Бағышланмаз ҝүнаһ дедикдә Аллаһын бағышламадығы дүшүнҹә тәрзиндән ирәли ҝәлән һәрәкәтләр нәзәрдә тутулур. Инсан бу вәзијјәтә неҹә ҝәлиб чыха биләр?

Аллаһ ҝүнаһларындан төвбә едән, Онун бујругларына ујғун јашајан вә Иса пејғәмбәрә иман ҝәтирәнләри бағышлајыр (Һәвариләрин ишләри 3:19, 20). Анҹаг ола биләр инсан ҝүнаһа о гәдәр алудә олсун ки, дүшүнҹә тәрзини вә һәрәкәтләрини һеч вахт дәјишмәк истәмәсин. Мүгәддәс Китаб бу ҹүр инсаны үрәји корланан вә ҝүнаһын товлајыҹы гүввәси илә сәртләшән инсан кими гәләмә верир (Ибраниләрә 3:12, 13). Собада бишмиш ҝилин формасыны дәјишмәк мүмкүн олмадығы кими, ҝүнаһын һаким кәсилдији үрәји дә дәјишмәк мүмкүн дејил (Әшија 45:9). Бу ҹүр инсанын ҝүнаһларынын бағышланмасына һеч бир әсас јохдур (Ибраниләрә 10:26, 27).

Иса пејғәмбәрин дөврүндәки бәзи дин рәһбәрләри бағышланмаз ҝүнаһ ишләтмишдиләр. Онлар Исанын етдији мөҹүзәләрин Аллаһ тәрәфиндән олдуғуну билсәләр дә, дејирдиләр ки, она бу ҝүҹү верән Шејтан Иблисдир (Марк 3:22, 28—30).

Бағышланмасы мүмкүн олан бәзи ҝүнаһлар

• Билмәдән күфр етмәк. Һәвари Булус бир вахтлар күфр данышырды, амма о, сонрадан демишди: «Мәнә мәрһәмәт ҝөстәрилди, чүнки мән ҹаһил вә имансыз олдуғум үчүн белә һәрәкәт едирдим» (1 Тимутијә 1:13).

• Зина. Мүгәддәс Китабда әввәлләр зина етмиш инсанлар һагда данышылыр. Анҹаг онлар төвбә етдикләри үчүн ҝүнаһлары бағышланмышды (1 Коринфлиләрә 6:9—11).

«Бағышланмаз ҝүнаһ ишләмишәм?»

Әҝәр сән ҝүнаһлы әмәлләринә ҝөрә пешман олуб дәјишмәк истәјирсәнсә, онда сәнин ҝүнаһын бағышланыр. Дәфәләрлә ејни ҝүнаһы етсән дә, Аллаһ сәни бағышлајар, бир шәртлә ки, биләрәкдән Она гаршы чыхмајасан (Мәсәлләр 24:16).

Бәзи инсанлар фикирләшир ки, онлар бағышланмаз ҝүнаһа јол верибләр, чүнки виҹданлары онлары ҝүнаһландырыр. Анҹаг Мүгәддәс Китаб өјрәдир ки, һиссләримизә һәмишә етибар етмәмәлијик (Әрәмја 17:9). Аллаһ бизә кимисә, һәтта өзүмүзү белә, мүһакимә етмәјә сәлаһијјәт вермәјиб (Ромалылара 14:4, 12). Үрәјимиз бизи мүһакимә етсә дә, Аллаһ бизи бағышлаја биләр (1 Јәһја 3:19, 20).

Јәһуда Искәрјут бағышланмаз ҝүнаһ ишләмишди?

Бәли. Тамаһкарлыг Јәһуданы Аллаһын иши үчүн едилән ианәләри оғурламаға тәһрик етди. О, өзүнү елә ҝөстәрирди ҝуја касыблар үчүн үрәји јаныр, әслиндә исә мәгсәди даһа чох пул оғурламаг иди (Јәһја 12:4—8). Ҝүнаһ Јәһуданын үрәјинә о гәдәр һаким кәсилди ки, ахырда о, Иса пејғәмбәри 30 ҝүмүшә сатды. Иса пејғәмбәр Јәһуданын һеч вахт төвбә етмәјәҹәјини билирди, буна ҝөрә дә ону «һәлака ҝедән адам» адландырды (Јәһја 17:12). Бу о демәк иди ки, Јәһуда һеч вахт дирилмәјәҹәк (Марк 14:21).

Јәһуда етдији ҝүнаһа ҝөрә үрәкдән пешман олмады. О, сәһв етдијини Аллаһа јох, онунла әлбир олан каһинләрә етираф етди (Мәтта 27:3—5; 2 Коринфлиләрә 7:10).