Los Ángeles (California, Estados Unidos) markanwa jilsuwayta. Jakapkäyät ukawjanakanjja, droganak apnaqapjjäna, jan walinak lurir gruponakas utjarakïnwa. Nayajj sojjta jilanakajat payirïtwa.

Mamajajj Evangélica Iglesiaruw irpapjjetäna. Ukampis qʼajjo waynajjayät ukhajja, kuntï ukan yatichapkitän ukarojj janiw istʼkayätti. Domingonakajj iglesian qʼochupkäna uka gruponkayätwa, ukat yaqha urunakajj droganakampiw qolljasirïta, wachoq qʼañu luräwinakan sarnaqerïta.

Kunats jankʼakiw colerasiriyäta, ukat wali qhorurakïyätwa. Kunas nayatakejj jiwayañ mä armäkaspas ukhamänwa. Iglesian yateqkayäta ukajj janiw yanaptʼkitänti. Awisajj akham sirïtwa: “Tatitunkiw vengasiñajja, nayasti serviripätwa” sasa. 1960 mara tukuyarojja, 18 maranejjayätwa. Ukhajj Panteras Negras sasin uñtʼat político grupon amuyupajja, nayatakejj waljamakïnwa, jupanakajj markachirinakar arjjatirjam uñtʼatäpjjänwa. Ukatwa uka pachpa amuyuni mä grupor mantayäta, jupanakajj yateqer waynanakapjjänwa. Awisajja, istʼayasiñatakejj wal chʼajjwapjjerïta, ukhamïpansti walja kutiw escuelajj jistʼantasirïna.

Ukampis jukʼamp jan walinak lurañ munaskakiyätwa. Ukat walja jan walinak lurañ qalltjjayäta. Sañäni, Estados Unidos markankirinakajj África cheqat jutirinakar wal tʼaqhesiyapki uka peliculanak uñtiriw amigonakajamp sarapjjerïta. Uk uñjasajja, janqʼo jañchini waynanakaruw ukan nuwjapjjayäta, ukat kawkhantï janqʼo jañchininakajj jakapki, ukawjanakaruw nuwjir sarapjjerïta.

Jilanakajampejj uka tiemponjja, autoridadanakan jan walit uñjatajjapjjayätwa. Maynïr sullkajajj jan walinak lurir gruponkänwa, nayajj jupanakampiw sarnaqjjayäta. Jukʼamp jan walinak lurjjayäta.

Mä amigojan awk taykapajja, Jehová Diosan Testigopapjjänwa, jupanakajj tantachäwiparuw invittʼapjjetu. Ukankirinakajja, wali suma jaqenakapjjänwa. Taqeniw Biblianipjjäna ukat liytʼañatakis thaqtapjjarakïnwa,  janiw ukakïkänti, ¡qʼajjo waynitunakas arstʼapjjarakïnwa! Diosan sutipajj Jehová satataynawa ukat Jupat parlkasajj aytasipjjarakïnwa, ukaw wal muspharayitäna (Salmo 83:18, NM). Tantachasirinakajj walja markatapkchïnsa, janiw yaqha jañchinitap laykojj uñisisipkänti.

Qalltanjja, janiw Bibliat yatjjatañ munkayätti, ukampis tantachäwinakapar sarañajj wal gustitäna. Mä arumajja, amigonakajajj mä conciertoruw sarapjjäna. Ukanjja, mä waynaruw cuero chaquetap aparas jiwayapjjatayna, ukhasti tantachäwinkaskayätwa. Qhepürojja, ukham lurapjjatapat wal jachʼañchasipjjäna. Juicionsa, wali qhoruw tukupjjäna, jupanakat waljanejja, jiwañapkama carcelan llawintatäñatakiw juchañchatäpjjäna. ¡Walikpun jupanakamp jan sarkatätti! Ukhatwa Bibliat yatjjatañ qalltawayta, ukat nayra jakäwejj jaytañatakis amtawayta.

