ga ti bé ngim minlegla i ngii hikôma, kiki bo mi mi mbéñge ntjega inyu makoda ma likalô, ni ntjega inyu pubus Ndap Ane, ndi ba nlama éde i nya minlegla i i libam li minlegla. Ibale a ga la bé legel manwin to añ maléta momasôna mu ngéda i ntina nye inyu bibuk bi nsôk, ñéga likoda a ga bôk a bat bilôk bikéé bi bi gwé minkwel mu pes likoda ni ño le “Di niñik kiki bikristen,” le ba hubus ngéda yap. (See  maben 16 ni  19.) Likoda li ga mal lôñni hiémbi ni masoohe.

18. I mbus hiki nkwel u ñudu, ñéga likoda li ñem sonde a gwé bebee le linut jada inyu bégés bôlô ñudu ni ti nye maéba inoñnaga ni litode a lamga sal. I ngéda ñéga likoda a njubus ñudu, a ga legel bé litode a nlama sal. Ndi, ngéda ñudu a mal, ñéga likoda a nla bégés nye i nya i kôli, i mbus a kal litode ñudu a salak, a unda ki inyuki ñudu a nsal jo loñge, tole a toñol, ni ngandak liyômba, inyuki, ni lelaa, ñudu a nlama kônde sal mu litode li. Ñéga likoda a nla ki pôdôl mam mape mu ndémbél i, ibale a nôgda le ma nla ba nseñ inyu ñudu tole baemble. I ngéda b’a ba ndik bo iba, i mbus yigil tole ngéda ipe, a nla ki ti ñudu maéba mape, ma ma nhôlôs nye mu litode li, tole litode lipe, ma pémlak i man kaat le, Gwés bôt, tole mu man kaat le, Niiga, tole i kaat suklu le École du Ministère.—Inyu kôhna biniigana bipe bi mbéñge bôlô i ñéga likoda li ñem sonde ni bôlô i nti maéba, béñge  maben 19,  24, ni  25.

19. Nkwel to wada u nlama bé lel ngéda i ntina, hala wee to bibuk bi mankéé nu a yé ñéga likoda. To hala kiki kaat i Likoda li Niñ yés ni nson wés u bikristen i nti ntéak ngéda inyu hiki nkwel, nseñ u ta bé le ñudu a buñgbaha nkwel wé yañga ibale a ntibil pémés matode momasôna, nye ngi mélés ngéda i ntina nye. Ñéga likoda li ñem sonde tole nti maéba a nlama tehe ñudu tole nti nkwel nu a nlel ngéda i ntina nye, inyu ti nye maéba, ndi ha i ti bôt bé. (Béñge  maben 24 ni  25.) Likoda jolisôna (hala wee lôñni tjémbi ni masoohe), li nlama nom ngeñ yada ni 45 manut.

20. I ngéda likoda li gwé mayuuga ma ngwélél makiiña, likoda li nlama tagbe kiki Kaat likoda li ñem sonde i ñunda, u héya mahéñha mana, le: Yigil i Bibel i likoda, i i mbéna tagbe i pes ini le, “Di niñik kiki bikristen,” i ga ba bé, ndi ngwélél makiiña a ga tégbaha nkwel u nson u 30 ma manut. Ndi ilole ngwélél makiiña a nti nkwel wé, ñéga likoda li ñem sonde a ga boñ mbigda i yigil, a ti ki dinyo malép inyu sonde i nlo, a legel minlegla, a añ ki maléta ma ma nlama éña, ndi to le a njubus ngwélél makiiña. I ngéda ngwélél makiiña a mal ni nkwel wé, a mélés likoda ni hiémbi a mpohol nyemede. A nla naña mankéé nu munlôm numpe inyu kwés likoda ni masoohe. Mu sonde mayuuga ma ngwélél makiiña, ndap suklu ipe inyu baudu i nlama bé ba mu hilémb hi likoda. Ibale likoda li mbéñge man juu li batéé likalô, li li ngwélél hilémb hipe, i juu li, li nla tégbaha makoda mé. Ndi, i juu li, li nlama kodba lôñni likoda jolisôna inyu emble nkwel u ngwélél makiiña.

21. I sonde i likoda li likiiña tole i likoda li ndôn, makoda ma ga ba bé. Ba nlama bigdaha likoda le, hiki lihaa tole hiki mut a nlama wan biniigana bi makoda ma sonde i nyetama.

