Santo Domingo sat cheqanwa nasiwayta República Dominicana sat markan capitalapana, pusi jila sullkanakatjja, sullkïrïkis ukatwa. Awk taykajajja, wali yatjjatatäpjjänwa ukat sum jakasipjjañäjj munapjjäna. Pusi maranak janïr naskäyät ukhajja, mormonanakan misioneronakapar uñjasaw wal muspjjarapjjatayna jupanakajj qʼoma, wali suma isthaptʼata ukat suma jaqenakäpjjatap layku. Ukat tiempompejj islankirinakatjja, familiajaw nayraqat Iglesia de Jesucristo de los Santos de los Últimos Días mä arunjja, Iglesia Mormona sasin uñtʼatäpki ukar mantapjjatayna.

Uka iglesiankasajj kuna lurañanakatï utjkäna ukanjja, yanaptʼapunirïyatwa, cheqas familiaru ukat suma sarnaqañar wali askit uñjapjjerïna ukaw jukʼampis nayatakejj askïnjja. Mormonäñajj nayatakejj wali askïnwa ukatwa misionerjam irnaqañäjapuniw sasajj sayäta.

Ukat 18 maranëjjayät ukhajja, Estados Unidos markaruw familiajajj nayan mä suma universidadar mantañatakejj sarjjapjjayäta. Mä maratjja, tionakajaw Florida markar visittʼir jutapjjäna, jupanakajj Jehová Diosan Qhanañchirinakapäpjjänwa ukat Bibliat yatjjatañatak mä jachʼa tantachäwir sarañatakiw invittʼapjjetu. Ukat ukanjja, taqeniw Biblian jiskʼa tʼaqanakap thaqtapjjäna ukat qellqaqtʼasipjjarakïna, ukaw wal muspharayitäna, uk uñjasajja, jankʼakiw jupanakjam qellqtʼasiñatakejj mä papelampi ukat boligrafompi mayirakiyäta.

Niyakejjay tionakäjajj misioneroñ munatäj yatipjjchïnjja, jachʼa tantachäw tukuyarojj Bibliat jukʼamp yatjjatañamatakiw yanaptʼañ munapjjsma sasaw sapjjetäna. Ukajj nayatakejj walikjamakïnwa, kunattejj Bibliat sipanjja, Mormón Librokwa sum uñtʼayäta.

Sarjjapjjäna uka qhepatjja, teléfono toqew Bibliat parlasipkakiyäta. Ukat creyktas  ukjja, Bibliampipuniw yatjjatañama sasaw sapjjetäna. Jupanakajj kunatï cheqäki ukjja, naya pachpa yateqañäjwa munapjjäna.

Religionajan walja yatichäwinakap cheqäkaspas ukham amuyayäta, ukampis Bibliajj yatichki ukarjamati janicha ukjja, janiw yatkayätti. Ukatjja tiajaw ¡Despertad! del 8 de noviembre de 1995 qellqat apayanitu, uka revistajj Jehová Diosan Qhanañchirinakapan luratawa, ukanjja pä yatichäwinakaw mormonanakat parläna. Uk liytʼasajj iglesiajan walja yatichäwinakap jan sum uñtʼatäjwa amuyasta. Ukhamïpanjja, Internetan mä cheqajj utjapkitän ukaruw kuntï revistajj siskän ukajj cheqat janich uk sum yatjjatañatak mantta; ukampis ukajj cheqapuniskataynawa. Ukat qhepatjja, Utah sat markan mormonanakan walja museonakapajj utjkäna ukar visittʼkasaw jukʼampinak jikjjatta.

Bibliampi ukat Mormón Libropampejj purapats yanaptʼasipkaspa ukham amuyayäta. Ukampis Bibliat sum yatjjatañar uchasta ukhakiw may maya parlapjjatap amuyjjayäta. Amuytʼañataki, Biblianjja Ezequiel 18:4 [NM] jiskʼa tʼaqanjj almajj jiwiriwa sasaw qhanañchi. Ukampis Mormón Libropanjja, Alma 42:9 jiskʼa tʼaqanjja, almajj janipuniw jiwkaspati sasarakiw qhanañchi.

Ukat yaqhajja, kuntï mormonanakajj markar jachʼañchañat amuyapkäna ukaw mayjtʼayarakitäna. Mayajj akanwa: Edén jardinajj Jackson (Misuri, Estados Unidos) sat cheqanwa jikjjatasi sasaw yatichapjjäna. Ukat profetanakapajj “kunapachatï Diosan Reinopajj apnaqkani ukhajja, Estados Unidos markan banderapajj jachʼar aptatapuniw laphaqeni ukat sumankañas altor aptatäniwa taqenis sum jakasjjapjjani” sasaw yatichapjjaraki.

Ukat ukanak paskäni ukhajj markäjarus ukat yaqha markanakarus kunas paspachäni sasaw jisktʼasiyäta. Mä jaypʼojja, mä waynaw telefonot jawsanitu, jupajj misioneroñatakiw yatjjataskäna ukat juparuw akham sasin jisktʼta: “Markamatï yaqha markampi guerrankaspajja, ¿uka markankir mormonanakampejj nuwasismati?” sasa. Jïsa nuwasiristwa sasaw jupajj situ. Ukat religionäjat jukʼamp yatjjatañatakejja, iglesian wali respetat pʼeqtʼirinakaruw jisktʼasiyäta ukat jupanakajj uka jisktʼanakaman qhanañchäwipajj janiw yatiskiti, tiempoparuw yatisiskani sapjjakitänwa.

Qhanañchäwinakapampejj chuyma ustʼataw jikjjatasiyäta. ¿Kunatsa misionerjam irnaqtʼañ muntjja? sasaw jisktʼasiyäta ukat jaqenakamp mintatañ laykukiw misioneroñ munaskatatjja, ukwa amuyasta. Ukampis Diosatjja mä jukʼak yatiyätjja. Biblian jiskʼa tʼaqanakap walja kutis liykchiyätjja, janipuniw Bibliarojj wali askit uñjkayätti. Ukat Diosajj aka oraqetaki, jaqenakataki mä amtanïtapjja, janirakiw yatkayätti.

Jehová Diosan Qhanañchirinakapamp Bibliat yatjjatkasajja, waljanakwa yateqawayta sañäni: Kunas Diosan sutipajja, maynejj jiwjje ukhajj kunas pasjje, Diosan amtap phoqhasiñapatakejj Jesusajj kuna luräwinisa ukat jukʼampinaka. Cheqansa, ukhaw Biblia sum uñtʼañ qalltawayta ukat kuntï yatjjatkäyät ukjja, walpun yaqhanakar parlañ munayäta. Cheqas Diosan utjatapjja, yatipuniyätwa, ukampis jichhajja, Juparojj mä suma amigorjamaw parljjayta. Ukat 2004 maran julio phajjsit 12 urunak saraqataruw Jehová Diosan Qhanañchiripjam bautisasiwayta ukat sojjta phajjsitjja, precursorjamaw loqtjjarakiyäta.

Brooklyn (Nueva York) markan Jehová Diosan Qhanañchirinakapar Oraqpachan pʼeqtʼasipki ukanwa phesqa maranak irnaqtʼawayta. Ukat ukankasajj Biblianaka ukat Bibliat apstʼat yaqha qellqatanak lurañan yanaptʼañajj wali kusiskañapunïnwa, kunattejj taqe uka qellqatanakajja, oraqpachankir millón millón jaqenakan askipatakïnwa. ¡Mayninakar Diosar uñtʼapjjañapatak yanaptʼasajja, wali kusisitapuniw jikjjatasta!