Niyakejjay yaqha kasta jañchini jaqenakar uñisirïchiyätjja, kuntï Jehová Diosan Testigonakap taypin uñjkäyät ukajj wal muspharayitäna. Sañäni, janqʼo jañchini mä Testigojj yaqha markaru viajiñatakejja, chʼiyar jañchini mä Testigo familiaruw wawanakap uñjañapataki jaytawayäna. Yaqhajja, mä janqʼo jañchini familiajj chʼiyar jañchini mä waynaruw utapan jakasiñapataki jawstʼapjjäna. Ukaw Jehová Diosan Testigonakapajj kuntï Juan 13:35 qellqatan siski ukarjam phoqapjjatap amuyayitäna. Ukan akham siwa: “Jumanakatejj maynit maynikama munasipjjätajja, taqeniw amuyapjjani nayan discipulonakajjäpjjatama” sasa. Jupanakajj cheqapuniw Jesusan cheqpach arkiripäpjje ukwa ukajj amuyayitu.

Bibliat yatjjatasajja, nayra jakäwejj jaytañ wakisitap amuyta. Janiw qhoru jaqëñ munjjayätti, ukatakejj chuymatpach mayninakar munasiñatakiw chʼamachasiñajäna (Romanos 12:2). Jukʼat jukʼatwa jan walinak jaytawayjjta, ukatwa Jehová Diosan Testigopjam 1974 maran bautisasjjta.

Qhepatsa, suma jaqëñatak chʼamachasiskakiñajänwa. Sañäni, mä urojj jaqenakaruw visittʼasipkayäta. Ukat mä lunthataw autojat radio apsuskatayna, ukatwa aparir tʼijta. Niya jikjjatañampiskayät ukhajja, radio jaqtawayasajj tʼijuskakïnwa. Kunjamsa aparasinta uk yatiyir masinakajar yatiyta ukhajja, experiencian mä jilatajj akham sasaw jisktʼitäna: “¿Katjasmän ukhajj kunsa lurasmäna?” sasa. Uka jisktʼapajj suma jaqëñataki chʼamachasiñajajj wakisiskakitap amuytʼayitäna.

Octubre 1974 maranjja, precursorjamaw loqtañ qalltawayta. Sapa phajjsejj 100 horanakaw Bibliat jaqenakar yatichayäta. Qhepatjja, kawkhantï Jehová Diosan Testigonakapar oraqpachan uñjaski ukaruw invittʼapjjetu, ukajj Brooklyn (Nueva York) markankiwa. 1978 maranjja, Los Ángeles sat markaruw mamaj uñjir kutʼjjayäta, jupajj usutänwa. Pä mara qhepatjja, Aarhonda sat tawaqompiw casarasta. Jupaw mamajar uñjañsa, jan sinti aynachtʼañatakis yanaptʼawayitu. Mamajajj jiwjjäna uka qhepatjja, Galaad Escuelaruw invittʼapjjetu. Uka escuela tukuyarojja, Panamá markaruw misionerjam khitapjjetäna, jichhas uka markankasipkaktwa.

Bautisasjjt uka qhepatsa, coleramp apayasiskakiyätwa, awisajj jan nuwasiñatakejj sarjjañajänwa jan ukajj sumat askichañatakiw chʼamachasiñajäna. Esposajas ukat yaqhanakas ‘walik ukham chʼamachasisktajja’ sasaw sapjjetäna, nayas kusisirakiyätwa. Nayra jakäwejj jaytatajat wal kusista. Ukampis janiw chʼamajampik ukanak lurawaykti, jan ukasti, Bibliaw nayra jakäwejj jaytañatak yanaptʼawayitu (Hebreos 4:12).

Bibliajj sum jakasiñatakiw yanaptʼawayitu, chuymatpacha mayninakar munasiñsa yatichawayarakituwa. Jichhajj janiw khitirus nuwjjti, jan ukasti, Diosar uñtʼapjjañapatakiw yanaptʼaskta. Yamas mä nayra yateqer masijaruw Bibliat yatichawayta, nayrajj jupamp wal chʼajjwapjjeriyäta. Qhepatjja bautisasjjänwa, ukat utajanwa jupampi mä qawqha tiempo jakapjjayäta, jichhakamas jupampejj suma amigosipkaktwa. Esposajampejj 80 jila jaqenakaruw Jehová Diosan Testigopar tukupjjañapataki yanaptʼawayapjjta.

Jilat kullakanakampi wali suma ukat kusisita jakasitajat walpun Jehová Diosar yuspärta.