“Fill raquiduamlayaimün ñi chumleal ta hule, caque quiñeque antü nielu cai chem tamün fill raquiduamelaeteu” (MATEO 6:34).

¿Chem quimeltueiñmu? Tati fill raquiduam coneltulei taiñ mongen meu. Fill antü nieiñ taiñ duam, feimu cümelai tami fill raquiduamcüleal tami femafel cüpalechi antü meu.

• Ti estres hulquei ansiedad cutran. Feimu, ¿chem chumafuimi? Hunen dungu, com nieafuiñ pichiquen estres, huelu fill raquiduamülmi feichi dungu tami pepi ngünenoafel, doi nieafuimi estres. Epulechi dungu, epe com taiñ femqueel müte huesa tripaquelai chumngechi taiñ raquiduamqueel.

“Tati nielu huenu mu cüpachi quimün [...] ñom piuquengei” (SANTIAGO 3:17).

¿Chem quimeltueiñmu? Ngelai tami raquiduamal ñi cüme tripayal com tami femqueel ca ñi femqueel caquelu.

• Ñom piuquenge. Raquiduamnge chem tami femürpuafel. Ca loncontucunge tami pepi femal cam femnoal ta eimi ca caquelu che. Femngechi femülmi, eimi ca caquelu pu che niehuelayai fentren estres ca doi cüme tripayai tamün femün. Ca elcünulayaimi tami ayecachengen. Ayecaulu iñchiñ huesa tripaquelu rume ti dungu, niehuelayafuiñ fentren estres ca doi cüme duamcüleaiñ.

“Quiñe huentru quim ngüneduamlu ñochi duamcüleai” (PROVERBIOS 17:27).

¿Chem quimeltueiñmu? Tati huesaque raquiduam trucurcülei reque, pepi cüme raquiduamquelai ta che, feimu cümei tami tüngcüleal.

• Ngüneduamnge chem tami fill raquiduamelqueteu ca chum duamelqueimu. Por ejemplo, nielmi estres ngüneduamnge tami raquiduam, tami chum duamcülen ca tami femquen, fei huirintucuafuimi. Doi quimülmi tami chumlequen nien mu estres, doi cüme chaftuafuimi. Ca raquiduamnge chumngechi quiñepülecünuafiel chem huesa dungu rume tami nienoal estres. Pepi femnolmi, quintunge chumngechi tami nehue huesa duamelnoaeteu. Por ejemplo, doi cüme adcünunge tami femqueel ca tami tiempo.

• Caquerumei iñchiñ taiñ fill raquiduamcülequen ta caquelu meu. ¿Ngüneduampeafuimi ca dungu tami cüme raquiduamal? Inayafuimi tüfachi cüla ngülam:

  1. Matucaulayaimi tami huesa raquiduamal caquelu meu. Pichi raquiduamnge tami üngümcülen quiñe fila meu, fei quiñe che noquelcahui tañi hunencüleal. Raquiduamülmi ñi femün tañi huesa chengen mu, illcuafuimi. Doi cümeafui tami huesa raquiduamnoal feichi che meu.

  2. Cüme raquiduam nieaimi tami rupamequen mu. Ngüneduamülmi tami rume alüñmayal terminal micro mu cam tami peaeteu quiñe doctor, cüme püneafuimi ti tiempo, papeltuafuimi, doi cüme adcünuafuimi tami cüdau cam peafuimi tami correo electronico.

  3. Ngüneduamnge com tami rupamequen. Ramtuunge: “Tüfachi huesa dungu, ¿doi huesalcalerpuai hule cam cüpalechi semana mu?”. Quim ngüneduamnge trürnon quiñe pichi huesa dungu ca cangelu fütra huesa dungu engu.

“Chem rume femülmün, yamün mu femqueaimün ca com cüme adcünuafimün” (1 CORINTIOS 14:40).

¿Chem quimeltueiñmu? Nehuentuunge tami cüme yenieal tami mongen.

• Com duamnieiñ taiñ cüme adnieal taiñ mongen. Ca antü elcünuliyiñ taiñ pürüm femafel, doi estres nierpuafuiñ ca doi cüdau nierpuafuiñ. Cümeafui tami inayal tüfachi ngülam:

  1. Adcünunge chem hora tami femal ca femnge.

  2. Ngüneduamnge chumngelu femquelaimi tami pürüm femafel, fei femhuequilnge.

“Doi cümei pichi ürcütual ta rume cüdahual meu” (ECLESIASTÉS 4:6).

¿Chem quimeltueiñmu? Pu rume cüdauquelu niequelai tiempo ca nehuen tañi ürcütual ca cüme rupayal tañi huehun ñi cüdau mu.

