ভাল খবৰৰ উৎস হৈছে যিহোৱা ঈশ্বৰ আৰু সকলো পৰিয়ালে আনন্দত থকাটো তেওঁ বিচাৰে। (১ তীমথিয় ১:১১) যিহোৱা ঈশ্বৰেই হৈছে বিবাহৰ উদ্ভাৱক। পাৰিবাৰিক আনন্দ আৰু ল’ৰা-ছোৱালীবিলাকৰ জীৱন সুৰক্ষাৰ বাবে বিবাহ আইনগতভাৱে হোৱা উচিত। ঈশ্বৰৰ আজ্ঞা পালন কৰিব বিচৰা লোকসকলে স্থানীয় নিয়ম অনুসৰি ৰেজিষ্টাৰ বিবাহ কৰা উচিত।—লূক ২:১, ৪, ৫ পঢ়ক।

বিবাহৰ বিষয়ে ঈশ্বৰৰ দৃষ্টিভংগী কি? এজন পুৰুষ আৰু তিৰোতাৰ মাজত হোৱা বিবাহ ঈশ্বৰে স্থায়ী হোৱাটো বিচাৰে। স্বামী আৰু স্ত্ৰীয়ে এজনে-আনজৰ প্ৰতি বিশ্বাসী হোৱাটো ঈশ্বৰে বিচাৰে। (ইব্ৰী ১৩:৪) বিবাহ বিচ্ছেদ যিহোৱা ঈশ্বৰে ঘৃণা কৰে। (মলাখী ২:১৬) স্বামী বা স্ত্ৰীক বিবাহ বিচ্ছেদ আৰু পুনৰ বিবাহ কৰিবলৈ ঈশ্বৰে অনুমতি দিয়াৰ একমাত্ৰ কাৰণ হৈছে ব্যভিচাৰ।—মথি ১৯:৩-৬, ৯ পঢ়ক।

যিহোৱা ঈশ্বৰে আদম আৰু হৱাক এজনে-আনজনৰ সহকাৰী হিচাপে সৃষ্টি কৰিছিল। (আদিপুস্তক ২:১৮) পৰিয়ালৰ মুৰব্বী হিচাপে স্বামীয়ে দৈনন্দিন প্ৰয়োজনীয়বোৰ যোগান ধৰিবলৈ আৰু পৰিয়ালক ঈশ্বৰৰ বিষয়ে শিক্ষা দিয়াত মুখ্য ভূমিকা লোৱা উচিত। নিজৰ পত্নীৰ প্ৰতি স্বামীৰ নিস্বাৰ্থ প্ৰেম থাকিব লাগে। তেওঁলোকে এজনে-আনজনক প্ৰেম আৰু সন্মান দেখুৱা উচিত। অসিদ্ধ হোৱাৰ বাবে স্বামী-স্ত্ৰীয়ে এজনে-আনজনৰ ভুল-ত্ৰুটিবোৰ ক্ষমা কৰিবলৈ শিকাৰ যোগেদি, তেওঁলোকে বিবাহিত জীৱন সুখী কৰি তুলিব পাৰিব।—ইফিচীয়া ৪:৩১, ৩২; ৫:২২-২৫, ৩৩; ১ পিতৰ ৩:৭ পঢ়ক।

যদি আপোনাৰ বৈবাহিক জীৱনত কিবা সমস্যাই দেখা দিছে, তেনেহ’লে আপোনালোক দুয়োজনে এজনে-আনজনৰ প্ৰতি প্ৰেম দেখুৱাবলৈ শিকা উচিত।  (১ কৰিন্থীয়া ১৩:৪, ৫) বিবাহিত জীৱনত সৰু-সুৰা সমস্যাবোৰৰ বাবে এজনে-আনজনক এৰি যোৱাটো ঈশ্বৰৰ বাক্যই আজ্ঞা নিদিয়ে।—মাৰ্ক ১০:৯ পঢ়ক।

তোমালোকে আনন্দত থকাটো যিহোৱা ঈশ্বৰে বিচাৰে। যৌৱনকালত তোমালোকে কেনেকৈ আনন্দ লাভ কৰিব পাৰিবা, তাৰ বিষয়ে ঈশ্বৰে উত্তম উপদেশ দিছে। তোমালোকে পিতৃ-মাতৃৰ প্ৰজ্ঞা আৰু অনুভৱৰপৰা শিকা উচিত। (কলচীয়া ৩:২০) যিহোৱা আৰু তেওঁৰ পুত্ৰ যীচু খ্ৰীষ্টৰ বাবে কাৰ্য্য কৰি তোমালোকে আনন্দ কৰাটোও তেওঁ বিচাৰে।—উপদেশক ১১:৯–১২:১; মথি ১৯:১৩-১৫; ২১:১৫  ১৬ পঢ়ক।

নিজৰ সন্তানৰ বাবে খাদ্য, বস্তু আৰু বাসস্থান আদিৰ ব্যৱস্থা কৰিবলৈ আপোনালোকে কঠিন পৰিশ্ৰম কৰা উচিত। (১ তীমথিয় ৫:৮) কিন্তু সন্তানৰ প্ৰকৃত আনন্দৰ বাবে আপোনালোকে তেওঁলোকক ঈশ্বৰৰ বিষয়ে শিকিবলৈ আৰু তেওঁক ভাল পাবলৈ শিক্ষা দিয়া উচিত। (ইফিচীয়া ৬:৪) ঈশ্বৰৰ প্ৰতি আপোনালোকৰ প্ৰেমে, ল’ৰা-ছোৱালীবিলাকৰ বাবে এক উদাহৰণ হ’ব আৰু তেওঁলোকৰ হৃদয়ত গভীৰ প্ৰভাৱ পৰিব। যেতিয়া আপোনালোকৰ উপদেশবোৰ ঈশ্বৰৰ বাক্যৰ আধাৰত হ’ব, তেতিয়া ই ল’ৰা-ছোৱালীৰ বিচাৰধাৰাবোৰ সঠিকভাৱে গঢ় দিবলৈ সহায় কৰিব।—দ্বিতীয় বিবৰণ ৬:৪-৭; হিতোপদেশ ২২:৬ পঢ়ক।

ল’ৰা-ছোৱালীবিলাকক উৎসাহ দিয়া আৰু তেওঁলোকে কৰা কাৰ্য্যবোৰৰ বাবে মূল্যাঙ্কণ কৰাৰ যোগেদি আপোনালোকে তেওঁলোকৰ মনত আনন্দ দিব পাৰিব। মাজে-সময়ে সুধৰণি আৰু অনুশাসনৰ প্ৰয়োজন। এইদৰে কৰিলে আপোনালোকে তেওঁলোকক বেয়া অভ্যাসবোৰৰপৰা সুৰক্ষা দিব পাৰিব। (হিতোপদেশ ২২:১৫) কিন্তু মনত ৰখা উচিত যে অনুশাসন দিওঁতে কঠোৰ বা নিষ্ঠুৰ হোৱা উচিত নহয়।—কলচীয়া ৩:২১ পঢ়ক।

পিতৃ-মাতৃ আৰু ল’ৰা-ছোৱালীৰ বাবে যিহোৱাৰ সাক্ষীসকলে কেইবাখনো কিতাপ প্ৰকাশ কৰি উলিয়াইছে। এই কিতাপবোৰ বাইবেলৰ আধাৰত।—গীতমালা ১৯:৭, ১১ পঢ়ক।