22. I ngéda Bilôp bi Nwet bi nlama tagbe mu hilo hiada hi ñem sonde, likoda li ñem sonde li ga ba bé.

23. Mañ wada u nlama pohlana mu juu li mimañ inyu ba ngwélél nu likoda li ñem sonde. Bôlô yé i yé le a boñ le likoda li ba ntjegek loñge, le mam momasôna ma ma mbéñge likoda li ñem sonde ma tagbe inoñnaga ni biniigana bini. A nlama bana lem i kwel loñge ni mañ u u yé nti maéba. I ngéda Kaat i likoda li ñem sonde i mpam, ngwélél nu likoda li ñem sonde a ga pohol ipôla baudu ni ini lôk kéé ipe, bonjee ba ga bana minkwel inyu sôñ iba. (Béñge  maben 3-16 ni  24.) I ngéda a nkap minkwel mi baudu, a nlama kap nwo inoñnaga ni nwii mi ñudu, ibale a yé nhôôlak i pes mbuu tole heni, tole ibale libak li ñudu li ga ti nye makénd i tégbaha nkwel wé ngi wonyuu. Minlélém mi matiñ nwon mi ga éga ngwélél inyu kap mini minkwel mimpe. Hiki nkwel u ñudu u nlama tina nye, i ndék yosôna, sonde aa i bisu bi kel a nlama tégbaha nkwel wé, ni njel lipep li minkwel mi baudu, ni hop Pulasi le, Devoir d’élève à la réunion Vie chrétienne et ministère (S-89). Ngwélél nu likoda li ñem sonde a ga boñ le ntjega u makoda ma ñem sonde u ba i libam li minlegla. Juu li mimañ li nla tep mañ wada tole nhôla nson wada inyu hôla i mankéé nu. Ndi, ndik mimañ nwotama nwon mi nlama kap minkwel mi mi ta bé inyu baudu.

24. Hiki sonde, mañ wada u ga ba ñéga likoda li ñem sonde. (Het mimañ mi ta bé ngandak, bahôla nson ba ba kôli ba nla gwéélana, ibale hala a mbéda.) Nyen a nlama kôôba bibuk bi bisu ni bibuk bi nsôk. Nyen a njubus bipes gwobisôna bi likoda, i bak ki le, ibale mimañ mi ta bé ngandak, a nla ki kôhna ngaba ipe, kiki bo ngim nkwel, mu sonde i, téntén ibale nkwel wonsôna u yé ndik le baemble ba béñge ngim vidéô, ibabé i kônde jam lipe. Bibuk ipôla minkwel bi nlama lôôha ba ndék. Juu li mimañ li nlama pohol mimbe mimañ mi kôli yônôs nson unu. Mimañ mi ba mpohol mi nla yônôs nson unu, wada i mbus nuu. Inoñnaga ni libak li likoda, ngwélél nu likoda li ñem sonde a nla gwéélana kiki ñéga likoda li ñem sonde iloo mini mimañ mimpe. Ibale mañ wada u kôli tégbaha yigil i Bibel i likoda, wee bebek a nla ki gwéélana kiki ñéga likoda li ñem sonde. Soho ni tééda i mahoñol le, to laa yaa, i ga béda le mañ u u ga ba ñéga likoda, u ti baudu bibégés ikété gwéha, ni maéba malam i ngeñ ma mbéda. A gwé ki mbegee i boñ le likoda li mal i ngeñ. (Béñge  maben 17 ni  19.) Ibale ñéga likoda a ngwés, ni ibale pôla i yé, ba nla téé nkôô mahop (micrô) umpe mu hikôma kayéle ngéda a mba a njubus minkwel, mankéé nu a gwé nkwel a nla lo hikôma mu nkôô mahop u téblé i minkwel. Nlélém, ibale a ngwés, ñéga likoda a nla yén i ngim téblé mu hikôma, i ngéda lisoñgol li Bibel, ni i ngéda pes ini le “Ligip yaga i nson u ñañ nlam” i yé tagbe. Hala a nla boñ le ngéda i nimil bañ.

25. Ibale hala a nla bôña, i yé loñge le inyu nson unu, ba gwélél nhôôlak mañ u u nyi ti minkwel. Bôlô i nti maéba i yé le a ti hiki mañ ni nhôla nson maéba mu minkwel ba nti, ibale i mbéda le hala a bôña, ndi ha i ti bôt bé. A nla ti maéba inyu minkwel ba gwé i likoda li ñem sonde, minkwel nwap mi mbamba, ni i nya ba ntégbaha yigil i Nkum Ntat, lôñni lisoñgol jap mu yigil i, tole yigil i Bibel i likoda. (Béñge  liben 19.) Ibale likoda li gwé ngandak mimañ mi mi niiga loñge, mi tinak ki minkwel loñge, wee hiki nwii ba nla héñha mañ u u ga ba nti maéba. Nti maéba a ta bé nyégsaga i ti maéba i mbus hiki nkwel.

26. Inoñnaga ni nsoñgi u baudu, makoda ma nla bana mandap ma suklu mape inyu minkwel mi baudu. Hiki ndap suklu i nlama bana ñéga nu a nyi ti maéba; ibale a yé mañ, wee loñge. Ibale ngôñ i nene, nhôôlak nhôla nson nu a kôli, bañga bañga, a nla gwéélana. Juu li mimañ li nlama pohol bonjee ba nla gwélél hala, ba kit ki ibale ba nlama héñhana i mbus ngim ngéda. I mankéé nu a ñéga suklu i, a nlama noñ biniigana bi ntina mu  liben 18. Ibale ndap suklu ipe ma yé, ba nlama bat baudu le ba ke nyoo i mbus nkwel u u gwé ño le “Tik ngok i mbuu,” mu pes ini le “Masôô ma nkus ma Bibel.” Ba nlama témb lôñni likoda jolisôna i mbus le ñudu nu nsôk a mal tégbaha nkwel wé.

27. Ngim bividéô i i nkiha ni likoda lini, i ga gwéélana. Bividéô bi likoda li ñem sonde bi ga lébna i JW Library^®; mut a nla yoñ gwo ni njel ndôñ bisélél kiki bo ordinateur, téléfôn tole tafel.

© 2023 Watch Tower Bible and Tract Society of Pennsylvania

S-38-BS 11/23