• Cüme raquiduamnge ti plata ca cüdau mu. Nieal alün plata doi ayühun hulquelai ca doi estres nieafuiñ. Chumngechi feipi Eclesiastés 5:12: “Ti ricu ñi nien mu fentren fillem, pepi umautuquelai”. Feimu gastayaimi plata tunte tami nieel müten.

• Elcünunge tiempo tami cüme rupayal. Femülmi chem tami ayüqueel, doi cüme duamcüleaimi. Huelu müte nengümnolmi, müte quellulayafeimu chi, por ejemplo, re anüleal lelinien mu television.

• Müte pünequilnge tami electronico chemcün. Müchaique ngüneduamquilnge tami correo electronico, mensaje de texto cam redes sociales. Duamfalngenole, ngüneduamquilnge tami correo feichi hora tami cüdaumequenon.

“Cümelcaquei ti che pepicauquelu ñi nehuentucual tañi cuerpo” (1 TIMOTEO 4:8).

¿Chem quimeltueiñmu? Rumel deportemequeal cümei taiñ cümelcaleal taiñ cuerpo.

• Tami deportemequeal yafültucuafeimu ca quelluafeimu tami doi cüme duamcüleal. Inge cümeque iyael ca com tami iqueel fill antü. Ca cüme ürcütuaimi.

• Duamquilnge pütremtual, drogatual ca pulcutual, tüfa doi amulquei tami nieal ta estres. Huesalcaquefi tami cuerpo ca tami duamnieel tami mongeluhuam.

• Pepi ngünenofilmi tati estres, amunge tati doctor meu. Yehuelayaimi tami pediafiel quellu tati doctor.

“Cüme ngüneduamnieafimün chem am tati doi falin-ngelu” (FILIPENSES 1:10).

¿Chem quimeltueiñmu? Cüme ngüneduamnge chem tami doi duamnieel.

• Huirintucunge chem doi duamfalngei tami femal. Tüfa quelluafeimu tami femal ti doi falin-ngelu, quimafuimi chem inalechi femafuimi cam chem femlayaimi. Cafei feipiafuimi cangelu che ñi femal quiñeque dungu.

• Quiñe semana mu huirintucunge com tami femel ca tunteñmaimi tami femal. Fei hula raquiduamnge chumngechi doi cüme püneafuimi tati tiempo. Pepi ngüneniefilmi tami chumquen, quelluaimu tami doi cümelcaleal.

• Eluunge tami ürcütual. Pichin ürcütulmi rume, doi nehuentuaimu ca quelluaimu tami müte nienoal estres.

“Ñi fill raquiduamcülen quiñe huentru ñi piuque, huesa duamelqueyu, huelu quiñe cüme dungun meu yafülduamquei” (PROVERBIOS 12:25).

¿Chem quimeltueiñmu? Quiñe piuqueyen dungun yafültucuafeimu.

• Feipifinge quiñe cüme hueni tami chumlen, femngechi doi cüme duamcületuafuimi. Quiñe manelfal hueni quelluafeimu tami doi cüme raquiduamcüleal cam tami quimal chumngechi cümelcacünutual ti dungu.

• Quintunge quellu. ¿Elfalcünuafuimi cangelu che tami cüdau cam quintuafuimi tami quellungeal?

• Quiñe compañ cüdau mu huesa duamelelmu, quintunge chumngechi tami cümelcacünutuafiel ti dungu. Por ejemplo, ¿cüme duam mu feipiafuimi chumngelu tami huesa duamelqueteu? (Proverbios 17:27). Cüme tripanole tüfa, ¿doi pichiñma müleafuimi feichi che engu?

“Ayühun niei pu quimlu ñi duamnieel Chau Ngünechen ñi adnieteu” (MATEO 5:3).

¿Chem quimeltueiñmu? Iñchiñ duamnielaiñ re iyael, ropa ca ruca müten, ca duamnieiñ taiñ adnieaeteu Chau Ngünechen. Quimniefilmi tüfa ca fülmaucülelmi Chau Dios mu, ayüucüleaimi.

• Llellipulmi, rume quelluaimu. Chau Dios duamtunieimu, feimu mangeleimu tami elcünulelafiel com tami huesa duamelqueteu (1 Pedro 5:7). Llellipuleal ca raquiduamcüleal cümeque dungu meu, quelluaimu tami tüngcüleal (Filipenses 4:6, 7).

• Papeltunge chem quelluafeimu tami fülmaucüleal Chau Dios mu. Tati ngülam tripalu tüfachi revista mu mülei Biblia mu, huirintucungei taiñ pülleconcüleal Ngünechen meu. Tüfachi ngülam ca quelluqueiñmu ‘taiñ quimchengerpual ca taiñ cüme raquiduamal’ (Proverbios 3:21). ¿Cümepelayafui mai tami papeltual Biblia? Hune papeltuafuimi Proverbios pingechi lifru.